Mensahe ti Umuna a Panguluen, Marso 2011
Panagsapul iti Nasayaat
Bayat ti panagbirokda iti baro a pagtaengan, nakisao dagiti agtutubo nga agassawa a Santo iti Ud-udina nga Aldaw kadagiti potensial a kaarruba maipapan iti sangakarrubaan ken dagiti eskuela iti dayta a lugar.
Maysa a babai a nakasaoda ti nagsarita maipapan iti eskuela a pagad-adalan dagiti annakna: “Daytoy ket naidumduma unay a lugar! Ti prinsipal ket maysa a nakakaskasdaaw ken nasayaat a tao; dagiti mannursuro ket kualipikado unay, naanus, ken mannakigayyem. Maragsakanak unay ta makapagadal dagiti annakmi iti daytoy naidumduma nga eskuela. Magustuamto la ketdi ditoy!”
Maysa met a sabali a babai ti nagsarita maipapan iti eskuela dagiti annakna: “Nakaam-amak a lugar daytoy. Ti prinsipal ket makumikom iti bagina; saan a kualipikado, natangsit, ken saan a mannakigayyem dagiti mannursuro. No kabaelak la koma ti pumanaw iti daytoy a lugar, aramidek daytoy a madagdagus!”
Ti makaay-ayo a banag ket agpada dagiti babbai nga agsasao maipapan iti isu met laeng a prinsipal, dagiti isu met laeng a mannursuro, ken ti isu met laeng nga eskuela.
Nadlawyo kadin a gagangay a kabaelan a sapulen dagiti tao ti ania man a sapsapulenda? Agsapulka a nasayaat, ket matakuatam ti agpada a nasayaat ken dakes iti dumani amin a tao ken ania man a banag. Nakaaramiden dagiti tao iti kasta met laeng iti Ti Simbaan ni Jesucristo dagiti Santo iti Ud-udina nga Aldaw manipud pay iti punganayna. Dagiti agsapul iti nasayaat ket makasapuldanto iti naaayat ken naaasi a tattao—tattao a mangipatpateg iti Apo ken agtarigagay nga agserbi Kenkuana ken mangbendision iti biag dagiti padada a tao. Ngem pudno met a dagiti agsapul iti dakes ket awan duadua a makasapuldanto kadagiti banag a saan unay a nasayaat.
Daksanggasat ta no dadduma mapaspasamak daytoy uray iti uneg ti Simbaan. Awan ti paggibusan ti kinamanagparnuay, kinalaing, ken kinasukir dagiti agsapul kadagiti rason tapno aguyaw. Kasla dida mapengdan ti panagtalinaedda kadagiti gurada. Agsaosaoda ken agbirokda iti biddut dagiti dadduma. Dida malipatan dagiti madi a rikna iti adu a dekada, a mangal-ala iti tunggal gundaway a mamerperdi ken mangumsi kadagiti dadduma. Saan a makaay-ayo daytoy iti Apo, “ta no sadino ti yan dagiti agum ken panagriringgor, adda idiay ti riribuk ken amin nga aramid a kinadangkok” (Santiago 3:16).
Am-ammo unay ni Presidente George Q. Cannon (1827–1901) ni Presidente Brigham Young (1801–77), a nasinged a nakatrabahuanna iti adu a tawen, agpada a kas miembro ti Korum dagiti Sangapulo-ket-dua nga Apostol ken kas mammagbagana iti Umuna a Panguluen. Kalpasan ti pannakatay ni Presidente Young, insurat ni Presidente Cannon iti diurnalna: “Diak kaano man dinillaw wenno nagbirok iti biddut iti ugali [ni Brigham Young], iti pammagbaga wenno kadagiti pannursurona iti ania man a panawen iti pusok, kasta met kadagiti balikas wenno tignayko. Daytoy ket maysa a pakaragsakan kaniak ita. Ti kapanunotan a nagtalinaed kaniak ket: No dillawek wenno agbirokak iti biddut, wenno kedngak ni Kabsat a Brigham, kasanonto ti kaadayo ti papanak; no mangrugiak, sadinonto ti pagsardengak? Diak pinadas ti nagtalek iti bagik iti kasta a turongen. Ammok a ti ikakalilis ket masansan nga agbanag manipud iti panangpalugod iti espiritu ti panagdillaw ken panagbirok iti biddut. Dagiti dadduma, nga addaan iti ad-adu a pigsa, kinasirib ken padas ngem siak, ket mabalin nga agaramidda iti adu a banag ket libasanda dagiti dakes a bunga a diak padasen nga aramiden.”1
Ti nabileg a pammagbaga ni Presidente Cannon ket maysa a banag a nasken nga ibilangtayo a miembro ti Simbaan nga addaan iti dakdakkel nga annad. Balbalakadan ti balikas ti Dios dagiti pasurot ni Cristo nga agbalin a “nadalus, … natalna, nalaing, nalaka a pagdawatan, napno iti asi ken kadagiti nasayaat a bungbunga, awan ti idumdumana, ken awanan iti panaginsisingpet.” Para kadagiti agaramid iti talna, “ti bunga ti kinalinteg maimula iti talna” (Santiago 3:17, 18).
Addaantayo iti pili. Makapagbiroktayo iti dakes kadagiti dadduma. Wenno makapagaramidtayo iti talna ken makapagtrabahotayo tapno maitedtayo kadagiti dadduma ti pannakaawat, kinalinteg, ken pammakawan a tartarigagayantayo unay para kadagiti bagitayo. Daytoy ti pilitayo; ta ania man a birokentayo, awan duadua a mabirokantayonto.
© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti First Presidency Message, March 2011. Ilokano. 09763 864
Panangisuro manipud iti Daytoy a Mensahe
“Mabalin a mariknam nga agkurangka iti pannakaawat maipapan iti nalawag a pagbatayan nga isagsaganam nga isuro,” nagadawan Teaching, No Greater Call ([1999], 19). “Nupay kasta, kabayatan ti sikakararag a panangadalmo iti daytoy, panangikagumaam a mangtungpal iti daytoy, panagsagana a mangisuro iti daytoy, ket kalpasanna panangibinglay iti daytoy kadagiti dadduma, mapapigsa ken mapaunegto ti bukodmo a pammaneknek.”
Bayat panagbirokmo iti nasayaat iti biag ken kadagiti dadduma iti daytoy a bulan, ad-addanto a nakasaganaka a mangisuro iti daytoy a mensahe ken mangipaneknek maipapan iti kinapudnona.