Mensahe ti Umuna a Panguluen, Abril 2011
Awan Ditoy, no Di ket Nagungaren
Ita nga agdama, dagiti laeng narba a pasdek ti natda iti Capernaum, dayta a siudad iti igid ti baybay, a sentro ti panagserbi ti Mangisalakan iti Galilea. Ditoy, nangasaba Isuna iti sinagoga, nangisuro iti igid ti baybay, ken nangagas kadagiti pagtaengan.
Iti rugi ti panagserbina iti daga, inadaw ni Jesus ti binatog manipud iti Isaias: “Ti Espiritu ti Apo a Dios adda kaniak; ta ti Apo pinulotannak a mangikasaba kadagiti naimbag a damdamag kadagiti naemma; imbaonnak a mamatapat iti puso a nadunor, a mangiwaragawag iti wayawaya kadagiti nakayawan, ken ti pannakalukat kadagiti nabalud” (Isaias 61:1; kitaen met iti Lucas 4:18)—nalawag a pannakaiwaragawag iti nadiosan a plano tapno mangispal kadagiti annak a babbai ken lallaki ti Dios.
Ngem ti panangasaba ni Jesus iti Galilea ket panangirugi laeng. Ti Anak ti Dios ket kanayon a naaddaan iti nakaam-amak a lugar a pagtataripnongan a napagtalinaed iti maysa a turod a managan iti Golgota.
Natiliw iti Minuyongan ti Getsemane kalpasan iti Maudi a Panangrabii, pinanawan dagiti disipulona, natupraan, nasubok, ken naibabain, ni Jesus ket inkarigatanna ti nagna gapu iti baklayna a dakkel a krus a nagturong iti Kalbario. Dimmur-as manipud iti panagballigina iti pannakaliput, nakaro a pannakaparparigat, ken ipapatay iti krus.
Kadagiti balikas ti kanta a “Ti Nasantuan a Siudad”:
Nabaliwan ti buya. …
Nalam-ek ken makapigerger ti agsapa,
Iti itatakder ti anniniwan ti krus
Iti rabaw ti naliday a turod.1
Para kadatayo inted ti Nailangitan nga Ama ti Anakna. Para kadatayo ti Inauna a Kabsattayo ket intedna ti biagna.
Iti maudi a kanito mabalin koma ti Maestro a babawyen. Ngem dina inaramid. Pinagdaananna ti baba ti amin a banag tapno maisalakanna ti amin a banag: ti puli ti sangkataw-an, ti daga, ken amin a biag a nagnaed ditoy.
Awan dagiti balikas iti Nakristianuan a Lubong ti napatpateg pay kaniak ngem dagiti insao ti anghel iti agsangsangit a Maria Magdalena ken ti sabali pay a Maria bayat ti yaasidegda iti tanem tapno asikasuenda ti bagi ti Apoda: “Apay-apay sapulenyo kadagiti natay ti sibibiag? Awan ditoy, no di ket nagungaren” (Lucas 24:5–6).
Gapu iti daytoy a waragawag, naisalakanen dagiti nagbiag ken natayen, dagiti agbibiag ita ken matayto iti maysa nga aldaw, ken dagiti mayanak ken matayto pay laeng.
Kas bunga ti balligi ni Cristo iti tanem, agungartayonto amin. Daytoy ti pannakasubbot ti kararua. Insurat ni Pablo:
“Adda met … bagbagi a nailangitan, ken bagbagi a naindagaan: ngem maysa ti dayag dagiti nailangitan, ket sabali ti dayag dagiti naindagaan.
“Maysa ti dayag ti init, ket sabali ti dayag ti bulan, ket sabali ti dayag dagiti bitbituen: ta ti maysa a bituen maisupadi ti dayagna iti sabali.
“Kasta met ti panagungar dagiti natay” (1 Taga-Corinto 15:40–42).
Daytoy a dayag a nailangitan ti sapulentayo. Iti sidong ti Dios ti tarigagayantayo a pagnaedan. Daytoy nga agnanayon a kaamaan a kayattayo a pagkamengan.
Kenkuana a nangispal iti tunggal maysa kadatayo manipud iti awan patinggana nga ipapatay, paneknekak nga Isu ket mannursuro iti kinapudno—ngem ad-adda pay Isuna ngem iti maysa a mannursuro. Isu ti pagwadan ti naan-anay a biag—ngem ad-adda pay Isuna ngem iti maysa a pagwadan. Isu ti naindaklan a mangngagas—ngem ad-adda pay Isuna ngem iti maysa a mangngagas. Isu ti pudno a Mangisalakan iti lubong, ti Anak ti Dios, ti Prinsipe ti Kappia, ti Nasantuan ti Israel, ti nagungar nga Apo, a nangipakdaar, “Siak ti umuna ken maudi; Siak ti nagbiag, Siak ti napapatay; Siak ti mangibabaet kadakayo iti Ama” (DkK 110:4).
“Oh, anian a nagsam-it ti rag-o nga ited daytoy a binatog: ‘Ammok nabiag Mannubbotko!’”2
Iti daytoy paneknekak.
© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti First Presidency Message, April 2011. Ilokano. 09764 864
Panangisuro manipud iti Daytoy a Mensahe
Dagiti nalaing a mannursuro ket yallukoyda ti panagkaykaysa kadagiti suruanda. Bayat ti panangiburay dagiti tao kadagiti panniriganda ken dumngeg a siraraem iti tunggal maysa, saanda laeng a makasagrap iti nasayaat nga aglawlaw iti panagsursuro ngem ketdi agbalinda pay nga ad-adda a nakaykaysa (kitaen iti Teaching, No Greater Call [1999], 63). Dumur-as ti panagkaykaysa kadagiti sursuruanyo bayat ti narukbab a panangiburayyo ken panangiburayda iti pammaneknek iti Pannubbot ni Jesucristo ken ti Panagungarna. Daytoy a panagkaykaysa ket makatulong kadagiti kaamaan a mangsurot iti pammagbaga ni Presidente Monson nga agbalin nga “agnanayon a kaamaan.”