Ennaan eo an Būreejtōnji eo Kein Kajuōn, Juļae 2011
Būratōr, Ij Kalim̧m̧ur
Ruo jemjen jatin ro em̧m̧an dettaer raar jutak ioon juon toļ edik me ej lo dān ko reļae in juon ļee ebūļu. Jikin in eaar juon jikin tulo̧k eo ebun̄bun̄, im jemjen jatin ro emakijkij aer kar kōnono kōn kelo̧k eo—juon men eo em̧ōj aerro kar lo an doon kōm̧m̧ane.
Men̄e raar jim̧or kōņaan kelo̧k, ejjeļo̧k juon iaerro eaar ijjino. Utiej eo an toļ eo eaar jab kanooj utiej, bōtaab n̄an ļaddik rein ruo, āinwōt kōtaan eo eaar ļapļok jabdewōt iien erro ej jino m̧aan m̧aanļo̧k—im peran eo aerro eaar m̧ōkaj an makunļo̧k.
Āliktata, juon iaan būratōr ro ej likūt juon nee ilo tōrere in toļ eo im kar kōm̧ōkaj an wōnm̧aanļo̧k. Ilo tōre eo būratōr eo an eaar unoojdikdik, “Bōlen jej aikuj kōttar n̄an jōm̧ar in laļ.”
Iruuj eo an būratōr eo m̧oktata, mekarta, em̧ōj an kadede kar iuun m̧aanļo̧k e. “Būratōr,” eaar uwaak, “Ij kalim̧m̧ur!”
Eaar m̧ōkaj an wōr an̄ūn ilo dān im ioon dān kōn juon ainikien anjo. Būratōr eo kein karuo eaar m̧ōkaj an ļoor e ļo̧k. Ālkin wōt, raar ettōn̄ kōn naan ko an ļaddik eo kein kajuon m̧okta wōt jān an tulo̧k ilo dān eo: “Būratōr, Ij kalim̧m̧ur.”
Kalim̧m̧ur ej āinwōt tulo̧k ilo dān. Kwoj wujlepļo̧k ak kojjab. Kwoj em̧m̧akūt m̧aanļo̧k ak kwoj jutak wōt. Ejjeļo̧k jimettan. Jej aolep jelm̧ae iien ko kōn jokālōt eo n̄an ukōt aolepen mour ko ad. Āinwōt membōr in Kabun̄ in, jej aikuj kajjitōk ippād make, “Inaaj ke tulo̧k ak baj jutak wōt ilo tōrere in? Inaaj ke wōnm̧aanļo̧k ak baj etale jon̄an bwil im m̧ōļo eo an dān eo kōn m̧aan addi in neeō?
Jet jerawiwi rej kōm̧m̧an kōnke jej kōm̧m̧an bōd; jerawiwi ko jet rej kōm̧m̧an kōnke jejjab kōm̧m̧an jabdewōt. Kōn jidik wōt wujlepļo̧k n̄an ko̧jpeļ eo emaron̄ in tōl n̄an inepata, jab m̧ōņōņō, im bōd. Menin ej aikuj jab jerbal n̄an kōj kōnke jej armej in bujen. Jej kōm̧m̧ani bujen ko ippān Irooj ke jaar peptaij im n̄e jej deļo̧n̄ ilo im̧weo im̧ōn Irooj. Em̧m̧aan ro rej kōm̧m̧an bujen ko ippān Irooj n̄e kapit er n̄an priesthood eo. Ejjeļo̧k men eļapļo̧k an aorōk jān kejparok juon kalim̧m̧ur em̧ōj ad kar kōm̧m̧ane ippān Irooj. Jen kememej uwaak eo an Rachel im Leah n̄an Jacob ilo Kallim̧ur M̧okta. Eaar ejjeļo̧k uwaan im kajju im kar kwaļo̧k kalim̧m̧ur eo aer: “Jabdewōt men eo Anij ear ba n̄an eok, kwōn kōm̧m̧ane” (Jenesis 31:16).
N̄an ro me edik aer wujlepļo̧k maron̄ kōtmene kōn bōk wōt jidik kōjeram̧m̧an ko an naan in kam̧ool, lan̄lōn̄, im aenōm̧m̧an. Wintō ko an lan̄ remaron̄ dik aer peļļo̧k n̄an er. Enaaj ke menin bwebwe n̄an ļōmņak, “Inaaj wujlepļo̧k eō make 50 bōjāān kiiō, bōtaab n̄e Kraist ej waļo̧k tok ilo Itok eo Kein Karuo, Inaaj wujlepļo̧k eō make 100 bōjāān”?
