Dagiti Gundaway tapno Agaramid iti Naimbag
Ti wagas ti Apo a pakatulongan kadagitay temporal nga agkasapulan ket maidawat kadagiti tao a gapu iti ayat ket kinonsagrarda ti bagbagida ken ti no ania ti adda kadakuada iti Dios ken iti aramidna.
Ay-ayatek a kakabsatko, ti panggep ti mensahek ket tapno dayawen ken rambakan ti no ania ti inaramiden ken ar-aramiden ti Apo tapno agserbi kadagiti napanglaw ken agkasapulan kadagiti annakna iti rabaw ti daga. Ay-ayatenna dagiti annakna nga agkasapulan ken kasta met dagiti agtarigagay a tumulong. Ken nagpartuat kadagiti wagas a pakabendisionan nga agpada dagitay agkasapulan iti tulong ken dagiti mangtedto iti daytoy.
Denggen ti Nailangitan nga Amatayo dagiti kararag dagiti annakna iti sapasap a lubong nga umar-araraw iti taraon a makan, luplupot a pangabbong kadagiti bagida, ken dignidad a sumangbay manipud iti pannakabael a mangipaay iti kasapulan para iti bagbagida. Dagita nga araraw ket dimmanonen Kenkuana manipud pay idi impanna dagiti lallaki ken babbai iti rabaw ti daga.
Maammuanyo dagita a kasapulan iti lugar a pagnaedanyo ken manipud iti sapasap ti lubong. Masansan a maaringan ti pusom kadagiti rikna a manangngaasi. No maam-ammom ti maysa a tao a mangikarkarigatan nga agsapul iti pagtrabahuanna, mariknam dayta a tariggay a tumulong. Mariknam daytoy no mapanka iti pagtaengan ti maysa a balo a babai ket makitam nga awan ti kanenna. Mariknam daytoy no makitam dagiti ladawan dagiti agsangsangit nga ubbing a nakatugaw kadagiti rebba ti pagtaenganda a dinadael ti gingin-ed wenno uram.
Gapu ta dengdenggen ti Apo dagiti ararawda ken mariknana ti nalaus a panangngaasiyo kadakuada, manipud pay iti punganay ti panawen ket nangipaayen Isuna kadagiti wagas tapno makatulong dagiti disipulona. Inawisna dagiti annakna a mangted-pateg wenno mangkonsagrar iti panawenda, iti kinabaknangda, ken iti bagbagida tapno makikaysa Kenkuana iti panagserbi kadagiti dadduma.
Ti wagas ti panagtulongna no dadduma ket maawagan iti panagtungpal iti linteg ti pannangted-pateg wenno panagkonsangrar. Iti sabali pay a panawen ti wagasna ket naawagan iti sangsangkamaysa a timpuyog. Iti panawentayo maawagan daytoy iti programa ti welfare ti Simbaan.
Nabalbaliwan dagiti nagan ken detalye ti pannakaipagna tapno maitunos kadagiti kasapulan ken kasasaad dagiti tao. Ngem kanayon a ti wagas ti Apo a pakatulongan kadagiti temporal nga agkasapulan ket maidawat kadagiti tao a gapu iti ayat ket inkonsagrarda ti bagbagida ken ti no ania ti adda kadakuada iti Dios ken iti aramidna.
Inawis ken binilinnatayo a makiraman iti aramidna a mangitag-ay kadagiti agkasapulan. Agaramidtayo iti katulagan nga aramidentayo dayta kadagiti danum ti panagbuniag ken kadagiti nasantuan a templo ti Dios. Pabaruentayo ti katulagan kadagiti Domingo no makiranudtayo iti sakramento.
Ti panggepko ita ket mangilawlawag iti sumagmamano a gundaway nga impaayna kadatayo tapno makatulong kadagiti dadduma pay nga agkasapulan. Diak makapagsao maipapan kadakuada amin iti ababa nga oras a panagkakaduatayo. Namnamaek a pabaruen ken papigsaenyo ti panagkumityo nga agtignay.
