Mensahe sang Unang Panguluhan, Hunyo 2011
Ang mga Bugay sang Ika-pulo
Ang katuyuan sang Dios sa paghatag sa aton sang mga kasuguan amo ang bugayan kita. Luyag Niya nga hatagan kita sang kabuhi nga wala’y katapusan, ang pinakadaku sa tanan sang Iya mga dulot (tan-awa sa D&C 14:7). Agud mabaton ang dulot nga magkabuhi upod sa Iya sing wala’y katapusan kaupod ang mga pamilya sa selestiyal nga ginharian, kinahanglan naton ipangabuhi ang mga kasuguan sinang ginharian (tan-awa sa D&C 88:22).
Ginhatagan Niya kita sang mga kasuguan sa sining kabuhi agud buligan kita nga mapasanyog inang ikasarang. Ang layi sang ika-pulo isa sa sinang mga panghanda nga mga kasuguan [preparatory commandments]. Ang layi amo nga ihatag naton sa Ginuo ang ika-pulo sang tanan naton nga kinitaan. Tuman ini ka simple nga bisan ang isa ka bata sarang makahangop sini. Nakakita ako sang mga bata nga nagadaho sa isa ka bishop sang sobre nga nagaunod sang ika-pulo sang mga sinsilyo nga ila ginkita.
Ang isa sang mga bugay nga nagaabot gikan sa pagbayad sang bug-os nga ika-pulo amo ang pagpasanyog sang pagtuo agud matuman ang isa ka mas mataas pa gid nga layi. Agud makapuyo sa selestiyal nga ginharian, dapat naton ipangabuhi ang layi sang pagpahanungod (law of consecration). Didto dapat mabatyagan naton nga ang bug-os naton nga pagkatawo kag ang tanan nga yara sa aton iya sang Dios.
Sa pinakanubo, may tatlo ka mga paagi nga ang pagbayad sang bug-os nga ika-pulo sa sini nga kabuhi nagahanda sa aton sa pagbatyag sang kon ano ang kinahanglan naton mabatyagan agud mabaton ang dulot sang kabuhi nga wala’y katapusan.
Una, kon nagabayad kita sang aton ika-pulo sa Simbahan, ang aton Amay nga Langitnon nagabubo sang mga bugay sa aton. Ang bisan sin-o nga tayuyon nga nagabayad sang ika-pulo nakahibalo nga ina matuod. Ang mga bugay kon kaisa espirituhanon kag kon kaisa temporal. Ang mga ini ginahatag sa tion sang Ginuo kag suno sa kon ano ang Iya nahibaloan nga pinakamaayo para sa aton.
Sa pag-abot sinang mga bugay, ang aton pagtuo nagadugang nga ang Dios amo ang ginahalinan sang tanan nga maayo sa aton mga kabuhi. Mas mahapos makita nga ang pagpahanungod nagakilala gid lang sang kamatuoran nga ang tanan nga gintuga sang Dios Iya (ginapanag-iyahan). Ini nagapabatyag sa aton sang kapasalamatan nga Sia nagapangayo gid lang sang isa ka bahin sang napulo sang kon ano ang Iya nahatag na sa aton. Gani mas handa kita nga ipangabuhi ang layi sang pagpahanungod kon ini pagapangayuon sa aton.
Ikaduha, tanan kita nga tayuyon nga nakabayad sang bug-os nga ika-pulo nagabatyag sing mas daku nga pagsalig sa pagpangayo sa Dios sang kon ano ang ginakinahanglan naton kag sang aton mga pamilya. Sia nagpromisa sang mga bugay nga mas sobra pa sangsa aton mabaton kon nangin matutom kita sa aton kasugtanan sa pagbayad sang aton mga ika-pulo (tan-awa sa Malaquias 3:10). Gani ang isa sang daku nga mga bugay sang ika-pulo amo ang kasegurohan sa kon ano ang matabo sa palaabuton. Ano man ang aton mga kahimtangan, ang mga hitabo mangin para sa aton kaayuhan. Kon aton ginatuman ang aton mga promisa, tumanon man Niya ang Iya. Ang balatyagon sang katawhay amo ang isa sang daku nga mga bugay sang pagbayad sang bug-os nga ika-pulo. Yadtong nagatuman sang kasuguan sang ika-pulo sarang magpanaksihon nga ang bugay sang katawhay matuod kag bilidhon.
