Mwet Fuhsr
Wo, Wo Liki, Wo Emet
Ke Ohktohpa 2007 sramsram ke toeni luhlahp lal, Elder Dallin H. Oaks ke U luhn Mwet Sap Singucul Luo sramsram ke mukwikwi ma “wo, wo liki, wo emet.” Ke pacl se el fahk ke “ahkkahfofoye tuhlihk uh,” nga kohtkohtweni ke oruh suhfal luhk kac ke siah soko luhk ah.
Nga etuh lah nga oruh upaclaclac. Nga wi sritacl se ke lutlut ah, eis kuhlahs upac ke lutlut ah, ac wi pac kuhtuh mukwikwi sahyac. Nga soenna oaruyang in wi mukwikwi luhn Muhtwacn Fuhsr uh, ac lwen Sacnri luhk uh sesseslah ke fohs ke nga srihke in kihtin pacliyac in ahksahfyelah mwe lutlut luhk uh. Rensui puhsrwen on ac ahksuwohsye pwepuh in nus luhn lutlut uh wacngihnlac pwacr kac ac orwaclah orekma se.
Sramsram soko lal Elder Oaks uh oruh ngan liye wo ke orwaclah luhn pacl luhk uh. Mukwiki luhk uh wo, tuhsruhk puhslaclac. Nga enenuh in sulaclah ma wo emet uh. Ke nga srihke in sule mukwikwi in sislah uh, nga akihlen lah wosasuc luhn Jisus Kraist uh pa wo emet ma mwet se enenuh in eis uh. Nga fihliyac pruhe ac lutlutkihn ma suhmuhslah uh in an e lucng ke tahk luhk uh, ac tohkohyang, moul luhk uh fahsr fwel.
Elder Oaks el lutiyucme lah ke kuht oruh ma Leum El luhngse kuht in oruh emet uh, ma nuh kwewa sahyac ac tuhfah oreklac wo. Nga fin lutlutkihn ma suhmuhslah uh met liki nga sritacl kuh met liki nga oruh mwe lutlut luhk uh, ma nuh kwewa ma yohk srihpac uh fah oreklac. Ke nga oruh moul luhk uh siskacn Leum uh, sahyacn isaclwacng nuh kac in oacna ma tukun nuhnak uh, moul luhk uh mihs ac wolac liki met ah.
Inge nga lohacng wo in lohng ke kahs in kahsruh utuckuh ke toeni luhlahp uh!
Sihmlac sel Paul Mann