Agtutubo
Ti Nalawag a Bangir ti Kagat ti Aso
Iti kalgaw ti 2009, nakagatak iti rupak ti aso ti gayyemko. Daksanggasat ta ti kagat ket ginuduana ti bibigko, ket nasken a madait daytoy.
Kalpasan ti pannakagat, naldaayanak unay. Intulokko ti rigat a nangrimbaw iti panunotko, ket nariknak a kasla nadadaelen ti sibubukel a biagko. Mabainak iti bibigko ket diak kinayat ti rummuar tapno makitadak dagiti tao. Iti panunotko dinadael ti sugatko dagiti planok para iti piano, bolibol, simbaan, panaglangoy, ken eskuela.
Ngem tunggal agkararagak, umawat kadagiti bendision ti priesthood, makisao kadagiti nagannak kaniak, wenno sarungkarandak ti pamiliak ken gagayyemko, maitag-ay ti espirituk ket mariknak ti ragsak iti panawen ti liday. Iti di nabayag nautobko a no pampanunoten dagiti tao ti maipapan iti sugatko, makarkariknada iti asi.
Daytoy a padas ket nakatulong a nangbangon iti kinataok, ket nasursurok ti saan nga agdanag maipapan iti no ania ti panunoten dagiti sabali a tao maipapan kaniak. Nabendisionanak pay gapu ta natulongannak ti sugatko a nakautob a nasken a diak unay panunoten ti maipapan iti bagik ket mangrugiak nga ad-adda a mangipateg kadagiti dadduma. Napapigsa unay ti espirituk kabayatan daytoy a panawen.
Naammuak a ti rigat ket paset ti plano ti Nailangitan nga Ama para kadatayo. No agsapultayo iti nasayaat ken saan a ti dakes, marimbawantayo ti rigat, agbalintayo a nasaysayaat a tao, ken mapalugodantayo ti padas a mangpapigsa iti pammaneknektayo.