2011
Itok n̄an Tampeļ im Bōk Kōjeram̧m̧an ko Am̧
Juļae 2011

Naan in Katak an Kōrā, Juļae 2011

Itok n̄an Tampeļ im Bōk Kōjeram̧m̧an ko Am̧

Ekkatak kōn kein katak in im, n̄e ekkar, ekōnono kake ippān jejtōr ro kom̧ij loļo̧k.Kōjerbal kajjitōk ko n̄an jipan̄ iok kōkajoorļo̧k jejtōr ro am̧ im n̄an kōm̧m̧an bwe Doulul eo an Kōrā ro en m̧ōttan eo emourur tata ilo mour eo am make.

Tōmak • Baam̧le • Deoor

Jejtōr ro, jej lukkun in jeram̧m̧an. Rilo̧mo̧o̧r eo ej jutak ilo pōran Kabun̄ in. Jej tōl jen rikanaan ro remour. Ewōr ippād jeje ko rekwojarjar. Im ewōr ippād tampeļ ko rekwojarjar ilo aolepen laļ in ijo jemaron̄ bōk kain̄i ko rekkar n̄an jipan̄ kōj jepļaak ļo̧k n̄an ippān Jemedwōj Ilan̄.

Jej etal m̧okta n̄an tampeļ eo kōn kōj make. “Kōttōpar eo aorōk tata an tampeļ,” Eļtōr Robert D. Hales an Doulul eo an Jōn̄oulruo Rijilōk ro eaar kōmeļeļeiki, “ej n̄an letok kain̄i ko remenin aorōk n̄an mour ijo eutiej tata ad ilo aiboojoj eo an aļ. Kain̄i ko an tampeļ rej tōl kōj n̄an ad Rilo̧mo̧o̧r im letok n̄an kōj kōjeram̧m̧an ko me rej itok n̄an kōj kōn Pinmuur eo an Jisōs Kraist. Tampeļ ko rej university ko reļaptata an jikin katak eo ej pād n̄an armej, letok n̄an kōj jeļāļo̧kjeņ im meletlet kōn Kōm̧anm̧an eo an mour in. … Kōmeļeļe ko an Menin letok kwojarjar eo ej letok tōl kōn ekōjkan ad aikuj mour im bujen ko jej kōm̧m̧ani n̄an mour jim̧we kōn ļoor ad Rilo̧mo̧o̧r.”1

Bōtaab jerbal in jipan̄ eo ad kōn tampeļ ejjab bōjrak ijōņ. Būreejtōn Boyd K. Packer, Būreejtōn eo an Doulul eo an Jon̄oulruo Rijilōk ro, eaar katakin: “Jerbal āinwōt ribōk jikin n̄an juon eo em̧ōj an mej, kwonaaj etale im̧aam̧ bujen ko me kwar kōm̧m̧ani. Kwonaaj kapene ilo ļōmņak eo am̧ kōjeram̧m̧an ko reļļap ilo jetōb me rej kobaļo̧k ippān im̧weo im̧ōn Irooj. … Ilo bujen ko im kain̄i ko rej kaioļapļap e kōjeram̧m̧an ko me komaron̄ būki ilo tampeļ eo ekwojarjar.”2

Itok n̄an tampeļ innām bar itok n̄an e. Kōm̧m̧an im kejparok bujen ko an tampeļ naaj dāpij kōj ilo iaļ eo n̄an kōjeram̧m̧an eo eļaptata iaan aolep kōjeram̧man—mour indeeo.

Barbara Thompson, rikakipilōklōk eo kein karuo ilo būreejtōnji eo eutiej an Doulul eo an Kōrā.

Jān jeje ko Rekwojarjar

Aiseia 2:3 1 Korint 11:11; Revelesōn 7:13 Doctrine and Covenants 109

Jān Bwebwenato eo Ad

Rikanaan Joseph Smith ekōn emakijkij an kōnono n̄an jejtōr ro ilo Doulul eo an Kōrā ilo kweilo̧k ko aer. Āinwōt an Nauvoo Tampeļ pād wōt ilo an ekkal, Rikanaan eo eaar katakin jejtōr ro ilo katak, kōpooj er n̄an bōk eļapļo̧k jeļāļo̧kjeņ kōn kain̄i ko an tampeļ. Ilo 1842 eaar ba n̄an Mercy Fielding Thompson bwe menin letok kwojarjar eo “enaaj bōktok kom̧ jān marok n̄an meram eo ekabwilōn̄lōn̄.”3

Bōlen 6,000 Armej ro Rekwojarjar ilo Raan-kein Āliktata raar bōk kain̄i ko an tampeļ m̧okta jān diwōjļo̧k eo jān Nauvoo. Būreejtōn Brigham Young (1801–77) eaar ba, “Eaar tarukelel eo eaar waļo̧k jān armej ro rekwojarjar n̄an bōk kain̄i ko [an tampeļ], im eaar tarukelel ilo m̧ōttan eo am n̄an kōm̧m̧ani n̄an er, bwe Iaar ajeļo̧k eō make n̄an jeral eo an Irooj ilo Tampeļ bon̄ im raan, ejjab ļapļo̧k jān emen awa in kiki, ilo juon jon̄ak, juon raan, im rool n̄an m̧weo juon kōttan ilo juon wiik.”4 Kajoor im pen eo an bujen ko an tampeļ rej tiion̄e ļo̧k armej ro rekwojarjar ilo aer ilo̧k jān jikin kweilo̧k ko aaer im tampeļ n̄an juon em̧m̧akūt n̄an juon jikin jab jeļā kake.

© 2011 jen Intellectual Reserve, Inc. Aolep jim̧we rej pād ippān. Jeje ilo Amedka. Kōmālim kajin English eo: 6/10. Kōmālim Ukook eo: 6/10. Ukook eo an Visiting Teaching Message, July 2011. Marshallese. 09767 874

Kakememej ko

  1. Robert D. Hales, “Blessing of the Temple,” Liaona, Oktoba 2009, 14.

  2. Boyd K. Packer, The Holy Temple (1980), 170, 171.

  3. Teaching of Presidents of the Church: Joseph Smith (2007), 414

  4. Teachings of Presidents of the Church: Brigham Young (2007), 414

Ta Iakuj in Kōm̧m̧ane?

  1. Ta en̄jake eo Inaaj kwaļo̧k n̄an kōkajoorļo̧k ro Ij loļo̧k er ilo ļōmņak eo aer n̄an “itok n̄an tampeļ”?

  2. Ewi wāween aō make bōk kōjeram̧m̧an ko an tampeļ?

Būriin