2011
Ye kohkoh luhn Pristut ac tukun Pactuhn luhn Pristut
March 2011

Pweng ke Forfor Luti, Mahs 2011

Ye kohkoh luhn Pristut ac tukun Pactuhn luhn Pristut

Lutlutkihn kuhfa inge, ac ke pacl fal, sramsramkihn yurin tahmtahel ma kom muhtwacta nuh yohroh an. Orekmakihn kihsen siyuck an in kahsrwe kom ahkkweye tahmtahel wiyom an ac in orwaclah ip fokoko se ke U luhn Muhtwacn in Kahsruh ke moul lom sifacna an.

Relief Society seal

Luhlahlfongi • Sucu • Kahsruh

Tahmtahel wolacna wiyuck an, fuhkah luhpan insewowo lasr uh! Tiac ke kuht oruh mwet ke Alu muhkwena, tuhsruhk kuht oruh pac mwet ke U luhn Muhtwacn in Kahsruh — “U se luhn Leum sin muhtwacn uh.”1 U luhn Muhtwacn in Kahsruh pa ahkpwacyeyacn luhngse luhn God nuh sin tuhlihk muhtwacn Nahtuhl uh.

Kuh insiyom tiac engan ke kom esamwack pwacriyacn muhtwacwacack luhn u se inge uh? Ke Mahs 17, 1842, Mwet Pahluh Joseph Smith el akiyac tahmtahel uh “ye kohkoh luhn pristut tukun pahtuhn luhn pristut uh.”2

Ac tuhfah akwucki “ye kohkoh luhn pristut” sang kuh suwohs ac kolyuck luhn tahmtahel uh. Eliza R. Snow, prestuhn luhlahp ahkluo ke U luhn Muhtwacn in Kahsruh uh, luti lah U luhn Muhtwacn in Kahsruh uh “tiac kuh in oasr fin wacngihn Pristut, ke kahlwem lah el eis nohfohn kuh suwohs ac oruh la ke ohiyac sac.”3 Elder Dallin H. Oaks ke U luhn Mwet Sap Singucul Luo el ahkuhtweyac lah, “Kuh suwohs se in orekmakihnyuck sin mwet oasr wal la ac mwet luti ke U luhn Muhtwacn in Kahsruh uh … pa kuh suwohs se ma kuh in fahsr nuh yohrohlos ke fahsrweni luhn u lalos nuh ke Alu luhn Jisus Kraist luhn Mwet Luhlahlfongi ke Lwen-sahflah uh ac ke ahkkweyeyucklac luhn kais sie ye poun mwet kol luhn pristut ke pahngyak lalos an.”4

Ac tuhfah akwucki “tukun pactuhn luhn pristut uh” sang nuh sin tahmtahel an kunohkohn muhtahl. Julie B. Beck, prestuhn luhlahp luhn U luhn Muhtwacn in Kahsruh uh, el ahkuhtweyac lah: “Kuht mukwikwi ke ohiyac luhn pristut — suc kalmac pa kuht suk, eis, ac orekma nuh ke fwackyuck; oruh sulaclah uh ke tuhkweni uh; ac elyahkihn kuht ke fosrngahkihnyacn kais sie. Ma lasr uh pa srihpac luhn pristut in ahkoe kuhtlac nuh ke mwe insewowo luhn moul ma pahtaht in oruh ac karihngihn olwelah uh. Pwacnwacng, in oacna mukul wiyacsr ma sruok pristut uh, ma lasr uh pa orekma luhn molwelah, kuhlwacnsap, ac oruh sie mwet muhtahl.”5

Barbara Thompson, mwet in kahsruh ahkluo luhn prestuhnsi luhlahp ke U luhn Muhtwacn in Kahsruh.

Ke Ma Suhmuhslah uh

1 Mwet Korint 11:11; Doctrine and Covenants 25:3; 121:36–46

Ke Ma Mahtuh Lasr

Ke muhsahiyuck Tempuhl Nauvoo ah, u in tahmtahel se kena in oraclah in tahpuhk oruh luhn lohm se. Eliza R. Snow el orwaclah masap nuh ke u sasuc se inge. Ke el sang nuh sel Mwet Pahluh Joseph lacn liye ah, el topuk: “Fahk nuh sin tahmtahel an lah mwe sang kahsruh lalos an luhngseyuck sin Leum, ac oasr ma wowo nuh selos yohrohl. … Ngwac akiyac muhtwacn uh ye kohkoh luhn pristut tukun pactuhn luhn pristut uh.”6 Pacl fototo tohkoh, Mwet Pahluh el fahk nuh sin U luhn Muhtwacn in Kahsruh se ma tuhfahna oreklac: “Nga inge furohkoht ki se nuh suwos ke inen God, ac U se inge tuhfah enganwack, ac etuh ac kahlwem uh tuhfah puhtat nuh ten ke pacl se inge.”7 Tahmtahel uh motkweyuck in kihluckyak nuh ke sie fihl muhtahl sasuc ac in ahkolah nuh ke akwuck muhtahl luhn pristut ma ac tuhfah orekmakihnyuck lun tempuhl uh.

© 2011 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/10. Ahkkweyeyucklac ke lweng: 6/10. Lwenglah luhn Visiting Teaching Message, March 2011. Kosraean. 09763 868

Mwe kahsruh

  1. Spencer W. Kimball, “U luhn Muhtwacn in Kahsruh — Its Promise and Potential,” Ensign, Mahs 1976, 4.

  2. Joseph Smith, sihmlac ke Sarah Granger Kimball, “Auto-biography,” Woman’s Exponent Septempuh 1, 1883, 51.

  3. Eliza R. Snow, “Female Relief Society,” Deseret News, Eprel 22, 1868, 81.

  4. Dallin H. Oaks, “The Relief Society and the Church,” Ensign, Mei 1992, 36.

  5. Julie B. Beck, “Relief Society: A Sacred Work,” Liahona, Nohfohmpuh. 2009, 111.

  6. Joseph Smith, sihmlac ke Kimball, “Auto-biography,” 51.

  7. Teachings of Presidents of the Church: Joseph Smith (2007), 451

Meac Nga Kuh In Oruh?

  1. Nga ac kahsruh fuhkah tahmtahel nga forfor nuh yohroh uh in engankihn mwe insewowo ke orekma muhtahl luhn U luhn Muhtwacn in Kahsruh uh?

  2. Meac ngwac kuh in oruh ke mahlwem se inge in ahkyohkye kuhiyuck in eis fwackyuck luhn kais sie uh?