2011
Srihpac luhn U luhn Muhtwacn in Kahsruh
April 2011

Pweng ke Forfor Luti, Eprel 2011

Srihpac luhn U luhn Muhtwacn in Kahsruh

Lutlutkihn kuhfa inge, ac ke pacl fal, sramsramkihn yurin tahmtahel ma kom muhtwacta nuh yohroh an. Orekmakihn kihsen siyuck an in kahsrwe kom ahkkweye tahmtahel wiyom an ac in orwaclah ip fokoko se ke U luhn Muhtwacn in Kahsruh ke moul lom sifacna an.

Luhlahlfongi • Sucu • Kahsruh

Ke pacl se prestuhnsi se met lasr pahngyak ah, utuckuh nuh sesr kuhtuh mwe kahsruh ke sramsram mahtuh ke U luhn Muhtwacn in Kahsruh. Kuht lutlutkihn ke pruhekihnyac, kena etuh srihpac luhn U luhn Muhtwacn in Kahsruh uh ac ke ma Leum El ac use nuh sesr in oruh uh. Kuht lotwelah lah srihpac luhn U luhn Muhtwacn in Kahsruh uh oreklac sin Leum in akiyac, luti, ac moklwe tuhlihk muhtwacn Nahtuhl uh in ahkweloslac nuh ke mwe insewowo luhn moul ma pahtpaht.

In ahkfalyelah srihpac se luhn U luhn Muhtwacn in Kahsruh uh, Leum El kunweyac kais sie tahmtahel ac u se in ma sefanna in:

  1. Ahkyohkye luhlahlfongi kuh ac suwohswohs luhn kais sie.

  2. Ahkkweye sucu uh ac yen in muhta uh.

  3. Sang kahsruh in kuhlwacnsapuh Leum ac tuhlihk Nahtuhl.

Kuht kuh in oruh orekma se inge ke inkacnek luhn Leum ke pacl kuht suk, eis, ac oruh ke mwe fahkwack luhn kais sie uh muhkwena. Fin tiac ke mwe fahkwack luhn kais sie, kuht tiac kuh in orwaclah wo. Kuht fin ukwe mwe fahkwack luhn kais sie uh, kuht tiac kuh in muhnahslah. Mwet Pahluh Nephi el ahkuhtweyac nuh sesr lah Nguhn Muhtahl El ac ahkkahlwemye nuh sesr “ma nuh kwewa ma [kuht] enenuh in oruh uh” (2 Nephi 32:5). Kuht enenuh in lwelah nuh sesr in oruh in okwak ac mislac fal in lihpsre puhsren Nguhn.

Tahmtahel, oasr kunohkohn na yohk se nuh sesr in kahsruh muhsahi Tohkohsrahi luhn God ac ahkolah nuh ke tuhkuh luhn Leum. Ke ma pwacye uh, orekma luhn Leum uh tiac kuh in ahkfalyeyucklac fin wacngihn kahsruh luhn tuhlihk muhtwacn Nahtuhl uh. Ke srihpac sacn, Leum El tuhpan kuht in ahkyohkye mwe kihsac lasr uh. El tuhpan kuht in ahkfalye srihpac luhn U luhn Muhtwacn in Kahsruh suc ma wacngihn met.

Julie B. Beck, prestuhn luhlahp ke U luhn Muhtwacn in Kahsruh.

Ke Ma Suhmuhslah uh

Deuteronomy 6:5–7; Luk 10:30–37; James 1:27; 2 Nephi 25:26; Mosiah 3:12–13

Ke Ma Mahtuh Lasr

Ke Jun 9,1842, miting luhn U luhn Muhtwacn in Kahsruh, Mwet Pahluh Joseph Smith el luti tahmtahel uh lah u lalos uh pa “tiac mwe kahsruh mwet suhkahsruhp uh muhkwena, tuhsruhktuh in molwelah nguhna uh.”1 Pohloh fahk soko ke srihpac ke ip luhn nguhn ac oacyacpac mahno fahkwack ohiyen U luhn Muhtwacn in Kahsruh uh nwe mihsenge. Ke 1906 Prestuhn Joseph F. Smith (1838–1918) el luti: “[U luhn Muhtwacn in Kahsruh] tiac ma in fosrngahkihn enenuh luhn mwet suhkahsruhp, mwet mas ac mwet yohk enenuh la, tuhsruhk sie ip ke ma kunaclos — ac ip se ma yohk emet uh, pac — pa in suk in wo ke ip luhn nguhn ac molwelah luhn ninac ac tahmtahel nuhtin Saion; in liye lah wacngihn selos tiac karihngihnyuck, tuhsruhktuh ma nuh kwewa in karihngihnyuck liki ongaiac, mwe kweok, kuh luhn lohsr, ac ma koluk suc lokwalok nuh selos fin facluh.”2 Ke 2001 Elder M. Russell Ballard ke U luhn Mwet Sap Singucul Luo kalweni in fahk, “Muhtwacn nuh kwewa ke Alu se inge uh suc orwaclah olwelah nuh sin Leum uh oasr kuh muhtahl lalos in kahsruh molwelah nguhna uh, in kol muhtwacn fin facluh, in ahkkweye lom sin Saion, ac in muhsahi tohkohsrahi luhn God.”3

Mwe kahsruh

  1. Joseph Smith, ke History of the Church, 5:25.

  2. Teachings of Presidents of the Church: Joseph F. Smith (1998), 185.

  3. M. Russell Ballard, “Muhtwacn luhn Ma Suwohswohs,” Liahona, Tisacmpuh 2002, 39.

© 2011 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/10. Ahkkweyeyucklac ke lweng: 6/10. Lwenglah luhn Visiting Teaching Message, Eprel 2011. Kosraean. 09764 868

Meac Nga Kuh in Oruh uh?

  1. Kahlwem fuhkah nga eis in sang kahsruh tahmtahel wiyuck uh ahkyohkye luhlahlfongi kuh ac suwohwohs luhn kais sie ac ahkkweye sucu lalos ac lohm selos uh? Kahsruh fuhkah nga kuh in sang uh?

  2. Nga ac orekmakihn fuhkah pweng se inge in ahkkweye luhlahlfongi kuh luhk ac ahkyohkye kwacfe luhk sifacna ke suwohswohs luhn kais sie?