Adda maysa a himno maipapan iti awis ti Apo iti daytoy nga aramid a kankantaek manipud pay idi bassitak. Iti kinaubingko ad-adda nga ikaskasok ti naragsak a tono ngem ti bileg dagiti balikas. Ikararagko ta sapay koma ta mariknayonto dagiti balikas ti kanta iti puspusoyo ita nga agdama. Denggentayo manen dagiti balikas:
Nagaramidak kad’ naimbag ita?
Natulongak kad’ makasapul?
Pinaragsak ko kad’ maysa a naliday?
No saan ket napaayak.
Limmag-an kad’ awit maysa ita
Gapu ta naayat a nangtedak?
Natulongan kad’ masakit ken nakapuy?
No masapuldat’ tulong addaak?
Agaramid ‘ti ad-adda pay
Ngem ‘ti balay iti ngato.
Naragsak tumulong, rag-o di marukod,
Parabur ti panagayat.1
Masansan nga ipatulod ti Dios dagiti pangriing nga awag iti amin kadatayo. No dadduma mabalin a kellaat a rikna ti panangngaasi iti maysa a tao nga agkasapulan. Mabalin a narikna ti maysa nga ama daytoy idi nakitana ti maysa nga ubing a natnag ket nadunor ti tumengna. Mabalin a narikna ti maysa nga ina daytoy idi mangngeganna ti napabutngan a sangit ti anakna iti rabii. Mabalin a narikna ti maysa nga anak a lalaki wenno anak a babai ti panangngaasi iti maysa a tao a kasla naliday wenno mabuteng iti eskuela.
Nasagidtayo amin iti rikna ti panangngaasi kadagiti dadduma a saantayo pay a kaam-ammo. Kas pagarigan, no nangngeganyo dagiti damag maipapan kadagiti dalluyon a nagpallong iti labes ti Pasipiko kalpasan ti gingin-ed iti Japan, nariknayo ti pannakaseknan kadagiti mabalin a nadangran.
Rimsua dagiti rikna ti panangngaasi iti rinibribu kadakayo a nakadamag maipapan iti panaglayus iti Queensland, Australia. Ti report ti nadadael ket mapattapata no mano a tao ti agkasapulan iti tulong. Ngem adu kadakayo ti nakarikna iti saem dagiti tao. Nasungbatan dagiti pangriing nga awag ti 1,500 wenno ad-adu pay a miembro ti Simbaan a nagboluntario iti Australia nga immay tapno tumulong ken mangliwliwa.
Sinukatanda dagiti riknada a panangngaasi iti maysa a pangngeddeng nga agtignay kadagiti katulagan nga inaramidda iti Dios. Nakitakon dagiti bendision a sumangbay iti tao nga agkasapulan nga umaw-awat iti tulong ken iti tao a mangala iti gundaway a mangted iti tulong.
Makita dagiti masirib a nagannak iti tunggal kasapulan dagiti dadduma ti maysa a wagas a pakaisangbayan dagiti parabur iti biag dagiti annakda a lallaki ken annakda a babbai. Itay kallabes nakaiggem ti tallo nga ubbing kadagiti pagikkan a naglaon iti naimas a pangrabii nga immay iti sango a ridawmi. Ammo dagiti nagannak kadakuada a kasapulanmi ti tulong, ket inramanda dagiti annakda iti gundaway a makapagserbida kadakami.
