Lamharon
Bastante nga Kwarta
Nakilala ko ang mga misyonero sang ako17 katuig ang edad. Sadto nga tion nagapuyo ako upod sa akon magulang nga lalaki. Ang amon iloy napatay sang nagligad sadto nga tuig, kag ang pangabuhi mabudlay. Sang gintudloan ako sang mga misyonero, makita ko nga ang Simbahan amo gid ang simbahan nga dugay ko na ginapangita. Pero ang impluwensya sang akon mga abyan nagpugong sa akon sa pagkadto sa simbahan kon Domingo.
Isa ka bes nagkadto ako sa isa ka kahiwatan sang Simbahan sina nga semana. Ang makita ang tanan nga mga lamharon nga nagakinadlaw kag nagahinampang nagdala sa akon sing daku nga kalipay. Ang mga misyonero, upod sang mga lamharon, naghimulos sadtong kahigayunan agud tudloan ako sang isa ka leksyon sa ebanghelyo, kag manami kaayo ang akon nabatyagan nga nagpamat-od ako nga magpabunyag.
Pero bisan pagkatapos nga nagbuylog ako sa Simbahan, nagpangatubang ako sang mga hangkat. Ako lang ang nagaisahanon nga miyembro sang Simbahan sa sina nga bahin sang banwa kag nagapuyo malayo sa meetinghouse. Ang mga abyan ko nga indi mga miyembro (sang Simbahan) indi na luyag makig-angot sa akon. Kon nagabatyag ako sang pag-isahanon, nagapangamuyo ako kag mabatyagan ko ang pagpalangga sang Ginuo.
Kada bulan, nagabaton ako sang magamay nga kantidad gikan sa pundo nga ginbilin sang akon iloy. Mabudlay magsakdag sang akon kaugalingon sa tuman kadiutay nga kwarta. Pero nagpamat-od ako nga mangin matinumanon. Nagabayad ako sang ika-pulo kag kinahanglanon man magbayad sang pamasahe pakadto sa seminary kag mga miting kon Domingo. Indi ko mahangpan kon paano, pero pagkatapos sang bulan, makita ko nga may bastante nga kwarta agud mahimo ini tanan.
Nakahibalo ako nga nabugayan ako paagi sa pagbayad sang ika-pulo. Ang pagtuman sining kasuguan nagbulig sa akon nga makaangkon sing mas mabakod nga panaksihon, mag-alagad sang isa ka misyon, kag makilala ang mga bugay agud mapabakod ko ang bag-o nga mga miyembro nga nagapangatubang sang mga hangkat.