Pweng sin Prestuhnsi Se Met Septempuh 2011
Toeni Luhlahp—Tiac Mwe Insewowo ke Lwen Nuh Kwewa Se
Sie mempucr wowo ke Alu uh sramsram nuh sin sie mwet tuhlan suc tiac wi luhlahlfongi lasr uh. Ke ma elos sruhmuhn ah forlah in sruhmuhn ke toeni luhlahp uh, mwet tuhlan sac siyuck, “Kom fahk lah oasr mwet pahluh ac mwet sap lowos? Ac pacl luo ke yac se ke toeni fin facluh nohfohn uh elos ahkkahlwemye fahk luhn God?”
“Ma na pwacye,” mempucr sac topuk ke puhla wo.
Mwet tuhlan sac nuhnkuh kac ke kihtin pacl ah. El ngwetngwetan luhngse lohng na el siyuck, “Meac elos fahk ke toeni luhlahp se ma tuhfahna tari ac?”
Ke pacl se inge mempucr wo ke Alu uh tilac pwacrwack ke akacsruhi ke wosasuc se ac el puhla mwekihn. Srihke ke kuhiyacl, el tiac kuh in nuhnkuh ke ma fwack ke soko sramsram ah.
Kawuck se lal ah konwacack lah upac ma se inge ac el fahk, “Kalmacn fahk lom nuh sihk an pa God el sramsram nuh sin mukul ke lwen lasr uh ac kom tiac kuh in esam ma El fahk ah?”
Tamuhlwel sac puhla puhsisacl ke ayaol se inge. El otwelah kuh sel lah el ac oraclah in wo in esamyac kahs fwackyuck sin mwet kuhlwacnsap luhn Leum ke toeni luhlahp uh.
Kuht nuh kwewa etuh luhpan upac in esamyac pweng nuh kwewa ke toeni luhlahp uh, ac nga etuh lah kuht tiac enenuh in mwekihn kuht fin tiac esam ma nuh kwewa. Tuhsruhktuh, oasr pweng ke kais sie toeni luhlahp utuckuh in oruh sie mwe sang ac sie mwe insewowo inkuhsrao me yohkna nuh ke ohiyacn moul lasr kais sie uh.
In ahkolah nuh ke toeni luhlahp uh, lwelah nuh sihk in sruhkwack tolu mwe nuhnak fihsracsr ma kuh in kahsruh in kuh in eis, esam, ac orekmakihn wo kahs ma fwackyuck sin mwet kuhlwacnsap luhn Leum uh.
1. Mempucr ke Alu uh oasr fwackyuck lalos kais sie ke elos ac lohng kac ac lutlutkihn kahs moklweyuck ma sruhmuhnyuck ke toeni luhlahp uh.
Ke kom ahkolah nuh ke toeni luhlahp uh, nga suli kom in motko kuhsen siyuck ma kom enenuh in topuk an. Nuh ke mwe srihkasrak, kom ac kuh in eis inkacnek ac kolyuck sin Leum ke ma upac kom sun uh.
Top nuh ke kain pruhe inge kuh in tuhkuh suwohswohs ke sie sramsram kuh ke sie kain pohloh sramsram. Ke kuhtuh pacl uh top uh kuh in tuhkuh ke sie atacn kahs, pohl kahs, kuh on ma tiac fahsrweni. Insiyac se sesseslah ke sruikihnyacn mwe insewowo luhn moul ac tiac tui ke luhngse in lohng ac ukwe kahs in kahsruh uh fah ahkolah inkacnek nuh ke fwackyuck luhn kais sie.
2. Nimet ahksrihkye na pwacye sie pweng ke srihpen etweyuck tari.
Mwet pahluh uh kwacna luti ke ma kalweniyuck; pa masap in etwaclah uh. Kom ac fah lohng kalweniyuck ke sifac ac mwe luti ke toeni luhlahp uh. Lwelah nga in sifil ahkpwacyei nuh sum: ma inge tiac oreklac ke srihklac luhn orwaclah kuh motkweyac. Kuht tiac tui in lohng pweng uh ke ohiyac etweyuck se ke srihpen Leum El luti ac use nuh in nuhnak lasr uh ac insiyacsr mwe luti kuh se ke ma yohk srihpac ma pahtpaht luhlahp ma enenuh in etweyuck ac orek nuh kac met liki kuht ac kuh in mukwilac nuh ke kuhtuh ma sahyac uh. Sie mwet muhsah etuh orwaclah met pweluhng uh met liki lac tilohkohnwack sinkac uh ac fahsuc uh.
3. Kahs ma sruhmuhnyuck ke toeni luhlahp uh enenuh in oruh sie mwe kohkoh ma srihsrngi inkacnek nuh sesr ke mahlwem fahsruh uh.
Kuht fin lohng kac ac ukwe moklweyuck luhn Nguhn uh, elos ac oruh oacna sie Liahona, kol kuht nuh ke acn tiac etweyuck, fuhluh ac fin ohl upac oasr met liki kuht (liye 1 Nephi 16).
Ke facluh muhtwacwacack ah, God El okasack mwet pahluh suc sramsram ke uli luhn inkuhsrao nuh sin mwet uh ke pacl lalos ah. Ma kunacsr in lohng ac orekmakihn pweng luhn Leum uh ma utuckuh nuh sesr uh.
Pahpah Inkuhsrao pahkotwen ac luhngse tuhmwacsr uh tiac muhlkihn kuhtlac ac fah tiac muhlkuhnlah tuhlihk Nahtuhl uh. Mihsenge, ac oacyacpac pacl met ah, El srihsrngiyac mwet sap ac mwet pahluh uh. El tiac tui in ahkkahlwemye kahs Lal nuh selos.
Fuhkah wolacna luhn pacl uh in lohng pweng luhn God nuh sesr kais sie ke pacl in toeni luhlahp uh! Lwelah kuht in ahkolah wo nuh ke mwe insewowo yohk se inge ke kolyuck muhtahl utuckuh sin mwet kuhlwacnsap sollac Lal uh.
Tuh ma inge tiac mwe insewowo oasr pacl nuh kwewa se.
© 2011 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA Ahkkweyeyucklac ke kahs English: 6/10. Ahkkweyeyucklac ke lweng: 6/10. Lwenglah luhn First Presidency Message, September 2011. Kosraean. 09769 868
Luti ke Pweng Se Inge
-
Tuhkweni riti ip yohk uh. Ahkkweye sucu uh in akihlen ma in lohngyuck ke pacl in toeni luhlahp uh.
-
In kahsruh tuhlihk fuhsr uh in orekmakihn kahs in kahsruh utuckuh sel Prestuhn Uchtdorf, ahkkahlwemye nuh selos sie tahk se ke Wal Luhlahp uh (sukokyak ke ma sihmlac ke Liahona luhn toeni luhlahp). Lwelah elos in etuh lah Prestuhnsi Se Met ac U luhn Mwet Sap Singucul Luo ac tuhfah sramsram ke toeni luhlahp uh. Ahkkweye tuhlihk an in lohng toeni uh ac srolwaclah sie petsac in kahsrwelos esam ma elos lotwelah uh. Pahpah ninac uh kuh in liye conferencegames.lds.org nuh ke kuhtuh pac mukwikwi luhn tuhlihk uh.
Lacyot: petsac sel Les Nilsson