Pinaraburan dagiti nagannak ti pamiliami babaen iti manangipaay a serbisioda. Babaen ti pilida a nangpalubos kadagiti annakda a makiraman iti pannangted, indanonda dagiti bendisionda kadagiti masakbayan nga appokoda. Dagiti isem dagiti annak idi pumanawda iti pagtaenganmi ket nangpatalek kaniak a mapasamakto. Ibagadanto kadagiti annakda maipapan iti rag-o a nariknada iti pannangted a sikakaasi iti serbisio para iti Apo. Malagipko dayta a rikna ti naulimek a pannakapnek manipud iti kinaubing bayat ti panagparutko kadagiti ruot ti kaarrubami iti kiddaw ti amak. Iti kanito a maawisak a mangted, malagipko ken patiek dagiti balikas ti kanta a “Sweet is the work, my God, my King.”2
Ammok a naisurat dagita a balikas ti kanta tapno mangiladawan iti rag-o a sumangbay manipud iti panagrukbab iti Apo iti Sabbath. Ngem dagita nga ubbing a nangted iti taraon iti ridawmi ket nakarikna iti rag-o ti panangaramid iti aramid ti Apo. Ket nakita dagiti nagannak kadakuada ti gundaway nga agaramid iti naimbag ken mangisaknap iti rag-o kadagiti kaputotan.
Ti wagas ti Apo iti panangaywan kadagiti agkasapulan ket mangipaay iti sabali pay a gundaway para kadagiti nagannak tapno mangparabur kadagiti annakda. Nakitak daytoy iti maysa a kapilia iti maysa a Domingo. Inyawat ti maysa a bassit nga ubing iti bishop ti sobre ti donasion ti pamiliana bayat ti iseserrekna iti kapilia sakbay ti miting ti sakramento.
Am-ammok ti pamilia ken ti ubing a lalaki. Kadamdamag laeng ti pamilia maipapan iti maysa a tao iti ward nga agkasapulan iti tulong. Adda imbaga ti ama a kastoy iti ubing bayat ti panangikabilna iti nawadwadwad pay a daton iti panagayuno ngem iti sigud iti uneg ti sobre: “Nagayunotayo ita ken inkararagantayo dagiti agkasapulan. Inka man ited daytoy a sobre iti bishop para kadatayo. Ammok nga itednanto a pangtulong kadagitay makasapul iti ad-adu pay a tulong ngem datayo.”
Imbes dagiti ania man a kiraos ti bisin iti dayta a Domingo, malagipto ti ubing iti dayta nga aldaw nga addaan iti nabara a rikna ti kinaragsak. Maibagak manipud iti isemna ken ti wagas a panangiggemna a nasayaat unay iti sobre a nakariknaanna iti dakkel a panagtalek ti amana tapno iggamanna ti daton ti pamilia nga agpaay kadagiti napanglaw. Malagipnanto dayta nga aldaw no agbalinto isuna a maysa a deacon ken nalabit nga agnanayon.
Nakitak ti kasta met la a ragsak iti rupa dagiti tao a timmulong para iti Apo iti Idaho sumagmamanon a tawen ti napalabas. Bimtak ti Teton Dam iti Sabado, Hunio 5, 1976. Natay ti sangapulo-ket-maysa a tao. Nasken a pumanaw ti rinibu a tattao iti pagtaenganda iti sumagmamano nga oras. Nayanud ti sumagmamano a pagtaengan. Ken ginasgasut dagiti pagtaengan ti mabalin a pagindegan laeng babaen ti aramid a panagkagumaan ken pamay-an nga adayo iti labes ti pagtaengan dagiti akinkukua.
Nakarikna iti panangngaasi dagiti nakangngeg maipapan iti trahedia, ken narikna ti sumagmamano ti awag nga agaramidda iti nasayaat. Dagiti kaarruba, bishop, presidente ti Relief Society, lider ti korum, home teacher, ken visiting teacher ket pinanawanda dagiti pagtaengan ken trabahoda tapno agdalus kadagiti nalayus a balay dagiti dadduma.
Nagsubli ti maysa nga agassawa iti Rexburg manipud iti bakasion kalpasan laeng ti layus. Saanda a napan kinita ti bukodda a balay. Ngem ketdi, sinapulda ti bishopda tapno damagenda no sadino ti mabalin a pakatulonganda. Imbaonna ida iti maysa a pamilia nga agkasapulan.
Kalpasan ti sumagmamano nga aldaw napanda kinita ti pagtaenganda. Awanen daytoy ta inanud ti layus. Nagsublida iti bishop ket sinaludsodda, “Ita ania ti kayatmo a paaramid kadakami?”
