2011
Fòtifye fanmi yo pa mwayen otonomi tanporèl
jen 2011

Mesaj vizit nan fwaye, Jen 2011

Fòtifye fanmi yo pa mwayen otonomi tanporèl

Etidye materyèl sa a epi, si sa apwopriye, diskite li avèk sè w ap vizite yo. Itilize kesyon yo pou ede ou fòtifye sè w ap vizite yo ak pou fè Sosyete Sekou vin yon pati aktif nan pwòp lavi pa ou.

Lafwa • Fanmi • Sekou

Devlope otonomi—kapasite pou pran swen tèt nou ak fanmi nou—se responsablite chak sè. Nou vin otonòm lè nou renmen travay, lè nou chèche enspirasyon pou jwenn pi bon fason pou okipe tèt nou, ak lè nou travay avèk manm fanmi nou pou reponn ak bezwen debaz yo.

Lè nou otonòm, nou itilize benediksyon nou yo ak resous nou yo pou prepare pou pwoblèm ak pou evite pwoblèm. Men, otonomi ranfòse lè nou priye pou kouraj pou reponn pwoblèm k ap inevitabman vini yo avèk lafwa. Otonomi pèmèt nou kenbe alyans nou fè pou pran swen lòt moun yo tou.

Nan Sosyete Sekou, yo anseye nou prensip ak talan pou otonomi. Sè yo kapab aprann sou bidjè, elimine dèt, kalifikasyon pou jwenn travay, ekriti yo ak levanjil la, anseye lòt yo pou yo li ak aprann, teknoloji, sante fizik, egzèsis, prevansyon adiksyon ak gerizon li, sante emosyonèl ak sosyal, prevni maladi, fè jaden, pwodui manje ak rezèv, preparasyon pou ijans, ak anpil lòt bagay ki pral ede nou vin otonòm.1

Julie B. Beck, prezidant jeneral Sosyete Sekou a, eksplike ke “kapab okipe tèt nou ak lòt moun se prèv ke nou se disip Senyè Jezikri. … Lè [bèlmè] mwen te mouri toudenkou ane pase, li te kite prèv sou lavi otonòm ni. Li te gen yon rekòmandasyon tanp valid ak liv ekriti byen ize ak manyèl etid levanjil yo. Ak kontantman nou te separe bonm, chodyè ak asyèt li te itilize pou prepare dè milye repa. Li te kite dra pou nou ke li te fè avèk rad ki te fin itilize. Li te kwè nan ansyen pwovèb ki di ‘Itilize li, ize li, fè l travay, ou pa.’ Nou te wè pwovizyon manje li te fè pouse, prezève ak mete nan rezèv. Sa ki te patikilyèman touchan sete ti liv kont li a kote li te fidèlman ekri depans li pandan plizyè ane. Paske li te viv avèk prevwayans, li te kite yon ti lajan ke l te sere pou ijans, e li pa t kite dèt! Sa ki pi enpòtan, li te anseye ak enspire anpil lòt moun avèk talan ke l te akeri pandan lavi fidèl li.2

Apati ekriti yo

Jan 13:34–35; Jak 1:27; Mozya 4:26; Doktrin ak Alyans 29:34–35; 38:30; 44:6

Apati istwa nou

Sè Sosyete Sekou yo toujou patisipe nan travay pou sove nanm tanporèlman ak espirityèlman. Chak semèn lè fi Sosyete Sekou yo te konn reyini, sè yo te konn bay rapò sou moun ki nan bezwen. Yo te distribye don lajan, byen, talan, ak tan pou soulaje moun ki nan bezwen yo. Travay fondamantal sa a pou soulaje soufrans lan te kontinye rete travay Sosyete Sekou atravè jenerasyon yo.

Lè Sen yo te rive nan Vale Salt Lake la, Prezidan Brigham Young (1801–77) te konseye sè yo pou yo te ede moun ki te nan bezwen yo ak pou aprann talan ki ta pral pèmèt yo pran swen tèt yo. Li te di: “Aprann soutni tèt nou; mete gren ak farin akote, epi sere l pou lè gen yon jou rate.”3 Sou direksyon Prètriz la, Sosyete Sekou kontinye anseye otonomi, pou sovgade fanmi yo, ak pou ankouraje ladwati pèsonèl ak zak charite, amou pi Kris la.

© 2011 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/10. Apwobasyon tradiksyon: 6/10. Tradiksyon Visiting Teaching Message, June 2011. Haitian Creole. 09766 036

Nòt

  1. Gade Handbook 2: Administering the Church (2010), 9.4.2.

  2. Julie B. Beck, “The Welfare Responsibilities of the Relief Society President,” Basic Principles of Welfare and Self-Reliance (2009), 6.

  3. Enseignements des presidents de l’église: Brigham Young (1997), 231.

  1. Nan ki fason m ka ede sè m yo ak fanmi yo amelyore nan otonomi tanporèl?

  2. Nan ki fason m ka amelyore pwòp otonomi tanporèl pa mwen?