Rongorongo man te Moan Beretitentii TEBETEMBWA 2011
Maungatabu ni Kabuta — Bon te Kakabwaia tai Manuokinna
Te manna te membwa n te Ekaretia e taetae ma kaain rarikina ae tiaki kaain ara aaro. Ngke a a moana aia marooro iaon te maungatabu ni kabuta, e titiraki kaain rarikina, “Ko taku bwa iai ami burabeti ao abotoro? Ao inanon uoua te tai n te ririki iai ami maungatabu n te aonaaba ni kabuta aika kaoti iai ana taeka te Atua?”
“Ngaia raoi anne,” e kaeka te membwa ma te aki nanououa.
Teuarei e iangoa anne inanon tabeua te tai. E taraa n ae e rangi ni kan ongora ao ngkanne e a titiraki, “Tera bwaai aika taekinaki n te maungatabu ni kabuta ae nako?”
N te tai aei te membwa n te ekaretia ae e tamaroa e roko irouna te namakin ma te ingainga ibukin tibwauaan te eungkerio ma e namakina te maamaa. E bon rangi ni kataia, ma e aki kona n iangoa aron kabwarabwaraan teuana te marooro.
Raraona e kunea bwa te bwai aei e katabetabea ao e taku, “Ko nanonna n tuangai bwa te Atua e taetae nakoia aomata inanon ara bong ao ko aki kona n uringnga terana te bwai are E taku?”
Te tari aio e namakina te karinanoaki n te marooro aio. E berita bwa e na karaoa ae tamaroa riki n uringii taeka ake a taekinii ana toro te Uea n te maungatabu ni kabuta.
Ti bane n ataia bwa e kaangaanga ae ti na bane n uringii taetae ni kabane man te maungatabu ni kabuta, ao I bon koaua bwa tiaki tangiria ni maamaa ngkana ti aki uringii bwaai ni kabane. E ngae n anne, iai rongorongo inanon maungatabu ni kabuta ae nako ake ti anganaki bwa te bwai n tituaraoi ao te kakabwaia mai karawa ni kaonotaki ibukin oin maiura nako.
N te katauraoi ibukin maungatabu ni kabuta, kariaiai bwa N na karioi teniua oin iango ake a na kona ni buokiira bwa ti na butimwaea raoi, uringnga, ao ni kamwakurii taeka ake a taekinaki irouia ana toro te Uea.
1. Membwa n te Ekaretia a katauaki nakon te kaotioti are e bon onoti nakoia ngke a kakauongo nakon ao ni kamatebwai taeka ake a kairaki mai karawa n tain te maungatabu ni kabuta.
Ngke ko a katauraoiko ibukin te maungatabu ni kabuta, I kaoiko bwa kona iangoi raoi titiraki ake ko tangiraki bwa kona tia ni kaekai. Ibukin te katooto, ko na tangira te kairiiri ao te kakawakin mairoun te Uea ni kaineti ma kakaewenako ake ko a kaaitarai.
Kaeka nakon am tataro aika onoti a kona ni kainetaki n roko man te marooro teuana ke man te kibu n taeka aika a onoti. N tabetai kaeka a kona n roko man te taeka ae e taraa n akea irekerekena, kibu n taeka, ke anene. Te nano ae e onrake ma te kakaaitau ibukin kakabwaia n te maiu ao te nano ae korakora ni kan ongo n iira te taeka n reirei e na katauraoa te kawai ibukin te kaotioti ae onoti.
2. Tai aki kubara te rongorongo tii ibukina bwa ko a taneiai n te bwanaa anne.
Burabeti a tia n taainako n reireiniira man te kaokiokaki; bon te tua ibukin te wanawana. Ko na ongo taian boto n iango ao reirei aika kaokiokaki inanon te maungatabu ni kabuta. Kariaiai bwa N na kakoaua nakoimi: aio tiaki bukina bwa akean te karao bwai man baira ke te iango. Ti reitinako n ongo rongorongo iaon bwaai aika ti te arona ibukina bwa te Uea e reireiniira ao man katikui iaon ara iango ao nanora koaua aika rangi ni kakaawaki aika aan te maiu are akea tokina are a riai n ataaki ao ni mwakuriaki imwaain ae ti mwaing nakon bwaai ake tabeua. Te tiakateitei ae wanawana e kawenea moa aan ana kateitei imwaain ae e katea oona ma taubukina.
3. Taeka ake a taekinaki n te maungatabu ni kabuta a riai n riki bwa ara kambwati are e kotea te kawai ibukira n namwakaina aika a na roko.
Ngkana ti kakauongo nakon ao n iira ana wirikiriki te Tamnei are Raoiraoi, a na riki bwa ara Riaona, ae e na kairiira rinanon kawai aika tiaki atai, mwanono aika a na kataira ao maunga aika imwaaira (taraa 1–Nibwaai 16).
Man te tai are e moanaki te aonaaba, te Atua e atia ni kateirakeia burabeti ake a na taekina ana kantaninga mai i karawa nakoia aomata n aia tai. Bon tabera bwa ti na kakauongo ao ngkanne ni kammwakurii taian rongorongo are e katauraoi te Uea ibukira.
Tamara are i Karawa e nanoanga ao n tangira e a tia n aki mwaninga ao e na aki mwaninga Natina. N te bong aio, n aron taai ake ngkoa, E a tia n rineia abotoro ao burabeti. E reitinako ni kaota Ana taeka nakoia.
Ai kamimiira te karineaki ni kona n ongo ana rongorongo te Atua ibukira ngaira n tatabemaniira nako n tain te maungatabu ni kabuta! Ti a katauraoira raoi ibukin te kakabwaia ae korakora aio man te kairiiri mai karawa are a karokoa ana toro ake a tia n rineaki.
Ibukin aio bon te kakabwaia tai manuokinna.
©–2011 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki n te USA. Kariaiakaki n te Ingiriti: 6/10. Kariaiakaki rairana: 6/10. Rairan te First Presidency Message, September 2011. Kiribati. 09769 859
Anga reirei man te Rongorongo Aei
-
Booti ngkami ni wareka te rongorongo. Kaunga te utu ni kinai bwaai aika a na ongoraai n tain te maungatabu ni kabuta.
-
Buokia kairake n ataei ni kammwakuri taian reirei are e anga Beretitenti Uchtdorf, kaota nakoia te tiaata ibukin te Mataniwi ni Kabuta (a kuneaki inanon rongorongo man te maungatabu n te Riaona). Tuangiia bwa a na ataia bwa te Moan Beretitentii ao te Kooram n Abotoro are Tengaun ma Uoman a na taetae inanon te maungatabu ni kabuta. Kaungaia ataei bwa a na ongora nakon te maungatabu ao ni korea te tamnei ni buokiia bwa aonga n uringa bwa tera are a tia n reireinaki. Kaaro a kona ni kawara conferencegames.lds.org ibukin aia mwakuri riki ataei man te maungatabu.
Angaatai: tamnei iroun Les Nilsson