Sadino man ti pagnaedanyo, nakitayon a nabalbaliwan dayta a milagro ti pannakipagrikna iti saan a managimbubukod a tignay. Mabalin a saan nga iti bunga ti dakkel a gagangay a didigra. Nakitakon daytoy iti maysa a korum ti priesthood a nagtakderan ti maysa a kabsat a lalaki tapno mangiladawan kadagiti kasapulan ti maysa a tao nga agkalikagum iti gundaway a makapagtrabaho tapno matulonganna ti bagina ken ti pamiliana. Mariknak ti panangngaasi iti siled, ngem sumagmamano ti nangisingasing iti nagnagan dagiti tao a mabalin a mangted trabaho iti tao nga agkasapulan iti trabaho.
No ania ti napasamak iti dayta a korum ti priesthood ken no ania ti napasamak kadagiti nalayus a balay iti Idaho ket maysa a panangiparangarang iti wagas ti Apo a pakatulongan kadagiti agkasapulan unay nga agbalinda a managpannuray iti bukodda a kabaelan. Mariknatayo ti panangngaasi, ken ammotayo no kasano ti agtignay iti wagas ti Apo tapno tumulong.
Rambakantayo ti maika-75 nga anibersario ti programa ti welfare ti Simbaan iti daytoy a tawen. Nangrugi daytoy a nangipaay iti kasapulan dagiti naawanan iti trabaho, talon ken uray pay pagtaengan kas bunga ti nagbalinen a maam-ammo a Nakaro a Panagrigat.
Dagiti naindaklan a temporal a kasapulan dagiti annak ti Nailangitan nga Ama ket dimteng manen iti panawentayo kas iti adda kadakuada ken addanto kadakuada iti amin a panawen. Dagiti pagbatayan iti pundasion ti programa ti welfare ti Simbaan ket saan a para laeng iti maysa a panawen wenno maysa a lugar. Para dagitoy iti amin a panawen ken amin a lugar.
Naespirituan ken agnanayon dagidiay a pagbatayan. Gapu iti dayta, ti pannakaawat kadagitoy ken panangikabil kadagitoy iti puspusotayo ket mangpabalinto kadatayo a mangkita ken mangala kadagiti gundaway a makatulong kaano ken sadino man ti pangawisan ti Apo kadatayo.
Dagitoy ti sumagmamano a pagbatayan a nangtarabay kaniak idi tinarigagayak ti tumulong iti wagas ti Apo ken idi tinulongandak dagiti dadduma.
Umuna, naragragsak ti amin a tao ken mariknada ti panagdayaw iti bagida no makaipaayda iti kasapulan ti bagbagida ken dagiti pamiliada ket kalpasanna tumulongda a mangaywan kadagiti dadduma pay. Agyamyamanak kadagiti timmulong kaniak a nangipaay kadagiti kasapulak. Ad-adda pay nga agyamanak iti adu a tawen kadagiti timmulong kaniak nga agbalin a mapagpannuray iti bukodko a kabaelan. Ket kalpasanna agyamanak unay unay kadagiti nangipakita kaniak no kasano nga usaren ti sumagmamano a sobra a kukuak a pangtulong kadagiti sabali.
Nasursurok a ti wagas a pannakaadda iti sobra a kukua ket ti agbusbos iti basbassit ngem iti matgedak. Babaen ti dayta sobra a kukua nasursurok a talaga a nasaysayaat ti mangted ngem ti umawat. Dayta ket gapuna a no mangtedtayo iti tulong iti wagas ti Apo, paraburannatayo.
Kinuna ni Presidente Marion G. Romney maipapan iti aramid ti welfare, “Saanka a mangted iti adu unay tapno agbalinka mismo a marigrigat.” Ket kalpasanna inadawna ti sao ti mission presidentna, a ni Melvin J. Ballard, iti kastoy: “Saan a makaited ti maysa a tao iti maysa a banag a bassit iti Apo no awan Isuna a mangmangted iti dayta a tao kadagiti parabur a kas supapak.”3
Natakuatak a pimmudno dayta iti biagko. No managparaburak kadagiti annak ti Nailangitan nga Ama nga agkasapulan, Isu ket managparabur met kaniak.