Kalim̧m̧ur n̄an bujen ko ad ippān Irooj ej juōn tōprak in oktak eo ad. Kalim̧m̧ur n̄an ad Rilo̧mo̧o̧r im Kabun̄ eo an ej kalōk m̧wiliid im kōkajoor jetōb ko ad bwe n̄e jenaaj ioon Kraist, Enaaj atbo̧kwōj kōj im ba, “Em̧m̧an am̧ kōm̧m̧an kwō karijera em̧m̧an im tiljek” (Matu 25:21).
Ewōr juon oktak ikōtaan ļōmņak in kōm̧m̧ane im jerbale. Ro wōt me rej ļōmņak in wujlepļo̧k remaron̄ lo jekpen ņae ko ilo jabdewōt jekjek. Ro me rej m̧ool ilo wujlepļo̧k rej jelm̧ae apan̄ ko aer im ba n̄an er make, “Aaet, enaaj juon wun eo eļap an em̧m̧an n̄an karum̧wijļo̧k, bōtaab Iaar kōm̧m̧ani bujen ko, im kōn menin Inaaj kōm̧m̧ane ta eo Iaar wujlepļo̧k n̄an kōm̧m̧ane.” Rej etali jeje ko rekwojarjar im m̧ool ilo pukōt tōl eo an Jemeer ilo Lan̄. Rej bōk im kōļapļo̧k kūr ko aer ilo Kabun̄ in. Rej pād ilo kweilo̧k ko aer. Rej kōm̧m̧ani jerbal in loļo̧k m̧ōko im loļo̧k mōko ko an kōrā.
Juon jabōn kennaan an Ri German ej ba, “Kalim̧m̧ur ko rej āinwōt jetn̄ōl. Eļan̄n̄e rejjab kejparoki ilo juon wōt iien, rej makunļo̧k jen raan n̄an raan.” Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan-kein Āliktata, em̧ōj ad wujlepļo̧k n̄an etetal ilo iaļ eo an rikaļoor. Em̧ōj ad kar wujlepļo̧k n̄an ļoor waanjon̄ak eo an ad Rilo̧mo̧o̧r. Pijaik ļo̧k ewi jon̄an an laļ in naaj kar jeram̧m̧an im kar oktakļo̧k n̄an em̧m̧an n̄e aolep membōr ro an Kabun̄ eo an Irooj ren kar mour ekkar n̄an m̧ool in maron̄ eo aer—kar oktak ilo m̧wilaļ in jetōb ko aer im kar wujlepļo̧k n̄an kalōk aelōn̄ in kiin̄ eo an Anij.
Ilo jet wāween, kajjojo iaad rej jutak ilo juon jokālōt reilo̧k n̄an dān eo. Ej jar eo aō in bwe enaaj wōr ad tōmak, wōnm̧aanļo̧k, jelm̧ae mijak ko ad im pere ko ad kōn peran, im ba n̄an kōj make, “Ij kalim̧m̧ur!”
© 2011 jen Intellectual Reserve, Inc. Aolep jim̧we rej pād ippān. Kar jeje ilo Amedka. Kōmālim kajin English eo: 6/10. Kōmālim ukook eo: 6/10. Ukook eo an First Presidency Message, July 2011. Marshallese. 09767 874
Katakin jān Ennaan In
“Juon wāween n̄an jipan̄ rikkatak ro meļeļe pedped ko an ko̧jpeļ eo ej n̄an er bwe ren jin̄aik pija ko. Jin̄a ej kōtļo̧k bwe ren etale im kwaļo̧k meļeļe im en̄jake eo aer kōn bwebwenato ko an ko̧jpeļ eo im pedped ko” (Teaching, No Greater Call [1999], 166). Ļōmņak in riiti bwebwenato eo, ekōnono kōn pedped eo an kalim̧m̧ur n̄an ko̧jpeļ eo, innām kajjitōk ippān ro kōņaan kōm̧m̧ane n̄an pijaik juon pija kōn juon m̧akūtkūt an ko̧jpeļ eo me ej kōmeļeļeik kalim̧m̧ur. Ajri ro reddikļo̧k remaron̄ aikuji elmakot ko kōn ta pijaiki.