Fas Presidensi Mesej, Julae 2011
Brata, Mi Komitim Mi
Tu yang brata tufala i stanap antap long wan smol klif we i lukluk ova wan blu lek we wota blong hem i klin mo klia. Ples ia, hem i wan ples blong daeva we plante man i save long hem, mo tufala brata ia, tufala i bin stap tokbaot oltaem blong jiam wan dei long ples ia—wan samting we tufala i luk ol narawan oli stap mekem.
Nomata we tufala tugeta i wantem blong jiam, i nogat wan long tufala i wantem jiam faswan. Klif ia i no hae tumas, be tufala yang boe ia i luk olsem se klif ia i stap antap evriwan taem tufala i step i go fored blong jiam—mo strong paoa long tingting blong tufala i stat blong foldaon kwiktaem.
Long en, wan brata i go fored long en blong klif mo mekem tingting blong hem blong go fored. Long stret taem ia, brata blong hem i talem slo nomo long hem, “Ating i gud blong yumi wet kasem nekis sama.”
Strong tingting blong fas brata i pulum hem i go long fored finis. “Brata,” hem i ansa, “Mi komitim mi!”
Hem i jiam i go insaed long wota mo kam antap kwiktaem wetem wan strong singaot blong soem se hem i win. Nambatu brata i folem hem long sem taem. Afta long hemia, tufala tugeta i stap laf long las tokotk blong fas boe bifo hem i jiam i go insaed long wota: “Brata mi komitim mi.”
Komitmen hem i olsem blong daev i go insaed long wota. Nomata yu komitim yu o yu no komitim yu. Nomata yu stap muv i go fored o yu stanap yu stap. I no gat haf rod. Yumi evriwan i fesem ol taem blong mekem desisen we i jenisim laef we yumi gat. Olsem ol memba blong Jos, yumi mas askem yumiwan, “Bae mi jiam i go insaed o bae mi stanap nomo long en blong klif? Bae mi mekem wan step i go fored o bae mi testem tempreja blong wota nomo wetem ol fingga blong leg blong mi?”
Yumi mekem sam sin from yumi mekem samting i ron, sam narafala sin, yumi mekem olgeta from se yumi no mekem wan samting. Taem yumi komitim yumi hafhaf nomo long gospel, i save lidim yumi i go long tingting we i fasfas, harem nogud, mo fasin blong filim gilti. Hemia i no sapos blong hapen long yumi from se yumi wan kavenan pipol. Yumi mekem kavenan wetem Lod taem yumi baptaes mo taem yumi go insaed long haos blong Lod. Ol man oli mekem kavenan wetem Lod taem oli odenem olgeta long prishud. I no gat wan samting moa we i impoten bitim blong kipim wan komitmen we yumi bin mekem wetem Lod. Bae yumi tingbaot ansa blong Rejel mo Lea long Jekob insaed long OlTesteman. Hem i simpol mo i stret nomo; mo i soem komitmen blong olgeta: “Yu mas mekem olsem we God i talem long yu” (Jenesis 31:16).
Olgeta we oli komitim olgeta hafhaf nomo bae oli kasem hafhaf blesing nomo long saed blong testemoni, glad, mo pis. Bae ol windo blong heven bae oli no open fulwan long olgeta. Hem i wan krangke tingting blong tingting olsem, “Bae mi komitim mi 50 pesen naoia, be taem Kraes i kam long Seken Kaming, bae mi komitim mi 100 pesen.”
Komitmen long ol kavenan blong yumi long Lod hem i wan frut blong jenis long laef blong yumi. Taem yumi komitim yumi long Sevya blong yumi mo Jos blong Hem, hem i bildimap fasin blong yumi mo i mekem spirit blong yumi i kam strong mekem se taem yumi mitim Kraes, bae Hem i haggem yumi mo talem, “yu yu mekem wan gudfala wok! Yu yu wan gudfala man we yu lukaot gud long ol wok blong mi.” (Matiu 25:21).
I gat samting i difren bitwin fasin blong tingting blong mekem samting, mo fasin blong go mekem samting. Long olgeta we oli tingting nomo blong mekem samting bae oli faenem ol ekskius long evri rod blong olgeta. Olgeta we oli komitim olgeta wetem tru tingting, oli fesem gud ol hadtaem blong olgeta mo talem long olgetawan, “Yes, hemia i wan gudfala risen blong mekem samting i let smol, be mi mekem ol kavenan, so bae mi mekem wanem mi komitim mi blong mekem.” Oli stadi gud long ol skripja mo lukaotem blong Papa blong olgeta long Heven i lidim olgeta. Oli akseptem mo mekem ol koling blong olgeta long Jos. Oli atendem ol miting blong olgeta. Oli mekem ol hom mo visiting tijing blong olgeta.
Wan proveb blong ol man Jemani i talem, “Ol promes oli olsem ful mun. Sapos oli no kipim olgeta kwiktaem, bae oli stap go daon dei afta dei.” Olsem ol memba blong Jos blong Jisas Kraes blong Ol Lata Dei Sent, yumi komitim yumi blong wokbaot long rod blong wan disaepol. Yumi bin komitim yumi blong folem eksampol blong Sevya blong yumi. Tingbaot olsem wanem wol ia bae i kasem blesing mo i jenis blong gud, taem evri memba blong Jos blong Lod oli laef kasem tru mak blong olgeta—mo ol sol blong olgeta i jenis dip insaed mo oli komitim olgeta blong bildim kingdom blong God.
Long sam wei, wanwan long yumi i stanap long wan poen blong mekem desisen taem hem i stap lukluk ova long wota. Hem i prea blong mi se bae yumi gat fet, muv i go fored, fesem ol fraet mo ol tu tingting blong yumi wetem strong paoa long tingting , mo talem long yumiwan, “Mi komitim mi!”
© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong First Presidency Message, July 2011. Bislama. 09767 852
Tij Wetem Mesej Ia
“Wan wei blong helpem olgeta we oli stap lanem samting blong andastanem ol prinsipol blong gospel, i blong mekem olgeta oli droem ol pikja. Droem pikja i mekem olgeta oli tingting mo talemaot andastaning mo filing blong olgeta abaot ol stori blong gospel mo ol prinsipol” (Teaching, No Greater Call [1999], 166). Tingting gud blong ridim toktok ia, toktok raon long prinsipol blong komitmen long gospel, mo afta, askem olgeta we oli wantem blong mekem, blong oli droem wan pikja blong wan aktiviti blong gospel we i soemaot komitmen ia. Ol yangfala pikinini bae oli nidim help blong oli givim tingting long wanem oli save dro.