Ti maikadua a pagbatayan ti ebanghelio a nagbalinen a tarabay kaniak iti aramid ti welfare ket ti bileg ken bendision ti panagkaykaysa. No agtitinnulongtayo nga agserbi kadagiti tao nga agkasapulan, pagkaykaysaen ti Apo dagiti puspusotayo. Ni Presidente J. Reuben Clark Jr. dinakamatna daytoy iti kastoy a wagas: “Nalabit a ti pannangted iti serbisio ket kangrunaan a nangisangbay iti rikna ti nagkaykaysa a panagkikinnabsatan gapu ta nagtitinnulong a nagtrabaho iti proyekto ti Welfare dagiti lallaki a sabasabali ti pagsanayan ken pagtrabahuanda.”4
Dayta a napadakkel a rikna ti panagkikinnabsatan ket pudno para iti umaw-awat kasta met iti mangmangted. Iti daytoy nga aldaw, ti lalaki a katinnulongko a nagpala iti pitak iti nalayus a pagtaengan iti Rexburg ket mariknana a naibegkes kaniak. Ken mariknana ti dakdakkel a bukod a dignidad gapu iti panangaramidna iti amin a kabaelanna para iti bagina ken para iti pamiliana. No nagtrabahokami a maymaysa, agpadakami koma a nakapukaw iti naespirituan a parabur.
Mangiturong dayta iti maikatlo a pagbatayan ti tignay iti aramid ti welfare para kaniak: Yasidegmo ti pamiliam iti pannakitinnulong iti trabaho kenka tapno masursuroda nga aywanan ti tunggal maysa kas iti panangaywanda kadagiti sabali. Dagiti annakmo a makipagtrabaho kenka nga agserbi kadagiti dadduma pay nga agkasapulan ket ad-addanto nga agtitinnulongda iti tunggal maysa no agkasapulanda.
Ti maikapat a napateg a pagbatayan ti welfare ti Simbaan a nasursurok idi maysaak pay a bishop. Dimteng daytoy manipud iti panangsurotko iti bilin iti nasantuan a kasuratan a biroken dagiti napanglaw. Pagrebbengan ti bishop a biroken ken ipaayan iti tulong dagiti agkasapulan iti tulong kalpasan ti amin a kabaelanda nga aramiden ken dagiti pamiliada. Natakuatak nga ibaon ti Apo ti Espiritu Santo a mangaramid a mabalin daytoy tapno “sapulem, ket masarakamto”5 iti panangaywan kadagiti napanglaw kas iti ar-aramiden ti Apo iti panangsarak iti kinapudno. Ngem nasursurok pay nga iramanko ti presidente ti Relief Society iti panagsapul. Mabalin a naalanan ti paltiing sakbay nga aramidem.
Sumagmamano kadakayo ti agkasapulanto iti dayta a pammaregta kadagiti umay a bulan. Iti panangrambak iti maika-75 nga anibersario ti programa iti welfare ti Simbaan, maawisto dagiti miembro iti intero a sangalubongan tapno makiraman iti maysa nga aldaw ti serbisio. Agkiddawto dagiti dadaulo ken miembro iti paltiing bayat ti panangplanoda kadagiti ania man a proyektonto.
Mangisingasingak iti tallo bayat ti panangplanoyo iti proyektoyo iti serbisio.
Umuna, isaganam ti bagim ken dagiti naespirituan nga idauluam. No laeng mapalukneng ti Pannubbot ti Mangisalakan dagiti puso a mabalinmo a kitaen a silalawag ti panggep a tun-oyen ti proyekto kas bendision a naespirituan ken temporal iti biag dagiti annak ti Nailangitan nga Ama.
