Parau Poro‘i na te mau Tuahine Hahaere Tiunu 2011

Haapuai i te mau Utuafare na roto i te Faarava‘iraa Ia’na Iho i te Pae Tino

A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.

Faaroo • Utuafare • Tauturu

Ua riro te faahoturaa i te parau no te faarava‘iraa ia’na iho—te haapa‘oraa ia tatou iho e i to tatou utuafare—e hopoi‘a ïa na te mau tuahine atoa. E rava‘i tatou ia tatou iho na roto i te haapiiraa tatou ia here i te ohipa, na roto i te titauraa i te faaururaa no te iteraa i te mau rave‘a maitai a‘e no te imi i to tatou iho maitai, e na roto i te ohiparaa e te mau melo o te utuafare no te pahono i to tatou mau hinaaro tumu.

Ia rava‘i ana‘e tatou ia tatou iho, e faaohipa ïa tatou i to tatou mau haamaitairaa e ta tatou mau rave‘a no te faaineine ia tinai i te mau fifi. Tera râ, e maitai roa’tu te parau no te faarava‘iraa ia tatou iho mai te mea e, e pure tatou no te ani i te itoito no te aroraa ma te faaroo i te mau tamataraa e tae papû mai. Na te faarava‘iraa tatou ia tatou iho e tauturu ia tatou ia haapa‘o maite i ta tatou fafauraa ia aupuru ia vetahi ê.

I roto i te Sotaiete Tauturu, e haapiihia tatou i te mau parau tumu e te mau ite no te faarava‘iraa ia tatou iho. E nehenehe te mau tuahine e haapii i te parau no te faanahoraa i te haamau‘araa i te moni, te faaitiraa i te tarahu, te imiraa i te ite toro‘a, te mau pap‘iraa mo‘a e te evanelia, te haapiiraa ia vetahi ê ia tai‘o e ia haapii, te ihianohaa, te ea, te tino maitai, te parururaa e te faaoraraa i te tîtîraa, te ea sotiare e o te feruriraa, te parururaa i te ma‘i, te faaapuraa, te faahoturaa e te haaputuraa i te maa, te faaineineraa no te mau taime rû, e e rave rahi atu â mau mea o te tauturu ia tatou ia faarava‘i tatou ia tatou iho.¹

Ua haamaramarama mai o Julie B. Beck, peresideni rahi no te Totaiete Tauturu e, « te imiraa i te maitai no tatou iho e no te vetahi ê, o te faaiteraa te reira e, e mau pĭpĭ tatou na te Fatu o Iesu Mesia. … I te pohe-ta‘ue-raa [to’u metua hoovai vahine] i te matahiti i ma‘iri a‘e nei, ua vaiiho mai oia i te faaiteraa papû o to’na oraraa faarava‘i ia’na iho. Te vaira ta’na parau faati‘a no te hiero e te mau papa‘iraa mo‘a tei faaohipa-maitai-hia e te mau buka no te haapiiraa i te evanelia. Ua opere maite matou i te mau pani, te mau farai pani, te mau mereti i reira oia i faaineine ai i te mau maa e rave rahi. Ua vaiiho mai oia na matou te tahi mau tapo‘i ro‘i o ta’na i hamani i te mau ahu tahito. Ua ti‘aturi oia i te mau parau paari ‘A faaohipa maitai, a ahu e a hamani i te tahi ohipa na roto i te reira e aore râ, a vaiiho roa’tu.’ Ua ite matou i ta’na haaputuraa maa o ta’na i tanu, i tapunu e i haaputu. E ta’na atoa buka tuatapaparaa faufaa o ta’na i tapa‘o i te mau haamau‘araa e rave rahi matahiti. No te mea ua ora tarani noa na oia, ua vaiiho mai oia i te moni o ta’na i haaputu no te mau mea rû e aita oia i vaiiho mai i te tarahu ! Te mea faufaa râ, ua haapii e ua faauru oia e rave rahi mau taata i te mau aravihi o tei roaa ia’na i roto i to’na oraraa.²

No roto mai i te mau papa‘iraa mo‘a

Ioane 13:34–35 ; Iakobo 1:27 ; Mosia 4:26 ; Te Parau Haapiiraa e Te Mau Parau Fafau 29:34–35 ; 38:30 ; 44:6

No roto mai i To Tatou Aamu

Ua haa tamau maite te mau tuahine no te Sotaiete Tauturu i roto i te ohipa faaoraraa i te varua i te pae tino e i te pae varua. I te mau hepetoma ia putuputu te vahine o te Sotaiete Tauturu no Navu, e faaite mai te mau tuahine i te parau no te mau taata e fifi to ratou. E operehia te mau ô moni, ô maa, te mau ô tareni e te taime no te tauturu i te feia nava‘i ore. Ua tere noa teie ohipa tumu no te tautururaa i te mauiui ei ohipa na te Sotaiete Tauturu i tera u‘i e tera u‘i.

Ia tae a‘e ra te feia mo‘a i Roto Miti, ua haapii atu ra te peresideni Brigham Young (1801–77) i te mau tuahine ia tauturu ratou i te mau taata nava‘i ore e ia haapii ratou i te mau ite o te tauturu ia ratou ia aupuru ia ratou iho. Ua parau oia e, « a haapii ia paturu ia outou iho ; a faatupu i te huero e te faraoa ota, e a haaputu no te mau mahana rava‘i ore ».³ I raro a‘e i te arata‘iraa a te autahu‘araa, e tamau noa te Sotaiere Tauturu i te haapii i te parau no te faarava‘iraa ia’na iho, te parururaa i te utuafare, e te faaitoitoraa i te parau-ti‘a o te taata iho e i te mau ohipa aroha, te here mau o te Mesia.

© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no Visiting Teaching Message, June 2011. Tahitian. 09766 895

Nahea e ti‘a ai ia‘u ia tauturu i ta’u mau tuahine e to ratou mau utuafare ia haamaitai i te parau no te faarava‘iraa ia ratou iho i te pae tino ?
Nahea e ti‘a ai ia’u ia haamaitai i to’u iho faarava‘iraa i te pae tino ?