Mensahe sa Visiting Teaching, Hunyo 2011

Pagpabakod sang mga Pamilya paagi sa Temporal nga Pagsandig-sa-Kaugalingon

Tun-i ining materyal kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo kaugalingon nga kabuhi.

Pagtuo • Pamilya • Bulig

Ang pagpasanyog sang pagsandig-sa-kaugalingon (self-reliance)—ang ikasarang nga magtatap sang aton mga kaugalingon kag mga pamilya—responsibilidad sang tagsa ka sister. Makasandig kita sa aton mga kaugalingon sa aton pagtuon nga palanggaon ang obra, sa aton pangpangita sang inspirasyon agud masalapuan ang pinakamaayo nga mga paagi sa pagsakdag sang aton mga kaugalingon, kag sa aton pag-obra upod sa mga miyembro sang pamilya agud masabat ang importante nga mga panginahanglan.

Kon kita nagasandig sa aton mga kaugalingon, ginagamit naton ang aton mga bugay kag mga ikasarang agud maghanda para sa kag malikawan ang mga problema.Wala’y sapayan, ang pagsandig-sa-kaugalingon, nagadugang samtang kita nagapangamuyo para sa kaisog agud maatubang nga may pagtuo ang mga hangkat nga sigurado nga magaabot. Ang pagsandig-sa-kaugalingon nagatugot man sa aton nga tipigan ang aton kasugtanan sa pagtatap sa iban.

Sa Relief Society, ginatudloan kita sang mga prinsipyo kag mga ikasangkol sa pagsandig-sa-kaugalingon. Ang mga miyembro nga babayi [sisters] sarang makatuon parte sa pagbadyet, pagtibawas sa kautangan, mga kinahanglanon agud mabaton sa trabaho, ang balaan nga mga kasulatan kag ang ebanghelyo, pagtudlo sa iban sa pagbasa kag pagtuon, teknolohiya, ikaayong lawas, pisikal nga kabakod, paglikaw kag pag-ayo gikan sa adiksyon, sosyal kag emosyonal nga kabakod, paglikaw sa masakit, pagpanghardin, pagpatubas kag pagtago sang pagkaon, kahanda sa emerhensya, kag madamo pa nga iban nga mga butang nga makabulig sa aton nga makasandig-sa-kaugalingon.¹

Si Julie B. Beck, pangkabilugan nga pangulo sang Relief Society, nagapaathag nga “ang pagsakdag sa aton mga kaugalingon kag sa iban ebidensya nga kita mga sumulunod sang Ginuong Jesucristo. … Sang [ang akon ugangan nga babayi] gulpi lang nga nagtaliwan sang nagligad nga tuig, nagbilin sia sang ebidensya sang kabuhi nga may pagsandig-sa-kaugalingon. May ara sia sang bag-o nga temple recommend kag balaan nga mga kasulatan kag mga manwal sa pagtuon sang ebanghelyo nga nagamit-sing-maayo. Puno sang pagpalangga nga ginpartida namon ang mga kaldero, mga kalaha, kag mga bandehado nga iya gingamit sa paghanda sang linibo ka mga kalan-on. Ginbilinan niya kami sang mga sobrekama (quilts) nga iya ginhimo gikan sa daan nga mga panapton. Nagapati sia sa dumaan nga hulubaton ‘Siputon gid, gamiton sing lubos, manteniron, o kon wala gid, agwantahon.’ Nakita namon ang mga pagkaon nga iya ginpatubas, ginpreserba, kag gintago. Labi nga makatalandog amo ang iya mga libreta sa diin maukod niya nga ginalista ang iya mga gasto sa sulod sang madamo nga mga tinuig. Bangud sia nagpangabuhi sing makinuton, nakabilin sia sang kwarta nga iya gintigana para sa mga emerhensya, kag wala sia sang may ginbilin nga mga utang! Labing importante, natudloan niya kag nahatagan-inspirasyon ang madamo pa nga iban sa mga ikasangkol nga iya naangkon sa kabug-osan sang iya matutom nga kabuhi.”²

Gikan sa Balaan nga mga Kasulatan

Juan 13:34–35; Santiago 1:27; Mosias 4:26; Doctrine and Covenants 29:34–35; 38:30; 44:6

Gikan sa Aton Kasaysayan

Ang mga sister sa Relief Society dalayon gid nga nagapasakop sa buluhaton sang temporal kag espiritwal nga pagsagop sang mga kalag. Kada semana sang ang mga Babayi nga Relief Society sang Nauvoo nagatipon, ang mga sister nagapanugid kon sin-o ang mga tawo nga nagakinahanglan. Ang mga donasyon nga kwarta, pagkaon kag kagamitan, mga talento, kag panahon ginpanagtag agud maumpawan ang mga nagakinahanglan. Ining panugod nga buluhaton sang pagpaumpaw sang pag-antus nagpadayon nga nangin buluhaton sang Relief Society sa madamo nga mga henerasyon.

Sang ang mga Santos nag-abot sa Salt Lake Valley, si President Brigham Young (1801–77) naglaygay sa mga sister nga buligan yadtong mga nagakinahanglan kag magtuon sang mga ikasangkol nga magatugot sa ila sa pagsakdag sang ila mga kaugalingon. Sia nagsiling, “Magtuon sa pagsakdag sang inyo mga kaugalingon; magsupot sang mga uyas kag arina, kag tagua ini para sa adlaw sang kaiwaton.”³ Sa idalom sang direksyon sang priesthood, ang Relief Society nagapadayon sa pagtudlo sang pagsandig-sa-kaugalingon, sa pagpangapin sang pamilya, kag sa pagpasanyog sang personal nga pagkamatarong kag mga buhat sang kaluoy, ang putli nga gugma ni Cristo.

© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa USA. Pagtugot sa Ingles: 6/10. Pagtugot sa paglubad: 6/10. Paglubad sang Visiting Teaching Message, June 2011. Hiligaynon. 09766 861

Paano ko mabuligan ang mga sister kag ang ila mga pamilya nga magsanyog sa temporal nga pagsandig-sa-kaugalingon?
Paano ko mapasanyog ang kaugalingon ko nga temporal nga pagsandig-sa-kaugalingon?