Ti maikadua a singasingko ket pumili kadagiti umawat iti serbisiom kadagiti tao iti sakup ti pagariam wenno iti komunidad a dagiti kasapulanda ket mangsagidto iti puspuso dagiti mangtedto iti serbisio. Mariknanto dagiti tao a pagserbianda ti ayatda. Ti ayat a mariknam ket mabalin a makaaramid iti ad-adda pay tapno maipariknam kadakuada ti ragsak, kas iti inkari ti kanta, ngem iti panangipaaymo laeng kadagiti kasapulanda a temporal.
Ti maudi a singasingko ket agplano a mangusar iti bileg dagiti begkes dagiti pamilia, dagiti korum, dagiti organisasion ti auxiliary, ken dagiti tao nga am-ammom kadagiti komunidadyo. Dagiti rikna ti panagkaykaysa ket mangpaadunto kadagiti nasayaat a bunga ti serbisio nga itedmo. Ket dagita a rikna ti panagkaykaysa kadagiti pamilia, iti Simbaan, ken kadagiti komunidad ket dumakkelto ken agbalin a maysa a manayon a tawid iti nabayag kalpasan nga aggibus ti proyekto.
Daytoy ti gundawayko a mangibaga kadakayo no kasano ti kadakkel ti panagyamanko kadakayo. Babaen ti managayat a serbisio nga impaayyo para iti Apo, nagyaman kaniak dagiti tao a tinulonganyo idi nakipagkitaak kadakuada iti intero a lubong.
Nakitayo ti maysa a wagas a pakaitag-ayan kadakuada bayat ti panangtulongyo iti wagas ti Apo. Dakayo ken dagiti napakumbaba a disipulo ti Mangisalakan a kas kadakayo ket nangtedkayo iti awan bayadna a serbisio kadagiti dadduma ken dagiti tao a tinulonganyo ket nagyamanda unay kaniak kas supapak.
Nagun-odko ti kasta met la a panagyaman manipud kadagiti tao a nakipagtrabaho kadakayo. Malagipko iti maysa a kanito a nakatakderak iti abay ni Presidente Ezra Taft Benson. Pagsarsaritaanmi maipapan iti serbisio ti welfare iti Simbaan ti Apo. Pinagsiddaawnak iti kinaregta ti kinaagtutubona idi kinunana, a paggargarawenna ti imana, “Ipatpategko daytoy nga aramid, ken aramidna daytoy!”
Para iti Maestro itedko ti panagyamanko gapu kadagiti aramidyo nga agserbi kadagiti annak ti Nailangitan nga Amatayo. Am-ammonakayo, ken kitkitaenna dagiti panagkagumaan, kinapasnek, ken sakripisioyo. Ikararagko ta sapay koma ta ipaayannakayto ti Dios iti parabur ti panangkitayo iti bunga dagiti inaramidyo kas koma ti kinaragsak dagiti tinulonganyon ken natulonganyon para iti Apo.
Ammok a sibibiag ti Dios nga Ama ken dengdenggenna dagiti kararagtayo. Ammok a ni Jesus isu ti Cristo. Mapatarnaw ken mapapigsakayo ken isuda a pagserbianyo babaen ti panagserbi Kenkuana ken panagtungpal kadagiti bilinna. Mabalin nga ammoyo kas iti pannakaammok, babaen iti bileg ti Espiritu Santo, a ni Joseph Smith ket propeta ti Dios a nangisubli iti pudno ken sibibiag a Simbaan, nga isu daytoy. Paneknekak a ni Presidente Thomas S. Monson ti sibibiag a propeta ti Dios. Isu ket maysa a naindaklan a pagwadan ti inaramid ti Apo: nagar-aramid iti kinaimbag. Ikararagko ta sapay koma ta maalatayo dagiti gundaway nga “itag-ay[tayo] dagiti ima dagiti naidasay, ken patibkeren[tayo] dagiti nalupoy a tumeng.”6 Iti sagrado a nagan ni Jesucristo, amen.
© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti Visiting Teaching Message, May 2011. Ilokano. 09765 864