Yut

Evri Samting we Mi Save Givim

I kam long Alisa Hansen

Mi bin tingting tumas abaot olsem wanem bae mi pem olgeta samting we mi bin wantem blong mekem long sama: klas, woksop, kamp blong sama, mo ol narafala. Mi bin ting se bae mi krae. Afta mi tingbaot evri samting we oli bin tijim mi long hem abaot fasin blong gat tras mo fet long Lod. Mi disaed blong putum situesen ia long ol han blong Lod mo trastem se sapos hem i tingting blong Hem, bae Hem i putum wan rod i stap.

I no longtaem afta long hemia, mama blong mi i faenem wan jek we oli no bin kasem mane blong hem yet, be mi bin wok from eli long yia ia. Long nekis dei blong hem mi bin karem wan smol mane long wan leta we mi bin kasem olsem wan praes blong seken ples long wan kompetisen. Hem ia i wan bigfala testemoni long mi se God i laef, Hem i lavem mo i kea long mi mo bae Hem i givim samting long mi.

Mi bin fulap wetem tankyu mo lav long Papa blong mi long Heven mo Sevya. Mi bin filim olsem bae mi krae! Mi wantem tumas blong soemaot olsem wanem mi wantem tumas blong talem tankyu, blong presem God long fasin we i moa gud, mo blong serem filing ia. Ol narawan oli mekem hemia taem oli komposem wan singsing, raetem wan poem, o pentem wan pikja, be mi filim se mi no save mekem ol samting ia. Mi save se wan samting nomo we mi save givim we bae i stret blong presem hem, hem i laef blong mi—blong stap olsem “wan eksampol long ol Kristin man” (Fas Timoti 4:12), blong givim laef blong mi long Kraes. Hemia nao evri samting we Hem i askem, mo hemia hem i evri samting we mi save givim.