Feia apî
Ua nava‘i te moni
Ua farerei au i te mau misionare i te 17raa o to‘u matahiti. I taua taime ra o vau ana‘e e to‘u taea‘e paari i to maua oraraa. Ua pohe to maua metua vahine i te matahiti i ma‘iri, e e mea fifi roa te oraraa. I to te mau misionare haapiiraa ia‘u, ua ite a‘e ra vau e o te Ekalesia teie o ta‘u i imi noa na. Na te umeraa a to‘u mau hoa i tape‘a ia‘u eiaha e haere i te pureraa i te sabati.
I te hoê taime ua haere au i te hoê ohiparaa a te Ekalesia i roto i te hepetoma. To‘u iteraa i te feia apî e ata ra e e hauti ra, ua tupu te oaoa rahi i roto ia‘u. Na roto i teie rave‘a ua haapii mai te mau misionare e te feia apî ia‘u i te hoê haapiiraa evanelia, e ua au roa vau e ua faaoti au ia bapetizo ia‘u.
Tera râ, i muri iho atoa i to‘u ôraa i roto i te Ekalesia, ua farii au i te mau tamataraa. O vau ana‘e te melo o te Ekalesia i taua tuhaa oire ra e e mea atea roa te fare pureraa i te vahi ta‘u e ora ra. Aita to‘u mau hoa melo ore e hinaaro faahou e haere mai na muri iho ia‘u. Ia vai mo‘emo‘e ana‘e au, e pure au e e ite au i te here o te Fatu.
I te mau ava‘e atoa, e farii au i te hoê tuhaa moni na‘ina‘i mai roto mai i te moni haaputu ta to‘u metua vahine i vaiiho mai. E mea fifi roa i te faaamu ia‘u iho i teie moni iti ha‘iha‘i roa. Tera râ ua faaoti au ia haapa‘o. Ua aufau vau i te tuhaa ahuru e ua aufau atoa vau i te pereoo no te haere i te seminaire e i te mau pureraa i te sabati. Aita vau i taa maitai e mea nahea râ, i te hopea ava‘e, e ite au e ua nava‘i roa te moni no te aufau i te taato‘araa.
Ua ite au e ua haamaitaihia vau na roto i te aufauraa i te tuhaa ahuru. Ua horo‘a mai te haapa‘oraa i teie faaueraa ia‘u i te hoê iteraa papû puai, ia tavini i te hoê misioni, e ia ite i te mau haamaitairaa ia nehenehe ia‘u ia haapuai i te mau melo apî o te farii nei i te mau tamataraa.