Mulwol ko Bin Somm’on e Presidency, October 2011
Michmich nib t’uf ko Fare Babyor ku Mormon
Bo’or ea duw nike yan ni gu par u toe’ban ea bet koreb e papa’ ni be chugur ninge yim’. Pin rok nge lo’ogrow ii bitir rok ea kar sakiy gad u toe’ban. Mea koel pa’ag mea ga’ar “Bisof gum nang ni nggum’. Mog ngog ko mang ea ra buch ko ya’al rog.”
Napan nikug mu’ i pi’ ea meybil mug guy ea triple combination u daken ea tebel rok. Mug fek mug gaay ea page u lan fare babyor. Mug gin ngay ni danuggay rogon machane kug tal ko guruy ni 40 ko Alma u lan fare Babyor ku Mormon. Mug bi’eg ea pi thin ney ngak:
“Musap, ke yoeg ba angel ngog, ni fapi ya’el ko gubin e gidii’, e chingiyal’ in’en ni yaedra chuw ko biney e dagur, … ma kan fekraed nga tafen e re Got ni’ir e pii’ e yafos ngoraed.
“Ma … fapi ya’el rok’ e pi’in nib mat’aw e yaedra thap nga lan ba dodow ni tagil’ e falfalaen’, ni konoeg e paradis ngay, ba dodow ni tagil’ e toffan, ba dodow ni tagil’ e gapas, ni ireram e gin ni yaedra toffan riy ko gubin e pi magawon roraed nge gubin e magafaen’, nge kirbaen’ roraed” (Alma 40:11–12).
Napan ni kug tabab i bi’eg marngegen fare Faskoyam’, mug guy owchean fare pum’on nike mat mea sminmin. Napan ni gumu’ mugog ea kefel ko fare tabinaw nib falel.
Yanmagid, ea guy fare pin nge fapi bitir ko magowan. Mug leam nga tomur ko nipan ra pagal nem ea fith ea tin nib riyul ma, u lan Fare Babyor ku Mormon e yib e fulweg thin ko duwear rok.
Fare Babyor ku Mormon ea kea yib boch ea tin nib falel ea michmich riy, nba un ea michmich ko gapas, paer nib puf’ rogoy, nge tow’ath ni “fa’an yaedra pigpig ngak’ fare Got ko fare nam, ni’ir Yesus Kristus” (Ether 2:12).
Meyib u fithik e pi guruy I babyor ney fapi michmich ko “falfalaen nib manemus” ngak e “pi’in ni yaedra fol’ ko pi motochiyel rok Got. Ya muguyed, kan tawa’ath nagreaed u fithik’ gubin ban’en, ni l’agruw mit, ni tinu fayleng nge tinu tharmiy” (Mosiah 2:41).
U lane fare page ea kea yog fare michmich ko “falfalaen’ roraed ni dabiyog I weliy rogon” ko picha’en niyad ra mang “talin e murwel u ta’an pa’ Got” ni ngad awuyweg ned ea pi walagdad (Alma 28:8; 29:9).
U lane fara page me kea yog fare michmich ni ran kunuy fapi gidii’ u Israel—ma reb e murwel ni gadad be rrin ni gadad be pi’ e tamachib nga gubin yang u faileng (muguy 3 Nephi 16; 21–22).
U lane fapi page ea kea michmicheg ni fa’anra gad ra maybil ku Got u daken fithngan Yesus Kristus, tabinaw rodad ea ran tow’ath nag (muguy 3 Nephi 18:21).
Ma ran fil ulane fapi page mara monog fare michmich nikan yog ni “rayib ngalan e yafos nge tibnaw romed yugboch e Kan ni Thothup ku Somoel, gelngiy ni ngan fol ko pi motochiyel rok, nge reb e mich nib gel nifan Fak Got.”1
Ma fithik fapi page ko Babyor ku Mormon e yib fare michmich rok Moroni ni yog ni fithik e meybil, nge yul’yul’, nge mich rok Kristus, ea rayog ni ngad nanged e tin riyul ko pi’ michmich ney “ko gelngin fare Kan ni Thothup” (muguy Moroni 10:4–5).
Niwad boch ea pi prophet, kugbe micheg e tiney ni rib riyul ni “bin thi’ibi riyul’ ea babyor u daken e faileng,”2 ni ir fare Babyor ku Mormon, ni kureb e m’ag rok Yesus Kristus. Pi thin ea kea yan u gubin yang u fayleng ma kea awuyeg ea picha niyad ra bi’eg miyad nanged ea tin nib riyul. Iraray ea mich rog ni Fare Babyor ku Mormon e ra thiley ea yafas. Gube athpeg ni gadad ra bi’eg biyay nga biyay. Mig gad ser nag ea mich rodad ko pi michmich riy ngak gubin ea pi bitir rok Got.
© 2011 ko Intellectual Reserve, Inc. Gubin ni mat’won ma bay. Nni yoloey u Meriken. Kan micheg ko thin nu Ngalis: 6/10. Micheg nag i pilyeg : 6/10. Ni pilyeg ko First Presidency Message, October 2011. Yapese. 09770 905
Rogon ni ngan Fil ko Biney e Mulwol
U lan fapi chep “kad pireg ned bo’or ea riyul ni ra faleg ea tin ni kea mathuk nag lalgen dad nge gubin ea magawon ni rayib nga lan ea tabinaw” (Teaching, No Greater Call [1999], 51). Napan ni gara ser nag ea mulwol ku President Monson ko fare tabinaw, mu yog ngorad ningar motoyil gad ko pi “michmich nib mangil” nike mu’ug u lane fare Babyor ku Mormon. Ma kura yog ni ngam ser nag ea fapi michmich nib tu’uf rom u lan fare Babyor ku Mormon.