Pweng luhn Prestuhnsi Se Met, Mahs 2011
Suk ke ma Wo
Ke siacnyacn fuhsr se ke Mwet Luhlahlfongi ke Lwen-sahflah uh suk sie lohm sasuc selos uh, elos sramsram nuh sin mwet insac ah ma kuh in oruh mwet tuhlan lalos ke ohiyacn inkucl sac ac lutlut ke acn sac.
Sie muhtwacn elos sramsram nuh se ah fahk ke lutlut se tuhlihk nahtuhl ah wi ac: “Acn na wowo se pa inge! Prinsipuhl sac mukul na wolacna se; mwet luti ac fal in luti, wo, ac kuhlwacng. Nga engan na pwacye lah tuhlihk nahtuhsr uh kuh in wi lutlut na wolacna se inge. Kowos ac luhngse acn ngwe!”
Muhtwacn se sahyac fahk ke lutlut se tuhlihk nahtuhl ah wi ac: “Acn na koluk se. Prinsipuhl sac nuhnkuh kacl sifacna; mwet luti ac suhfal in luti, koluk ac sekuhlwacng. Nga fin kuh in mukwilac liki acn se inge, ngwac sana mukwilac!”
Ma tahfuhnkahs se kac uh pa kwewana muhtwacn luo uh sramsramkihn prinsipuhl sacna, mwet luti ac pwacna, ac lutlut sacpacna.
Kuh kom nuh etuh lah mwet uh kuh in kwacna sokwack ma elos suk uh? Suk in wo, ac kom fah kuh in konwacack kwewa ma wo ac ma koluk sin apkuhran in mwet nuh kwewa ac ma nuh kwewa. Mwet uh oruh oacyac nuh ke Alu luhn Jisus Kraist luhn Mwet Luhlahlfongi ke Lwen-sahflah e ke na muhtwacwacackiyac ah. Elos suc suk ke ma wo tuhfah sokwack mwet wo ac pahkotwen — mwet se ma luhngse Leum ac kena in kuhlwacnsap nuh Sel ac ahkinsewowoye moul luhn mwet wiyaclos. Tuhsruhk pwacye pac lah elos suc suk ke ma koluk uh tuhfah sokwack ma tiac arlac wo.
Koluk ohiyac, kuhtuh pacl uh ma inge sikyak pac ke Alu uh. Wacngihn sahflah ke orek lwemlwem, ahksuhmaht, ac sruasra lalos suc suk ke srihpac in ahkkoluk uh. Elos tiac kuh in fuhlweack nuhnkweyac lalos. Elos lwesrihk ac suk ma koluk luhn mwet sahyac an. Elos onwe kihnet uh ke yac singucul kuhtuh, eis pacl wowo nuh kwewa in ahktuhngye ac ahkmwekihnye mwet sahyac uh. Ma inge tiac ahkenganye Leum, “Yen ma oasr sok ac nunku kac sifacna we, fohs ac kain in ma koluk nukewa oasr pac we” (James 3:16).
Prestuhn George Q. Cannon (1827–1901) el etuh kacl Prestuhn Brigham Young (1827–77) wo, orekma fototo nuh yohrohl ke yac pucspucs, ke el oruh mwet se ke U luhn Mwet Sap Singucul Luo ac ke el oruh mwet in kahsruh se lal ke Prestuhnsi Se Met. Tukun misac lal Prestuhn Young ah, Prestuhn Cannon el suhmuhslah ke puk in sihm nahtuhl ah: “Nga tiac wi ahkkoluk kuh konwacack ma koluk ke oruh lal [Brigham Young] uh, fahk in kahsruh kuh luti lal ke pacl nuh kwewa uh oasr insiyuck, srihk kuhtuh ke fahk kuh oruh luhk uh. Ma inge wo nuh sihk pacl inge. Nuhnak se ma tuh oasr sihk ac pa: Nga fin ahkkoluk kuh sokwack ma koluk kac, kuh nuhnuhnkwacl Tamuhlwel Brigham, fuhkah lusacn fahsr luhk uh; nga fin muhtwacwacack, ngwac tui oyac? Nga kupohtule in tiac nuhnkweyuc nuh ke kain ohiyac se. Nga etuh lah koluklac uh kwacna sikyak ke muhnahslah nuh ke nguhn in ahkkoluk ac sukyacn ma koluk uh. Mwet sahyac, ma kuh likiyuc, suhmaht ac yohk etwaclah la, kuh in oruh ma pucspucs ac kahingkuhnlah ma ac sikyak ke ma koluk uh suc nga tiac kupohtule in oruh.”1
Kahs in kahsruh wowo lal Prestuhn Cannon uh pa sie ma kuht mwet ke Alu uh enenuh in nuhnkuh yohk kac uh. Kahs luhn God ahkkweye mwet fahsr tukun Kraist in oruh in “nasnas, … mislac, okak, ac kulang, sessesla ke pakoten ac fahko wo puspis, wangin srisri ac kutasrik.” Nuh selos suc ahkmihs, “fahko luhn suwohswohs kosracni ke misla” (James 3:17, 18).
Oasr sulaclah se lasr. Kuht kuh in suk ke ma koluk luhn mwet sahyac an. Kuh kuht kuh in oruh mislac ac orekma in tahfweacng nuh sin mwet sahyac an kahlwem, oruh ma fal, ac nuhnak muhnahs ma kuht kena yohk nuh sesr uh. Sulaclah se lasr; ke ma nuh kwewa kuht suk uh, tuh kuht in sokwack na pwacye.
© 2011 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/10. Ahkkweyeyucklac ke lweng: 6/10. Lwenglah luhn First Presidency Message, March 2011. Kosraean. 09763 868
Luti ke Pweng Se Inge
“Kom kuh in puhla lah srihklac etuh lom ke sie ip yohk ma kom ahkolah in luti an,” mwe kahsruh Teaching, No Greater Call ([1999], 19). “Tuhsruhktuh, ke kom pruhe in lutlutkihn uh, srihke in moulkihn uh, ahkolah in luti kac uh, na akacsruhi kac nuh sin mwet sahyac uh, fahkwack luhlahlfongi lom sifacna an ac tuhfah ahkkweyeyuck ac ahkloalyeyuck.”
Ke kom liye ke ma wo ke moul uh ac ke mwet sahyac uh ke mahlwem se inge, kom ac tuhfah ahkolah wo in luti pweng se inge ac in fahkwack ke ma pwacye kac uh.