Mensahe sa Visiting Teaching, Abril 2011

Ang Katuyuan sang Relief Society

Tun-i ining materyal sing mainampuon kag, kon nagakabagay, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo mismo kabuhi.

Litrato

Pagtuo • Panimalay • Bulig

Sang ang amon panguluhan una nga gintawag, ginhatagan kami sing pila ka mga balasahon parte sa kasaysayan sang Relief Society. Mainampuon namon ini nga gintun-an, nga luyag mahibaloan ang katuyuan sang Relief Society kag kon ano ang luyag sang Ginuo nga amon himuon. Amon natun-an nga ang katuyuan sang Relief Society suno sa pagpasad sang Ginuo amo ang mag-organisar, magtudlo, kag magpapagsik sang Iya mga anak nga babayi agud ihanda sila para sa mga bugay sang wala’y katapusan nga kabuhi.

Agud matuman ining katuyuan sang Relief Society, ang Ginuo nagsugo sa tagsa ka sister kag sang organisasyon sa kabilugan sa:

Pagpatubo sang pagtuo kag personal nga pagkamatarong.

Pagpabakod sang mga panimalay kag mga puluy-an.

Paghatag sing bulig paagi sa pag-alagad sa Ginuo kag sa Iya Kabataan.

Sarang lamang naton mahimo ining buluhaton sa paagi sang Ginuo kon kita nagapangita, nagabaton kag nagatuman suno sa personal nga bugna. Kon wala sing personal nga bugna, indi kita magamadinalag-on. Kon mamati kita sa personal nga bugna, indi kita mapaslawan. Ang propetang si Nefi nagapanulin sa aton nga ang Balaan nga Espiritu magapakita sa aton sang “tanan nga mga butang nga dapat naton himuon” (2 Nefi 32:5). Dapat naton tugutan ang aton mga kaugalingon nga mangin malinong sing nagakaigo kag mahipos sing nagakaigo sa pagpamati sa tingug sang Espiritu.

Mga kauturan, may yara kita sing importante nga papel nga uyatan sa pagbulig patindog sang ginharian sang Dios kag sa paghanda sa pagkari sang Ginuo. Sa pagkamatuod, ang buluhaton sang Ginuo indi mahuman nga wala sing bulig sang Iya mga anak nga babayi. Bangud sina, ang Ginuo nagapaabot sa aton nga dugangan ang aton halad. Nagapaabot Sia nga pagatumanon naton ang katuyuan sang Relief Society subong nga wala pa gid natabo sadto.

Julie B. Beck, pangkabilugan nga pangulo sang Relief Society.

Gikan sa Balaan nga mga Kasulatan

Deuteronomio 6:5–7; Lucas 10:30–37; Santiago 1:27; 2 Nefi 25:26; Mosias 3:12–13

Gikan sa Aton Kasaysayan

Sang Hunyo 9, 1842, nga miting sang Relief Society, ang Propetang Joseph Smith nagpanudlo sa mga sisters nga ang ila katilingban “indi lamang magabulig sa imol, kundi magaluwas sang mga kalag.”¹ Ining deklarasyon sang isa ka espirituhanon subong man isa ka temporal nga katuyuan nagpakilala sang Relief Society sa bug-os nga kasaysayan sini. Sang 1906 si Pangulong Joseph F. Smith (1838–1918) nagtudlo: “Ang [Relief Society] indi lamang ang mag-atipan sang mga kinahanglanon sang mga imol, sang nagamasakit kag nagakinahanglan, kundi kabahin sang iya sini obligasyon—kag ang mas dako nga bahin—amo ang mag-atipan sang espirituhanon nga kaayuhan kag kaluwasan sang mga iloy kag mga anak nga babayi sang Sion; sa pagsiguro nga wala sing mapabayaan, kundi nga ang tanan mabantayan batok sa kadimalasan, kalamidad, sa mga gahum sang kadulom, kag sa mga kalainan nga nagahangkat sa ila sa kalibutan.”² Sang 2001 si Elder M. Russell Ballard sang Napulo’g Duha ka mga Apostoles liwat nga nagsiling, “Ang tagsa ka sister sa sining Simbahan nga naghimo sang mga kasugtanan sa Ginuo may diosnon nga mando sa pagbulig luwas sang mga kalag, sa paggiya sang kababayin-an sang kalibutan, sa pagpabakod sang mga puluy-an sang Sion, kag sa pagpasad sang ginharian sang Dios.³

© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/10. Petsa sang pagtugot sa paglubad: 6/10. Linubad sang Visiting Teaching Message, April 2011. Hiligaynon. 09764 861

Ano ang Sarang Ko Mahimo?

Ano nga inspirasyon ang akon nabaton agud mabuligan ang akon mga kauturan nga babayi nga magdugang sa pagtuo kag personal nga pagkamatarong kag mapabakod ang ila mga panimalay kag mga puluy-an? Ano nga bulig ang akon sarang mahatag?
Paano ko magamit ining mensahe nga magpabakod sang akon pagtuo kag magdugang sang akon kaugalingon nga obligasyon sa personal nga pagkamatarong?