Ikatlo, yadtong nagabayad sang ika-pulo nagabatyag sang dugang nga pagpalangga sa Dios kag sa tanan nga mga anak sang Dios. Inang pagdugang sang pagpalangga nagikan sa paghangop kon paano ang Amay nagagamit sang mga ika-pulo nga aton ginahalad agud bugayan ang katawhan sa sini nga kalibutan kag sa wala’y katubtuban.
Paagi sa Iya awtorisado nga mga alagad, ginagamit Niya ang mga ika-pulo sing may daku nga pag-amlig. Ang tawo nga nagabayad sang ika-pulo nagabulig sa Ginuo sa pagpasad sang mga templo, kon sa diin ang mga pamilya sarang mahugpong sa wala’y katubtuban. Ang tawo nga nagabayad sang ika-pulo nagabulig sa Iya sa pagpalapnag sang ebanghelyo sa mga katawhan sa bisan diin. Ang tawo nga nagabayad sang ika-pulo nagabulig sa Iya sa pagpahagan-hagan sang kagutom kag pag-antus sa Iya kaugalingon nga pamaagi paagi sa Iya mga alagad. Ang bisan sin-o sinang mga alagad sarang makasugid sa inyo kon paano ang pagpalangga nagdugang bangud ang ika-pulo gingamit sa pagbugay sa katawhan. Kag amo man ang tawo nga matutom nga nagabayad sang ika-pulo.
Ang paghusay sang nabayad nga ika-pulo pila pa ka bulan sa palaabuton. Nagapangamuyo ako nga kamo kag ang inyo pamilya magasugod subong sa pagplano kag paghanda agud mangin takos sa mga bugay nga ginabubo sang Dios sa tanan sadtong makapahayag sa Iya nga sila nagabayad sang bug-os nga ika-pulo.
© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa USA. Pagtugot sa Ingles: 6/10. Pagtugot sa paglubad: 6/10. Paglubad sang First Presidency Message, June 2011. Hiligaynon. 09766 861
Pagtudlo gikan sa Sining Mensahe
-
Kon kaisa ang pinakamaayo nga paagi sa pagtudlo sang isa ka pat-od nga prinsipyo amo ang pagpakita sini (tan-awa sa Teaching, No Greater Call [1999], 164). Pangabaya ang isa ka miyembro sang pamilya nga ipakita kon ano ang katumbas sang ika-pulo. Sarang niya mapakita ini paagi sa pagpain sang isa ka butang gikan sa isa ka grupo sang 10 ka mga butang. Sa paghingapos, mag-agda sang isa ka miyembro sang pamilya nga ipakita kon paano magsulat sa isa ka tithing slip.
-
“Yadtong inyo ginatudloan makabenepisyo gikan sa pagpasakop sang tagsa-tagsa” (Teaching, No Greater Call, 63). Agdaha ang mga miyembro sang pamilya nga ipaambit kon ano sa ila pagpati ang buot silingon ni Pangulong Eyring sa iya ginhambal nga “pagbatyag sang kon ano ang kinahanglan naton mabatyagan agud mabaton ang dulot sang kabuhi nga wala’y katapusan.” Hambalan ang tatlo ka mga pamaagi sa diin ang pagbayad sang ika-pulo nagahanda sa aton nga mabatyagan ang kon ano ang kinahanglan naton mabatyagan agud mabaton ang mga bugay sang Dios.