Poraus seni ewe Aewin Presetensi AUGUST 2011
Tong non ewe Imw—Kapasen Fon seni Nouch Soufos
Feiochun Manauen Famini
“Nupwen sia sotuni chommong mettoch me feino touau me kuna pwe chommong mettochun fonufan mi mochomoch me kukun auchean, a awatteno ach kinisou ren ewe tufich pwe sia chon eu mettoch sia tongeni nukunuk non—imw me famini me aramas sia wesewesen tongei. Sia kaeo met wewen ach nukunuk fengen ren wis, ren sufon, ren ketiwochun aramas. Sia keao pwe ese wor met mi tongeni epwe siwini ewe feiochun nonomun manauen famini.”1
Aea Fengen Ach Tong
“Oupwe ingeiti noumi semirit me turufi; anapano ami apasa ngenir, ‘Ami ennetin tonger’; apasa ami kinisou fansoun meinisin. Kosap mut ngeni eu osukosuk epwe auchea nap seni emon kopwe tongei. Chienach ra feino, semirit mi mamarita, aramas sia tongei ra mano. Mi fakkun mecheres pwe sisap aucheani ekkoch, tori ewe ran nupwen rese chuen nom non manauach me sia chok ekieki ‘met ika’ me ‘amo ita.’ …
“Sipwe aucheani ach manau nupwen sia chuen manau, kutta pwapwa non ewe sai me aea fengen ach tong ngeni chienach me famini. Non eu ran, esap chiwen nesor ngeni emon me emon kich. Sisap nikitano met mi auchea nap seni meinisin.”2
Pwari Ach Tong
“Pwi achengicheng, sipwe aucheani me sufoniti punuach. Punuach feinfeino. Fefinach, sufoniti punuemi. Mi auchea repwe rongorong eu kapas murino. Mi auchea repwe angei eu emenimen seni emon mi chiechioch. Mi auchea pwe repwe angei tong ennet. …
“Ngeni ami sam me in, ua apasa, pwari ami tong ngeni noumi kewe. Oua sinei pwe oua tonger, nge oupwe tumunu pwe ra pwan sinei. Ir mi fakkun auchea. Oupwe pwӓratӓ ngenir. Iotek ngeni Semach won Nang pwe epwe anisikemi ne tumunu noumi kewe iteiten ran me pworacho ngeni ekkewe osukosuk mi feito ngeni sam me in. Mi namwot pwe kopwe angei pwan och mirit non om tumunur.”3
Pwӓratӓ Ach Tong
“Ngeni ami sam me in, pwӓratӓ ami tongei noumi kewe semirit. Iotek fan iter pwe repwe tongeni pworacho ngeni ekkewe mettoch mi ngau non ewe fonufan. Iotek pwe repwe tongeni awatteno ar nuku me kapasen pwӓratӓ. Iotek pwe repwe achocho ngeni manau murino me angang ngeni ekkoch.
“Semirit, oupwe pwӓratӓ ngeni sememi me inemi pwe oua tonger. Oupwe anisir pwe repwe sinei pwe oua kinisou ren mettoch meinisin ra fen fӧri me ra sopweno ne fӧri fan itemi.”4
Met mi Auchea Nap seni Meinisin
“Ekkewe mettoch mi auchea nap seni meinisin mi anongonong won ekkewe aramas unukuch. Fan chommong sia ekieki pwe ra wesewesen sinei ifa ukukun ach tonger. Nge sisap chok ekieki; sipwe anisir pwe repwe sinei. William Shakespear a makei, ‘Rese tongei ekkewe rese pwӓratӓ ar tong.’ Sisap niamamasi ekkewe kapasen kirokiroch sia apasa ika ewe tong sia pwӓratӓ. Nge, ach niamam epwe feito seni ekkewe mettoch sise fӧri non ach chiechi ngeni ekkewe aramas mi auchea ngeni kich.”5
Akanato Nang Ngenikich
“Amo ita ach famini me imwach repwe uren tong: tong fengen, tongei ewe kapas allim, tongei aramas, me tongei ach Chon Amanau. Ren ei, nang epwe arapakan ngeni kich won fonufan.
“Amo ita sipwe fӧri imwach pwe eu nenien tumunu pwe chon ach famini repwe mochen niwin ngeni.”6
Eu Iotek fan iten Famini
“Non ukukun ewe esit ewe famini a angei non ei fonufan ikenai, me chommong mettoch mi pin mi chok turunufas, sia tungor Ngonuk, Semach, pwe kopwe anisikem pwe sipwe pworacho ngeni ekkewe sosot sia kuna, pwe sipwe uta non pochokun fan iten ewe ennet me wenechar. Amo ita imwach repwe eu nenien kinamwe, nenien tong me nenien mettochun ngun.”7
© 2011 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/10. Kapungunon chiakun: 6/10. Chiakun First Presidency Message, August 2011. Chuukese. 09768 901
Afanafan seni Ei Poraus
“Non ami ekieki fengen, ewe sensei epwe ani eu kapas eis ika porausen eu fansoun me epwe mut ngeni ekkewe chon keao och fansoun pwe repwe ekieki usun ponuen ewe kapse eis ika och ekiek” (Teaching, No Greater Call [1999], 160). Nupwen oua aneani ei poraus ren ewe famini, tungor ngenir pwe repwe ausening ngeni ekkewe kapasen fon ika ekkewe sokkun ekiek mi ku netiper. Mwirin chon ewe famini mi tongeni ekieki ifa usun repwe awatteno tong non imwer. Ekieki ne tungor ngeni ewe famini repwe ekieki usun ekkei mettoch non ar pwinin famini.