Mensahe iti Visiting Teaching, Marso 2011

Babaen ti Priesthood ken maibatay iti Pagtuladan ti Priesthood

Adalem daytoy a material ken, no mayannatup, ilawlawagmo daytoy kadagiti kakabsat a babbai a sarungkaranyo. Usarem dagiti saludsod a makatulong kenka a mangpapigsa kadagiti kakabsat a babbai ken tapno mangaramid iti Relief Society kas aktibo a paset ti bukodmo a biag.

Pammati • Pamilia • Tulong

Patpatgek a kakabsatko a babbai, anian a naggasattayo! Saantayo laeng a miembro ti Simbaan, no di ket miembrotayo pay ti Relief Society—“ti timpuyog ti Apo para kadagiti babbai.”¹ Ti Relief Society ket pakakitaan iti ayat ti Dios para kadagiti annakna a babbai.

Saan kadi nga agrag-o ti pusoyo kabayatan ti pananglagipyo kadagiti nakaay-ayat a nangrugian daytoy a gimong? Idi maika-17 ti Marso, 1842, binukel ti Propeta Joseph Smith dagiti kakabsat a babbai “babaen ti priesthood a maibatay iti pagtuladan ti priesthood.”²

Tapno mabukel “babaen ti priesthood” nangted iti turay ken pangiturong kadagiti kakabsat a babbai. Ni Eliza R. Snow, maikadua a sapasap a presidente ti Relief Society, insurona a ti Relief Society “saan a mapaadda no awan ti Priesthood, gapu iti kinapudno nga aggapu amin a turay ken bilegna manipud iti dayta a pagtaudan.”³ Inlawlawag ni Elder Dallin H. Oaks ti Korum dagiti Sangapulo-ket-dua nga Apostol, “Ti turay nga aramaten dagiti opisial ken mannursuro ti Relief Society … ket isu ti turay nga umay kadakuada babaen ti koneksion ti organisasionda iti Ti Simbaan ni Jesucristo dagiti Santo iti Ud-udina nga Aldaw ken babaen ti indibidual a pannakatudingda [setting apart] babaen dagiti ima dagiti dadaulo ti priesthood a nangawag kadakuada.”⁴

Tapno mabukel a “maibatay iti pagtuladan ti priesthood” nangted kadagiti kakabsat a babbai kadagiti sagrado a pagrebbengan. Inlawlawag ni Julie B. Beck, sapasap a presidente ti Relief Society: “Mangimatontayo iti wagas ti priesthood{cm}a kaipapananna a manggun-od, umawat, ken agtignaytayo iti paltiing; agaramid kadagiti pangeddeng kadagiti konseho; ipaseknan iti bagbagitayo ti panangipateg kadagiti indibidual a saggaysa. Adda kadatayo ti panggep ti priesthood a mangisagana iti bagbagitayo para kadagiti bendision ti biag nga agnanayon babaen ti panagaramid ken panagtungpal kadagiti katulagan. Ngarud, kas kadagiti kakabsattayo a lallaki nga addaan iti priesthood, adda kadatayo ti aramid ti pannakaisalakan, serbisio, ken panagbalin a nasantuan a tattao.”⁵

Barbara Thompson, maikadua mammagbaga iti sapasap a panguluen ti Relief Society.

Manipud kadagiti Nasantuan a Kasuratan

1 Taga Corinto 11:11; Doktrina ken Katulagan 25:3; 121:36–46

Manipud iti Pakasaritaantayo

Kabayatan ti pannakaipatakder ti Templo ti Nauvoo, maysa a grupo dagiti kakabsat a babbai ti nagtarigagay nga aguummong tapno tumulong iti aramid a panagbangon. Ni Eliza R. Snow ket nangbalabala kadagiti paglintegan para iti daytoy baro a grupo. Idi impakitana daytoy ken ni Propeta Joseph Smith, insungbatna: “Ibagam kadagiti kakabsat a babbai nga awaten ti Apo ti datonda, ken addaan isuna iti maysa a banag a nasaysayaat para kadakuada. … Ummongekto dagiti babbai babaen ti priesthood a maibatay iti pagtuladan ti priesthood.”⁶ Iti saan a nabayag, imbaga ti Propeta iti kabarbaro a nabukel a Relief Society: “Itdek itan ti tulbek kadakayo iti nagan ti Dios, ket daytoy a Gimong agrag-onto, ket agayusto ti pannakaammo ken kinasaririt manipud iti daytoy a panawen.”⁷ Ninamnama a ngumatonto dagiti kakabsat a babbai iti baro a tukad ti kinasantuan ken agsagana para kadagiti ordinansa a maaramidton iti templo iti mabiit.

© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti Visiting Teaching Message, March 2011. Ilokano. 09763 864

Ania ti Maaramidko?

Kasano a matulongak dagiti kakabsat a babbai a sarungkarak a mangsagrap kadagiti bendision ti sagrado nga aramid ti Relief Society?
Anianto ti aramidek iti daytoy a bulan a mangpadur-as iti kabaelak nga umawat iti bukod a paltiing?