Mensahe sang Unang Panguluhan, Abril 2011
Wala Sia diri, kundi Nabanhaw
Sa karon mga ginub-an na lamang ang nabilin sang Capernaum, inang siyudad sa higad sang baybay, nga sentro sang pagpangalagad sang Manluluwas sa Galilea. Sa diri Sia nagwali sa sinagoga, nagtudlo sa may kilid sang baybay, kag nagpang-ayo sa mga puluy-an.
Sa pagsugod sang Iya pagpangalagad, si Jesus nagkuha sang isa ka mensahe gikan kay Isaias: Ang Espiritu sang Ginuong Dios yari sa akon; bangud nga ang Ginuo naghaplas sa akon sa pagwali sang maayo nga mga balita sa mga mapainubuson; ginpadala niya ako sa pagbugkos sang buong sing tagipusuon, sa pagbantala sing kahilwayan sa mga bihag, kag sa pagbukas sang bilangguan sa mga binilanggo” (Isaias 61:1; tan-awa man sa Lucas 4:18)—isa ka maathag nga deklarasyon sang isa ka diosnon nga plano sa pagluwas sang mga anak sang Dios.
Apang ang pagpangwali ni Jesus sa Galilea nangin umpisa pa lamang. Ang Anak sang Tawo may dapat tumanon nga makahaladlok nga pagpakigkita sa isa ka bungyod nga ginatawag Golgota.
Gindakop sa Hardin sang Getsemani pagkatapos sang Katapusan nga Panyapon, ginbiyaan sang Iya mga disipulo, ginduplaan, ginkasuhan, kag ginpakahuy-an, si Jesus nagaagunto sa pagpas-an sang Iya dako nga krus padulong sa Kalbaryo. Nagpadayon Sia gikan sa pagkamadinalag-on padulong sa pagluib, pagkastigo, kag kamatayon sa krus.
Sa mga tinaga sang ambahanon nga “The Holy City”:
Ang senaryo nagbag-o. …
Ang kaagahon mabugnaw kag makakulurog,
Samtang ang landong sang krus nagapasaka
Sa ibabaw sang masubo nga bungyod.1
Para sa aton gintugyan sang Langitnon nga Amay ang Iya Anak. Para sa aton gintugyan sang aton Magulang nga Utod ang Iya kabuhi.
Sa katapusan nga higayon ang Manunudlo sarang kuntani mag-isol. Apang wala Niya ini ginhimo. Nag-agi Sia sa idalom sang tanan nga mga butang agud mahimo Niya luwason ang tanan nga mga butang: ang katawhan, ang kalibutan, kag ang tanan nga kabuhi nga nagpuyo diri.
Wala sing mga pulong sa Cristohanon nga kalibutan na mas makahulugan sa akon sangsa ginpanghambal sang anghel sa nagahibi nga si Maria Magdalena kag ang isa pa ka Maria samtang nagapalapit sila sa lulubngan agud atipanon ang lawas sang ila Ginuo: “Ngaa bala nga ginapangita ninyo ang buhi sa tunga sang mga patay? Wala Sia diri, kundi nabanhaw” (Lucas 24:5–6).
Upod sining deklarasyon, yadtong mga nagkabuhi kag namatay na, yadtong mga nagakabuhi sa karon kag sa pila ka adlaw mapatay, kag yadtong mga matawo pa lang kag mamatay bag-o gid lang maluwas.
Bilang resulta sang kadalag-an ni Cristo batok sa kamatayon, tanan kita mabanhaw. Amo ini ang pagtubos sang kalag. Si Pablo nagsulat:
“May mga … lawas nga langitnon kag mga lawas nga dutan-on: apang ang himaya sang langitnon isa ka bagay, kag tuhay ang himaya sang dutan-on.
Tuhay ang himaya sang adlaw, kag tuhay ang himaya sang bulan, kag tuhay ang himaya sang mga bituon: kay ang isa ka bituon tuhay sa isa ka bituon sa himaya.
“Amo man ang pagkabanhaw” (1 Mga Taga-Corinto 15:40–42).
Amo ini ang Selestiyal nga kasanag nga aton ginapangita. Yari ini sa presensya sang Dios nga amo’ng aton ginahandum nga puy-an. Ini amo ang wala’y katapusan nga panimalay sa diin luyag kita nga mangin miyembro.
Sa Iya nga nagluwas sa aton gikan sa wala’y dulunan nga kamatayon, nagasaksi ako nga Sia isa ka manunudlo sang kamatuoran—apang labaw pa Sia sangsa isa ka manunudlo. Sia isa ka ehemplo sang perpekto nga kabuhi—apang labaw pa Sia sangsa isa ka ehemplo. Sia isa ka bantog nga manugbulong—apang labaw pa Sia sangsa isa ka manugbulong. Sia ang literal nga Manluluwas sang kalibutan, ang Anak sang Dios, Prinsipe sang Paghidaet, ang Balaan sang Israel, bisan pa ang nabanhaw nga Ginuo, nga nagsiling nga Sia ang una kag ang katapusan; nga Sia buhi, kag Sia ginpatay, kag sia ang aton mananabang sa Amay (tan-awa sa D&C 110:4).
Kalipay ko nga mahibal-an: ‘Buhi ang akon Manluluwas!’”2
Sa sini ako nagasaksi.
© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/10. Petsa sang pagtugot sa paglubad: 6/10. Linubad sang First Presidency Message, April 2011. Hiligaynon. 09764 861
Pagtudlo gikan sa Sining Mensahe
Ang maayong mga manunudlo nagapadasig sang paghiliusa sadtong ila mga ginatudloan. Kon ang mga tawo matinahuron nga nagapaambitanay sang ila mga ideya kag nagapamati sa isa kag isa, indi lamang sila makaangkon sang isa ka positibo nga kapalibutan sa pagtuon kundi mas mangin isa (tan-awa sa Teaching, No Greater Call [1999], 63). Ang paghiliusa magalambo sa tunga sadtong inyo ginatudloan kon kamo kag sila matinahuron nga nagapanaksihon sang Pagpasag-uli ni Jesucristo kag sang Iya Pagkabanhaw. Ining paghiliusa sarang makabulig sa mga panimalay sa pagsunod sa laygay ni Pangulong Monson nga mangin isa ka “wala’y katapusan nga panimalay.”