Te Rongorongo n Reirei ni Kaakawari, Tuun 2011
Kakorakorakiia Utu rinanon te Maiu n Toronibwai n Rabwata
Kamatebwaia te karaki aio ao, n angaraoina, maroroakinna ma titita ake ko kawariia. Kabonganai titiraki ni buokiko ni kakorakoraia am tiitita ao ni karaoa te Bootaki n Aine bwa mwakoron maium teuana.
Onimaki • Utu • Buokaki
Karikirakean te toronibwai—te kona n tabeakiniira bon iroura ma ara utu—bon tabeia titita n tatabemaniia nako. Ti riki n toronibwai ngkana ti reirei aron tangirakin te mwakuri, ngkana ti ukoukori kairi ma ieta ni kakaea te kabanea n tamaroa ni kawai ibukira, ao ngkana ti uaia ni mwakuri ma kaain te utu ibukin kainnano n aron te amwarake, kunnikaira, ao kamanoara.
Ngkana ti a toronibwai, ti kabonganai ara kakabwaia ao ara bwai ni katauraoi ibukin ao n totokoi kanganga. Ngaia ae te toronibwai, e kona ni buokaki ngkana ti tataro ibukin te korakora bwa ti na kaitaraa ma te onimaki taian kataaki ake ana kona n roko. Te toronibwai naba e anganiira te kona ni kawakin ara berita n tabeakiniia tabeman.
N te Bootaki n Aine, ti reireinaki iai reirei iaon te kan riki n toronibwai ao rabakau ni mwakuri. A kona Titita n reirei taekan te kataumwane, katokan te taarau, ao karekean te mwakuri, koroboki aika tabu, n reireiniia tabeman te wareware ao te kamatebwai, bwaai n rabakau, marurung n rabwata, te marurung, totokoan ao katokan tangiran te manging, marurung n te iango ao n rabwata, totokoan aoraki, ununiki, karekean amwarake ao titoa n amwarake, tauraoi ni bwaai aika karina, ao a mwaiti riki ake a na kona ni buokiira n riki n toronibwai.1
Julie B. Beck, te beretitenti ni kabuta n te Bootaki n Aine, e kabwarabwara bwa “karekean te bwai ibukira ao ibukiia tabeman bon kakoauaan ae ngaira bon ana reirei te Uea Iesu Kristo. … Ngke [tinan kaain abau] e mate ni karina n te ririki ae nako, e katuka kakoauaan maiuna n toronibwai. Iai ana rekomente nakon te tembora ao booki aika tabu aika e kabonganai raoi ao ana boki n reirei n te euangkerio. Ti tibwauai ma te tangira bwaata, baan, ao bwai n amwarake ake e a tia ni kakaraoi iai ngaa n amwarake. E katikui ara kunnikai ake e itui man manen kunnikai. E onimakin taeka ni kawai ‘Kabongana ni kabane, bwainna, karaoia, ke kamanena.’ Ti noori amwarake ake e a tia n unikii, e kawakin, ao n titoan. Te bwai ae ringa te nano bon ana boki ni mwane are e taui iai mwiin ana kabanemwane inanon ririki aika mwaiti. Bukina bwa e tai ibukin taai aika ana roko, e kawakina te mwane ibukin bwaai aika karina, ao akea ana tarau! Ae kakawaki riki, e a tia n reireiniia ao ni kaungaia tabeman riki n rabakauna ae e a tia ni karekea inanon maiuna ae kakaonimaki.”2
Man Koroboki aika tabu
Ioane 13:34–35; Iakobo 1:27; Motiaea 4:26; Doctrine ao Covenants 29:34–35; 38:30; 44:6
Man Ara Rongorongo ni Kawai
A tia titita n Aia Bootaki Aine n iri mwakuri ibukin kamaiuan tamnei n rabwata ao n tamnei. Ni katoa wiiki ngkana a bootaki Ainen te Bootaki n Aine i Nauvoo, titita anga aia ribooti ibukiia aomata ake a kainnano. Bwaintangira n te mwane, bwaai, taarena, ao te tai a kabonganaaki ni kamaiuia kainnano. Te mwakuri aei ibukin kamaiuaia aika rootaki n te kanganga e a tia n teimatoa ni waaki bwa ana mwakuri te Bootaki n Aine rinanon te roro teuana ma teuana.
Ngke a roko Aika Itiaki i Salt Lake Valley, Beretitenti Brigham Young (1801–77) e reireiniia titita aron buokaia ake a kainnano ao n reirei rabakau ake a na kona n tararuaia ibon irouia. E taku, “Reirei bwa ko na kona ni kamaiuko ibon iroum; kaikoi uanikai ao burawa, ao kawakin ibukin te bongina n akean te kaako.”3 Iaan ana kaetieti te nakoanibonga, te Bootaki n Aine e na teimatoa n reirei te maiu n toronibwai, ni kamanoa te utu, ao ni kaunga bwainan te kokoaua ao mwakuri n tangira, ana tangira Kristo ae itiaki.
© 2011 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakana n te Taetae n Imatang: 6/10. Kariaiakan rairana: 6/10. Rairakin te Visiting Teaching Message, June 2011. Kiribati. 09766 859
-
N na kanga ni buokiia mwaneu ao aia utu ni katamaroa te maiu n toronibwai n rabwata?
-
N na kanga ni katamaroa oin maiu n toronibwai n rabwata?