Roronrikirake
E tau te Mwane
I kaitibo ma mitinare ngke ai te 17.au ririki. N te tai anne ao ti uaia ni maeka ngai ma tariu te ikawai. Tinara e a tia ni motirawa n te ririki ae nako, ao te maiu e rangi ni kanganga. Ngke a reireinai mitinare, I ataia bwa anne te Ekaretia are I a kaman ukoukoria. Ma bon aia anainano raoraou ae ngaia a totokoa nakou n taromauri n te Taabati.
N te taina ao I nako ni kaea ana waaki ni kakukurei te Ekaretia n tain te wiikente. N nooria te roronrikirake ni kabane ni ngarengare ao n takakaro e karika te kukurei nakoiu ae korakora. E reke aia tai mitinare, ma te roronrikirake, n reireinai taekan te euangkerio, i namakina ae raoiroi ao e karekea au iango ni kani bwabetitoaki.
Ma e ngae n anne imwiin ae I kaaina te Ekaretia, ao I bon kaitaraaki ma kakaewenako. Bon ti ngai te membwa n te Ekaretia ni mwakoron te taaun anne ao I maeka n raroa nako ma te auti ni bootaki. Raoraou aika tiaki kaain te Ekaretia aikoa kan tabeakina arou. Ngkana I namakina te maroaa, I tataro ao I namakina ana tangira te Uea.
Ni katoa namwakaina, I karekea tibwau teutana te mwane man ana mwane tinau are katikua. E rang ni kanganga aron buokan maiu n te mwane ae ti teutana. Ma I kataia n ongeaaba. I kabwaka te kabwianibwai ao nna kabwaka naba te kantoka ibukin te mwamwananga nakon te tieminari ao bootaki n te Taabati. I aki oota bwa e kangaa, ma ni kabanean te namwakaina, I kunea bwa e rang n tau te mwane ibukin karaoan bwaai ni kabane.
I ataia bwa I a tia ni kakabwaiaaki man kabwakaan te kabwianibwai. Te ongeaaba nakon te tua aio e buokai ni kakorakoraai n au koaua, ni karaoan au mwakuri ni mitinare, ao ni kinai kakabwaia are I kona iai ni kakorakoraia membwa aika boou ake a kaitaraaki ma kakaewenako.