Visiting Tijing Mesej, Julae 2011

Kam long Tempol mo Klemem Ol Blesing blong Yu

Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.

Fet • Famle • Help

Ol sista, yumi gat bigfala blesing. Sevya i stanap long hed blong Jos ia. Ol profet we oli laef oli lidim yumi. Yumi gat ol tabu skripja. Mo yumi gat plante tempol raon long wol, ples we yumi save kasem ol odinens we yumi nidim blong i helpem yumi blong gobak long Papa blong yumi long Heven.

Fastaem, yumi go long tempol blong yumiwan. “Ol stamba tingting blong tempol,” Elda Robet D. Hels blong Kworom blong Olgeta Twelef Aposol i bin eksplenem, “i blong givim long yumi, ol odinens we yumi nidim blong sevem yumi insaed long selestial kingdom. Ol odinens blong tempol oli lidim yumi i go long Sevya blong yumi mo oli givim long yumi ol blesing we oli kam long yumi tru long Atonmen blong Jisas Kraes. Ol tempol oli ol bigfala yunivesiti blong lanem samting we man i save, we i givim long yumi save mo waes abaot Kriesen blong wol. Ol instraksen blong endaomen oli lidim yumi long fasin we yumi mas lidim laef blong yumi long laef ia. … Insaed long ol odinens, i gat plante instraksen long olsem wanem yumi mas laef, mo ol kavenan we yumi mekem blong laef long wan laef we i stret mo gud blong folem Sevya blong yumi.”¹

Be ol seves blong yumi long tempol oli no finis long ples ia. Presiden Boed K. Peka, Presiden blong Kworom blong Olgeta Twelef Aposol, i bin tijim: “taem yu mekem wok long bihaf blong wan we i go long narasaed long vel, hem i helpem yumi blong lukluk bageken long ol kavenan we yumi bin mekem. Bae yumi putum bakegen long maen blong yumi ol bigfala blesing long saed blong spirit we oli blong haos blong Lod. … Insaed long ol kavenan mo ol odinens, i gat ol blesing we yumi save klemem insaed long tempol.”²

Kam long tempol mo afta, kambak bakegen. Taem yumi mekem mo kipim ol kavenan bae oli kipim yumi long rod we i go long bigfala blesing ia we i bigwan long evriwan—laef we i no save finis.

Babara Tomson, seken kaonsela long Rilif Sosaeti jeneral presidensi.

Aot long Ol Skripja

Aesae 2:3; Fas Korin 11:11; Revelesen 7:13–15; Doctrine and Covenants 109

I Kamaot long Histri blong Yumi

Profet Josef Smit oltaem i toktok long ol sista blong Rilif Sosaeti long miting blong olgeta. Taem oli stap bildim Nauvu Tempol, Profet i bin tijim ol sista long doktrin, i mekem olgeta oli rere blong kasem moa save tru long ol odinens blong tempol. Long 1842 hem i talem long Mesi Filding Tompson se endaomen “bae i tekem yu aot long tudak i kam long gudfala laet.”³

Kolosap 6,000 Lata-dei Sent oli bin kasem ol odinens blong tempol bifo grup blong olgeta i muvaot long Nauvu. Presiden Brigham Yang (1801–77) i bin talem, “Hemia i wan bigfala glad we ol sent oli soemaot blong kasem ol odinens [blong tempol], mo hemia i bigfala glad long pat blong mifala blong givim ol odinens ia long olgeta, mekem se mi givim mi fulwan long wok blong Lod long Tempol long naet mo long dei; mi tekem fo aoa nomo blong silip, i no bitim, olsem haf blong wan gudfala silip blong wan ful dei, mo go hom wan taem nomo long wan wik.”⁴ Paoa blong ol kavenan blong tempol i mekem ol Sent oli strong taem oli lego taon mo tempol blong olgeta long wan travel we oli no save se bae i lidim olgeta i go wea.

© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong Visiting Teaching Message, July 2011. Bislama. 09767 852

Wanem Mi Save Mekem?

Wanem eksperiens bae mi serem blong mekem olgeta we mi visitim olgeta oli kam strong long tingting blong “go long tempol”?
Olsem wanem nao mi save klemem ol blesing blong tempol?