2011
Sa Idalom sang Priesthood kag suno sa Pagsulundan sang Priesthood
March 2011

Mensahe sa Visiting Teaching, Marso 2011

Sa Idalom sang Priesthood kag suno sa Pagsulundan sang Priesthood

Tun-i ining materyal kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo mismo kabuhi.

Relief Society seal

Pagtuo • Panimalay • Bulig

Mga pinalangga ko nga mga sister, daw ano kita ka bulahan! Indi lang kita mga miyembro sang Simbahan, kundi mga miyembro man kita sang Relief Society—“ang katilingban sang Ginuo para sa kababayin-an.”1 Ang Relief Society ebidensiya sang pagpalangga sang Dios sa Iya mga anak nga babayi.

Wala bala nagakalipay ang inyo mga tagipusuon sa inyo pagpanumdum sang makakulunyag nga ginsuguran sining katilingban? Sang Marso 17, 1842, ang Propetang si Joseph Smith nag-organisa sang mga sister “sa idalom sang priesthood suno sa pagsulundan sang priesthood.”2

Ang maorganisa “sa idalom sang priesthood” naghatag sa mga sister sang awtoridad kag direksyon. Si Eliza R. Snow, ikaduha nga pangkabilugan nga pangulo sang Relief Society, nagtudlo nga ang Relief Society “indi makaluntad nga wala ang Priesthood, bangud sang kamatuoran nga ginabaton sini ang tanan niya nga awtoridad kag impluwensiya gikan sa sina nga ginhalinan.”3 Si Elder Dallin H. Oaks sang Korum sang Napulo’g Duha ka mga Apostoles nagpaathag, “Ang awtoridad nga pagagamiton sang mga opisyal kag mga manunudlo sang Relief Society… amo ang awtoridad nga magailig sa ila paagi sa ila pang-katilingban nga kaangtanan sa Ang Simbahan ni Jesucristo sang mga Santos sa Ulihing mga Adlaw kag paagi sa ila indibidwal nga pagpain (setting apart) sa idalom sang mga kamot sang mga lider sang priesthood nga amo ang nagtawag sa ila.”4

Ang maorganisa “suno sa pagsulundan sang priesthood” naghatag sa mga sister sang sagrado nga mga responsibilidad. Si Julie B. Beck, pangkabilugan nga pangulo sang Relief Society, nagpaathag: “Nagatrabaho kita sa pamaagi sang priesthood—nga nagakahulugan nga kita nagapangita, nagabaton, kag nagaakto sa bugna; nagahimo sang mga desisyon sa mga konseho; kag nagakabalaka sa pag-atipan sang tagsa ka mga indibidwal. Aton ang katuyuan sang priesthood sa paghanda sang aton mga kaugalingon para sa mga bugay sang kabuhi nga wala’y katapusan paagi sa paghimo kag pagtipig sang mga kasugtanan. Gani, subong sang aton mga utod nga lalaki nga nagakapot sang priesthood, aton ang isa ka buluhaton sang kaluwasan, pag-alagad, kag pagmangin isa ka balaan nga katawhan.”5

Barbara Thompson, ikaduhang manuglaygay sa pangkabilugan nga panguluhan sang Relief Society.

Gikan sa Balaan nga mga Kasulatan

1 Mga Taga-Corinto 11:11; Doctrine and Covenants 25:3; 121:36–46

Gikan sa Aton Kasaysayan

Sang ginapasad ang Nauvoo Temple, isa ka grupo sang mga sister ang luyag nga mag-organisa [sang ila mga kaugalingon] agud sakdagon ang buluhaton sa pagpatindog [sang templo]. Si Eliza R. Snow nagbalay sang mga pagsulundan sining bag-o nga grupo. Sang ginpakita niya ang mga ini sa Propetang si Joseph, sia nagsiling: “Hambala ang mga sister nga ang ila halad ginabaton sang Ginuo, kag may yara sia sang ginatigana nga mas maayo para sa ila. … Organisahon ko ang mga babayi sa idalom sang priesthood suno sa pagsulundan sang priesthood.”6 Pagligad sang malip-ot nga panahon, ang Propeta nagsiling sa bag-o lang naorganisa nga Relief Society: “Ginahatag ko karon ang yabi sa inyo sa ngalan sang Dios, kag ini nga Katilingban magakalipay, kag ang ihibalo kag kaalam magailig (sa inyo) sugod sini nga tion.”7 Ang mga sister ginpaabot nga magsaka sa bag-o nga halintang sang pagkabalaan kag sa paghanda para sa mga ordinansa sang priesthood nga sa indi madugay pagahimuon sa templo.

© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/10. Petsa sang pagtugot sa paglubad: 6/10. Linubad sang Visiting Teaching Message, March 2011. Hiligaynon. 09763 861

Mga Tanda

  1. Spencer W. Kimball, “Relief Society—Its Promise and Potential,” Ensign, Mar. 1976, 4.

  2. Joseph Smith, ginsambit sa Sarah Granger Kimball, “Auto-biography,” Woman’s Exponent, Sep. 1, 1883, 51.

  3. Eliza R. Snow, “Female Relief Society,” Deseret News, Abr. 22, 1868, 81.

  4. Dallin H. Oaks, “The Relief Society and the Church,” Ensign, Mayo 1992, 36.

  5. Julie B. Beck, “Relief Society: A Sacred Work,” Liahona, Nob. 2009, 111.

  6. Joseph Smith, ginsambit sa Kimball, “Auto-biography,” 51.

  7. Teachings of Presidents of the Church: Joseph Smith [Mga Panudlo sang mga Pangulo sang Simbahan: Joseph Smith] (2007), 451.

Ano ang Sarang Ko Mahimo?

  1. Paano ko mabuligan ang mga sister nga akon ginabisita nga maagum ang mga bugay sang balaan nga buluhaton sang Relief Society?

  2. Ano ang himuon ko sini nga bulan agud madugangan ang akon ikasarang nga magbaton sang personal nga bugna?