Klumech er a First Presidency, Ongedei el buil 2011
Osiik a Ungil
Sera losiik ra mo beches el blirir, e tirkal mekekerei el obekel er a Uriul-klebesei el Santo a milengedecheduch er a rechad er tial basio er a teletelel ma skuul er ngii.
A tara redil el ble longedecheduch er ngii e millekoi el kirel a skuul el ngar ngii a rengelekel el kmo: “Ng meral ungil basio! A meredel er tial skuul a meral ungil chad; a resensei a meral meduch, e ungil a rengrir, e bekesechelei. Ak meral ungil a renguk el kmo a rengelekek a sebecherir el ngar tial kmal ungil skuul. Ng kmal mo soam el ngartiang!”
A kuk chimong er a redil a millekoi el kirel a skulir a rengelekel el kmo: “Ng meral mekngit el basio. A merredel er tial skuul a kmal di kmo ngii; a resensei a diak a skulir, mekngit a blekerdelir, e diak el bekesechelei. Alsekum meng mo sebechek el tuobed er tial beluu, e ak merael er a kmal di mereched el taem!”
A kmal mechas a rengud er ngii tir ka el terung el redil a mesaod er a kmal di osisiu el merredel er a skuul, ma osisiu el sensei, ma osisiu el skuul.
Ke kol mla tuab osengem ra rechad el sebecherir e blechoel metik ra ngii di el ngerang el osiik er ngii? Sel bom ungil omes, eng sebechem el metik a ungil ma mekngit el ngarngii er a rebek el chad ma ngii di el ngerang. A rechad me te meruul a di osisiu el omeruul el mo ra Ikelesia er a Jesus Kristo ra Uriul- klebesei el Santo er sera le kot el omuchel. Tirkel omes a ungil a mo metik ra ungil e bekokoui el rechad—rechad el betik a rengrir er a Rubak e sorir el mesiou er Ngii e omekngeltengat er a klengar er a rebebil. E dirrek el klemerang el tirkel omes a kngtil a tekoi a mo blechoel metik a ikel diak el sal lungil.
Ea kmal mekngit, sel bebil e tial teletael a dubech ra chelsel a Ikelesia. Ng diak a ulebengelel omeruul, uldasou, ng telekangel er a rechad el osiik a uchul a kngtil a rokui el tekoi. Ng diak el sal sebechir el chemoit a kngtil a rengrir. Te outulechoid e osiik a kngtil a rebebil. Te omkar a telemall el kmal meketeketang, e osiik er a bek el techall e mo melemall a chisir e omekrur ra rebebil. Tiang a kmal diak el ungil er medal a Rubak, “sel le ngar ngii a chelechei ma re di omdasu er tir, e ng dirrek el ngar isei a uldikel ma bek bedengel a mekngit.” (Jakobus 3:16).
A President George Q. Cannon (1827–1901) a kmal mle ungil medengelii a President Brigham Young (1801–77), ng mle oureor el obengkel mle betok el rak, tir el terung a mle chedal er a Chelechad ra Teruich ma Terung el Apostol e mle counselor er ngii e ra First Presidency. A uriul er a kodellel a President Young, ea President Cannon a milluches er a babilengel el kmo: “Ng dimlak a tang me kulekoi a kngtil malechub e kusiik a mekngit el kirel a omerellel, ma llechul ma lechub eng osisecheklel a [Brigham Young] er a ngii di el taem er a chelsel a renguk, tekoi el kulekoi ma kuruul. Tia kmal deuil a renguk er chelechang. A uldasou el blechoel kumdasou er ngii a kmo: Alsekum mak melekoi a kngtil,osiik a kngtil, malechub e ak merritel er a Brother Brigham, e ng ko el mo uangerang a klemengetel a taem el kuaisei; e alsekum ma kumuchel, e ak mo stob ra kirel ker? Ng diak kulasem el kmo ngsebechek el mo kiu tial rael. Ak mle medengei el kmo a rebet a blechoel el duubech er a reng ra mengkit el omelekoi ma osiik a kngtil a tekoi. A rebebil, el kmal mesisiich, mellomes e betok a lodengei er ngak, a locha sebechir el remuul a betok el tekoi e imiu er a mekngit el me er tir eng di ngak a kmal diak kulasem el mo meruul.”1
Tial mesisiich el osisecheklel a President Cannon a chimol tekoi el kid el chad er tial Ikelesia a kired el mo melchesuar el kirel. A tekingel a Dios a omeklatk er a rultirakl er a Kristo el mo “klikiid, … mui ra budech, delmedemek, e bekodurch, mui er a chubechub ma ungil rodech, e diak lomekbitang, ma kal cheblad.” E tirkel omudech, “a rdechel a klemerang a mokdubech er a budech” (Jakobus 3:17, 18).
Ng sebeched el melilt. Ng sebeched el osiik a mekngit er a rechad. Malechub eng sebeched el omudech e oureor el omesterir a rebebil a klemedengei, tabesul, ma klausubes el kid a kmal oureng el mei er kid. Tia llemelted; el mo ra ngii di el ngerang el dosiik, el kmo ke de maral mo metik.
© 2011 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/10. Kengei er a oidel: 6/10. Oidel a First Presidency Message, March 2011. Palauan. 09763 881
Osischeklel Tial Klumech
“Ke locha melchesuar el kmo ngdiak a kmal klaumedengei er kau er a suobel el kau a mengetmokl el mo olsisechakl,” uleklatk Teaching, No Greater Call (1999], 19). “E ngdi, sel mosuub er ngii lobang nglunguuch, e blak a rengum loltirakl er ngii, e mongedmokl el mo olsisechakl er ngii, e mouchais er ngii al mora rebebil, ea klaumerang er kau a mo dmolech e mesisiich.”
E sel mosiik a ungil er tial klengar ma rechad ra chelsel chelchal buil, e ke kmal mo kldmokl el sebechem el mo olsisechakl er tial klumech e ochotii a klaumerang er kau el kirel.