2011
Kōkajoorļo̧k Baam̧le ko ilo Un̄n̄are Peid Make ilo Men ko an Kanniōk
Juun 2011

Naan in Katak an Kōrā , Juun 2011

Kōkajoorļo̧k Baam̧le ko ilo Un̄n̄are Peier Make ilo Men ko an Kanniōk

Ekkatak kōn kein katak in im, n̄e ekkar, ekōnono kake ippān jejtōr ro kom̧ij loļo̧k. Kōjerbal kajjitōk ko n̄an jipan̄ iok kōkajoorļo̧k jejtōr ro am̧ im n̄an kōm̧m̧an bwe Doulul eo an Kōrā ro en m̧ōttan eo emourur tata ilo mour eo am make.

Tōmak • Baam̧le • Deeor

Kōļapļo̧k un̄n̄are peid make— maron̄ eo n̄an kejparok kōj make im baam̧le ko ad—ej jerbal eo an aolep jejtōr. Jej erom̧ un̄n̄are pāid make ilo ad katak n̄an iakwe jerbal, ilo ad pukōt im̧we n̄an loe wāween eo em̧m̧an tata n̄an kake aikuj ko ad make, im ilo ad jerbal ippān ro uwaan baam̧le eo n̄an tōpar menin aikuj ko raorōk.

N̄e jej un̄n̄are peid make, jej kōjerbal kōjeram̧m̧an ko ad im menin jipan̄ ko n̄an kōppopo n̄an im joļo̧k jorrāan ko. Ijowōt ke, un̄n̄are peid make, ej em̧m̧anļo̧k ilo ad jar kōn peran eo n̄an pād ippān tōmak eo n̄an ioon apan̄ ko me aaet renaaj itok. Un̄n̄are peid make ej barāinwōt kōm̧m̧an bwe jen kejparok bujen eo ad n̄an kejparok ro jet.

Ilo Doulul eo an Kōrā, kar katakin kōj kōn pedped eo an un̄n̄are peid make im kapeel ko. Jejtōr ro remaron̄ katak kōn bajet, deoor jān m̧uri, kapeel ko aikuji ilo jikin jerbal, jeje ko rekwojarjra im ko̧jpeļ eo, katakin ro jet n̄an riit im katak, menin kapeel ko raan kein, ājmour, emourur, kabōjrak im mour tak jen an̄urlep, ippān doon im ājmour ilo en̄jake, kabōjrak nan̄inmej, ekkat, kōm̧m̧an im kakkoņkoņ m̧ōn̄ā, m̧aanjapopo ilo iien idiin̄, im elōn̄ bar men ko jet me renaaj jipan̄ kōj erom un̄n̄are peid make.1

Julie B. Beck, būreejtōn eo eutiej an Doulul eo an Kōrā, ej kōmeļeļeik bwe “kake n̄an kōj make im ro jet ej juon kein kam̧ool bwe jej rikaļooran Irooj Jisōs Kraist. … Ke [kōrā eo jinō jinen ļeo ippa] eaar jidimkij an mej iiō eo ļo̧k, eaar likūt kein kam̧ool eo kōn un̄n̄are peid make eo an mour eo an. Eaar wōr juon an peba in mālim an tampeļ eo ekāāl wōt im jeje ko rekwojarjar em̧m̧an kōjerbali im bok in ekkatak an ko̧jpeļ eo. Kōm kar kōjepeļļo̧k aiin baat ko, paan ko, imi kōnno ko me eaar kōppopo taujin iien m̧ōn̄ā ko kaki. Eaar likūt wōt ippām quilt ko eaar kōm̧m̧ani jān nuknuk ko rem̧oor. Eaar tōmak ilo juon jabōn kennaan in etto, ‘Kōjerbal, kōņake, kōm̧m̧an bwe en jerbal, ak jab kōm̧m̧an jabdewōt kake.’ Kōm kar lo m̧ōn̄ā ko eaar kaddōki, kejparoki, im kakuņi. Men eo ekaim̧weiur eaar kōn bok jidikdik eo eaar tiljek ilo an ļo̧o̧ke jon̄an eo ej joļo̧k n̄an wia ilo iiō ko rellōn̄. Kōnke eaar mour ilo an kejparok, eaar likūt jidik jāān eaar kejparoke n̄an iien idiin̄ ko, im eaar jab kōm̧m̧an m̧uri! Men eo eļap an aorōk tata, eaar katakin im im̧we elōn̄ ro jet kōn kapeel ko eaar būki ilo tōrāan mour tiljek eo an ilo mour in.”2

Jān Jeje Ko Rekwojarjar

Jon 13:34–35 Jemes 1:27 Mosaia 4:26 Doctrine and Covenants 29:34–35; 38:40; 44:6

Jān Bwebwenato eo Ad

Jejtōr ro ilo Doulul eo an Kōrā rekōn iien otemjej kar bōk kuņaer ilo jerbal in lo̧mo̧rān jetōb ko ilo mour in kanniōk im mour in jetōb. Kajjojo wiik ilo an Kōrā ro ilo Doulul eo an Kōrā ilo Nauvoo kweilo̧k, jejtōr ro rej ripoot kōn armej ro rej pād ilo aikuj. Menin leļo̧k ko kōn jāān, m̧weiuk ko, tōļan ko, im iien ko raar kajeplekleki n̄an kemour riaikuj ro. Pedped in jerbal in an kemour rien̄taan eaar wōnm̧aanļo̧k wōt ilo an jerbal eo an Doulul eo an Kōrā ilo aolep epepen ko.

Ke Armej ro Rekwojarjar raar jikrōkļo̧k ilo Salt Lake Valley, Būreejtōn Brigham Young (1801–77) eaar kapilōk jejtōr ro n̄an jipan̄ ro rej pād ilo aikuj im n̄an katak kapeel ko me renaaj kar kōm̧m̧an bwe ren lale er make. Eaar ba, “Katak n̄an rejtake eok make, kallib grain im pilawā, im kakuņi m̧ae raan eo enaaj jabwe.”3 Ium̧win tōl eo an priesthood, Doulul eo an Kōrā ej wōnm̧aanļo̧k wōt n̄an katakin un̄n̄are peid make, n̄an telarōke baam̧le, im n̄an kōketak jim̧we an juon make im jerbal ko an iakwe, iakwe eo em̧ool an Kraist.

© 2011 jen Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English eo: 6/10. Kōmālim ukook eo: 6/10. Ukook eo an Visiting Teaching Message, June 2011. Marshallese. 09766 874

Kakememej ko

  1. Lale Bok in Bōk Meļeļe 2: Tōl Kabun̄ eo (2010), 9.4.2.

  2. Julie B. Beck, “Eddo ko an Būrejetōn eo an Doulul eo an Kōrā ro eo ej n̄an Leļok būrookraam̧ in Jipan̄,”Pedped in katak ko an Būrookraam̧ in Jipan̄ im Jeļā Un̄are Peid Make (2009), 6.

  3. Teachings of Presidents of the Church: Brigham Young (1997), 231.

  1. Ekōjkan aō maron̄ jipan̄ jejtōr ro aō im baam̧le ko aer kōkōm̧anm̧anļo̧k un̄n̄are peid make eo aer ilo men ko an kanniōk?

  2. Ekōjkan aō maron̄ kōkm̧anm̧anļo̧k aō un̄n̄are peiū make?