Mensahe sang Unang Panguluhan, Marso 2011
Pagpangita sang Maayo
Samtang nagapangita sang bag-o nga puluy-an, ang isa ka lamharon nga mag-asawa nga Santos-sa-Ulihing mga Adlaw nagpakigsugilanon sa ila mangin mga kaingod parte sa kasilingan kag sa mga eskwelahan sa lugar.
Ang isa ka babayi nga ila nasugilanon nagsiling parte sa eskwelahan nga ginatambongan sang iya kabataan: “Amo ini ang pinakamanami nga lugar! Ang prinsipal tuman kanami kag maayo nga tawo; ang mga manunudlo tuman ang ikasangkol, mabuot, kag mainabyanon. Nalipay gid ako nga ang amon kabataan sarang makatambong sa sining tuman kanami nga eskwelahan. Manamian kamo diri!”
Ang isa naman ka babayi nagsiling parte sa eskwelahan sang iya kabataan: “Kalain gid sini nga lugar. Ang prinsipal hambog; ang mga manunudlo wala sing ikasangkol, bastos, kag indi mainabyanon. Kon makasarang lang ako magbiya sini nga lugar, himuon ko gid dayon!”
Ang talalupangdon nga butang amo nga ang duha ka mga babayi nagahambal parte sa amo man nga prinsipal, amo man nga mga manunudlo, kag amo man nga eskwelahan.
Nakatalupangod bala kamo nga sa masami makita sang mga tawo ang ano man nga ila ginapangita? Tuluka bala sing maayo, kag matukiban ninyo ang alangay maayo kag malain sa halos bisan sin-o kag bisan ano. Amo man sini ang ginahimo sang mga tawo sa Ang Simbahan ni Jesucristo sang mga Santos sa Ulihing mga Adlaw halin pa sang pagsugod. Yadtong nagapangita sang maayo makasalapo sang isa ka mabuot kag maluluy-on nga katawhan—isa ka katawhan nga nagapalangga sa Ginuo kag nagahandum sa pag-alagad sa Iya kag sa pagbugay sang mga kabuhi sang ila isigkatawo. Apang matuod man nga yadtong nagapangita sang malain pat-od gid nga makakita sang mga butang nga indi gid nagakabagay.
Sa indi maayong palad, kon kaisa nagakatabo man ini bisan pa sa sulod sang Simbahan. Wala’y katapusan ang pagpato-pato, katoso, kag katig-a sang buot sadtong mga nagapangita lang sang mga rason agud magpakalain. Daw indi nila sarang buy-an ang ila ginahuptan nga mga dumot. Nagakutso-kutso sila kag nagapangita sang sala sa iban. Ginahuptan nila ang malain nga balatyagon sa madamo na nga mga tinuig, nga ginagamit ang tagsa ka kahigayunan agud gub-on kag pakalainon ang iban. Indi ini maayo sa panulok sang Ginuo, “kay kon diin ang kahisa kag maiyaiyahon nga hamdum, didto ang kagamo kag tagsa ka malaut nga buhat” (Santiago 3:16).
Si Pangulong George Q. Cannon (1827–1901) nakakilala gid sing maayo kay Pangulong Brigham Young (1801–77), kay nakatrabaho niya ini sing suod sa sulod sang madamo nga mga tinuig, alangay bilang isa ka miyembro sang Korum sang Napulo’g Duha ka mga Apostoles kag bilang iya manuglaygay sa Unang Panguluhan. Pagkatapos sang kamatayon ni Pangulong Young, si Pangulong Cannon nagsulat sa iya journal: “Wala gid ako nagpakalain ukon nagpangita sang sala sa pamatasan ni [Brigham Young], sa iya mga laygay ukon sa iya mga pinanudlo sa bisan san-o sa akon tagipusuon, kapin pa sa akon mga tinaga ukon mga buhat. Nalipay ako nga mahibaloan ini sa karon. Ang akon pirme ginahunahuna amo nga: Kon pakalainon ko ukon pangitaan sang sala, ukon husgahan si Brother Brigham, tubtob diin gid bala ako makalab-ot; kon magsugod ako, sa diin ako mauntat? Wala ako nagpangisog nga saligan ang akon kaugalingon sa amo nga buluhaton. Nakahibalo ako nga ang pagtalikod sa kamatuoran (apostasy) masami nagaresulta sa pagpasugot sa espiritu sang pagpakalain kag pagpangita sang sala. Ang iban, nga may mas daku nga kabakod, kaalam kag eksperiyensya sangsa akon, ayhan makahimo sang madamo nga mga butang kag makalikaw sa malaut nga mga konsekwensiya nga indi ko sarang mahimo.”1
Ang gamhanan nga laygay ni Pangulong Cannon isa ka butang nga dapat naton nga mga miyembro sang Simbahan nga binagbinagon gid sing maayo. Ang pulong sang Dios nagalaygay sa mga sumulunod ni Cristo nga mangin “putli, … madaiton, malolo, kag masinulugton, puno sang kaluoy kag maayong mga bunga, wala’y pagpangduhaduha ukon pagkasalimpapaw.” Kag sa mga sadtong nagapakighidait, “ang bunga sang pagkamatarung ginasab-ug sa paghidait” (Santiago 3:17, 18).
May pilian kita. Sarang kita magpangita sang kalain sa iban. Ukon sarang kita magpakighidait kag mag-obra agud hatagan ang iban sang paghangop, patas nga pagtamod, kag kapatawaran nga ginakalangkagan gid naton nga maangkon para sa aton mga kaugalingon. Aton ini pagpili; kay kon ano man ang aton ginapangita, ina ang pat-od naton nga makit-an.
© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/10. Petsa sang pagtugot sa paglubad: 6/10. Linubad sang First Presidency Message, March 2011. Hiligaynon. 09763 861
Pagtudlo gikan sa Sining Mensahe
“Ayhan mabatyagan ninyo nga kulang kamo sang paghangop parte sa isa ka prinsipyo nga ginahandaan ninyo sa pagtudlo,” siling sa Teaching, No Greater Call ([1999], 19). “Apang, sa inyo mapinangamuyuon nga pagtuon sini, pagtinguha sa pagpangabuhi sini, paghanda sa pagtudlo sini, kag dayon pagpaambit sini sa iban, ang inyo kaugalingon nga panaksihon mapabakod kag mapadalum.”
Sa inyo pagpangita sang maayo sa kabuhi kag sa iban (nga mga tawo) sa sini nga bulan, mangin mas handa kamo sa pagtudlo sining mensahe kag sa pagsaksi sang iya sini kamatuoran.