Mensahe iti Visiting Teaching, Abril 2011

Ti Panggep ti Relief Society

Sikakararag nga adalenyo daytoy a material ken, no maitutop, paglilinnawaganyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Ladawan

Pammati • Pamilia • Tulong

Idi damo a maawagan ti panguluenmi, naikkankami iti sumagmamano a pagadawan maipanggep iti pakasaritaan iti Relief Society. Sikakararag nga inadalmi dagitoy, a nagtarigagay a mangammo ti panggep ti Relief Society ken no ania ti kayat ti Apo nga aramidenmi. Nasursuromi a ti panggep ti Relief Society kas impasdek ti Apo ket mangbukel, mangisuro, ken mangparegta kadagiti annakna a babbai tapno maisaganada para kadagiti bendision ti agnanayon a biag.

Tapno matungpal daytoy a panggep ti Relief Society, inawagan ti Apo iti tunggal kabsat a babai ken ti organisasion a kas sibubukel tapno:

Mangpadur-as iti pammati ken bukod a kinalinteg

Mangpapigsa kadagiti kaamaan ken pagtaengan.

Mangipaay iti tulong babaen iti panagserbi iti Apo ken kadagiti annakna.

Maaramidtayo laeng daytoy nga aramid iti wagas ti Apo no sapulen, awaten ken agtignaytayo babaen iti bukod a paltiing. No awan ti bukod a paltiing, saantayo nga agballigi. No dumgegtayo iti bukod a paltiing, saantayo a mapaay. Isursuro kadatayo ni propeta Nephi a ti Espiritu Santo ti mangipakitanto kadatayo “ti amin a banag a rumbeng nga aramiden[tayo]” (2 Nephi 32:5). Nasken a palugodantayo ti bagbagitayo nga agbalin a natalna ken naulimek a dumngeg iti timek ti Espiritu.

Kakabsat, addaantayo iti napateg nga akem nga aramiden iti itutulong a mangbangon iti pagarian ti Dios ken panagsagana para iti yaay ti Apo. Kinapudnona, saan a maileppas ti aramid ti Apo nga awan ti tulong dagiti annakna a babbai. Gapu iti dayta, namnamaennatayo ti Apo a nayonantayo ti datontayo. Namnamaennatayo a mangipatungpal iti panggep ti Relief Society a kas iti di kaano man idi.

Ni Julie B. Beck, sapasap a presidente ti Relief Society.

Manipud kadagiti Nasantuan a Kasuratan

Deuteronomio 6:5–7; Lucas 10:30–37; Santiago 1:27; 2 Nephi 25:26; Mosiah 3:12–13

Manipud iti Pakasaritaantayo

Idi Hunio 9, 1842, miting ti Relief Society, insuro ni Propeta Joseph Smith kadagiti kakabsat a babbai a ti gimongda ket “saan laeng a tumulong kadagiti nakurapay, ngem ketdi mangisalakan kadagiti kararua.”¹ Daytoy a palawag nga addaan iti naespirituan kasta met iti naindagaan a panggep ket nangiladawan iti Relief Society iti intero a pakasaritaanna. Idi 1906 insuro ni Presidente Joseph F. Smith (1838–1918): “[Ti Relief Society] ket saan laeng a mainaig kadagiti kasapulan dagiti nakurapay, dagiti masakit ken dagiti agkasapulan, ngem paset ti pagrebbenganna—ken ti dakdakkel pay a paset—ti mangkita iti naespirituan a pagimbagan ken pannakaisalakan dagiti inna ken annak a babbai ti Zion; mangkita nga awan ti mabaybay-an, ngem ketdi amin ket mabantayan manipud iti kinadaksanggasat, kalamidad, dagiti bileg ti kinasipnget, ken dagiti dakes a mangdadael kadakuada iti lubong.”² Idi 2001 inulit nga imbaga ni Elder M. Russell Ballard iti Korum dagiti Sangapulo-ket-dua nga Apostol, “Tunggal kabsat a babai iti daytoy a Simbaan a nangaramid iti katulagan iti Apo ket addaan iti nadiosan a bilin a tumulong a mangisalakan kadagiti kararua, mangidaulo kadagiti babbai iti lubong, mangpapigsa kadagiti pagtaengan ti Zion, ken mangbangon iti pagarian ti Dios.”³

© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti Visiting Teaching Message, April 2011. Ilokano. 09764 864

Ania ti Maaramidko?

Ania a pammaregta ti naawatko tapno tumulong kadagiti kakabsatko a babbai a dumur-as iti pammati ken bukod a kinalinteg ken mapapigsa dagiti kaamaan ken pagtaenganda? Ania a tulong ti maipaayko?
Kasano a mausarkonto daytoy a mensahe tapno mapapigsa ti pammatik ken manayonan ti bukodko a panagkumit iti bukod a kinalinteg?