1 Chiney o fakag, ku baʼaray boech banʼen ni gubaʼadag ni nggog ngom; ya gube pirʼeg ni be magaf anʼum ni morngaʼagen fare foskoyamʼ ko pi yamʼ.

2 Musap, gube yoeg ngom, ni chiney e dariy e foskoyamʼ—ara, nggog ni, nggu pingeg i yoeg, ni biney e dagur e dabi rich ngab dagur ni dabi yimʼ biʼid, ma biney e gafgow ni ma tay e dowef e dabi chuw—nge madaʼ nga tomuren fare wub ku Kristus.

3 Musap, ire ra yibnag fare foskoyamʼ ko pi yamʼ. Machane musap, tam fakag, fare foskoyamʼ e dawori taw nga napʼan. Chiney e nggu tamilngeg ngom banʼen nib miith mab riyulʼ; machane, bay boech banʼen nib yoʼor nib miith mab riyulʼ ni kan chaʼariy, ni dariy beeʼ ni manang ma kemus ni Got. Machane nggu dag ngom taʼabnʼen niʼir e kug ning u fithikʼ e lʼagaenʼ rog ngakʼ Got ni nggu nang—ni aram morngaʼagen fare foskoyamʼ.

4 Ere musap, bay bingyalʼ i banʼen ni kan dugliy ni ireram e ngiyalʼ ni gubin e piʼin ni kar mʼaed ma bay ra chuw gaed u paʼ e yamʼ. Ere ngiyalʼ innʼey ni bay yib e dariy beeʼ ni manang; machane Got e manang e re ngiyalʼ i nʼen ni kan dugliy.

5 Ere, e demutrug ko taʼab yay, ara lʼagruw yay, fa dalip yay, ni nge chuw e gidiiʼ u paʼ e yamʼ, ma dariy rogon; ya Got e manang gubin e pinnʼey; ma gub falaenʼ ngay ni gumnang ni aray rogon—ni bay bingyalʼ i banʼen ni kan dugliy ni gubin e gidiiʼ ma ra fos ko yamʼ.

6 Ere arfan nib tʼuf ni thingari yib bingyalʼ i banʼen u thilin e ngiyalʼ ni nga nimʼ nge ngiyalʼ ni ngan foskoyamʼ.

7 Ere chiney e nggu fith ko mang e rabuch ko pi yaʼel rokʼ e gidiiʼ u napʼan ni kar mʼaed nge madaʼ ko re ngiyalʼ i nʼen ni kan dugliy ni ngan foskoyamʼ?

8 Ere chiney e gomanga bayoʼor ko taʼabyay ni ngan fos ma dariy rogon; ya gathi gubin e gidiiʼ ni ma yimʼ taʼabyay, ere biney e dariy rogon; ya gubin ma taʼab ba rran rokʼ Got, ma gidiiʼ e ma fil napʼan banʼen.

9 Ere, bay bingyalʼ i banʼen ni kan dugliy ngakʼ e gidiiʼ ni yaedra fos riy ko yamʼ; ma bay ba ngiyalʼ i banʼen u thilin e ngiyalʼ ni yima yimʼ nge ngiyalʼ ni ngan foskoyamʼ. Ere chiney, mang e ra buch ko yaʼel ko gidiiʼ u napʼan e re ngiyalʼ innʼey, ere ireray e renʼen ni kug fith Somoel riy u fithikʼ e lʼagaenʼ rog ni nggu nang; ere baʼaray rogon morngaʼagen e nʼen ni gumnang.

10 Ma napʼan nra yib fare ngiyalʼ innʼem ni gubin e gidiiʼ ni ngar fos gaed, ma arame yaedra nang ni Got e manang gubin e pi yungiyalʼ i nʼen ni kan dugliy nga dakean e gidiiʼ.

11 Chiney, e baʼaray morngaʼagen fare dodow ko yaʼel u thilin e yamʼ nge foskoyamʼ—Musap, ke yoeg ba angel ngog, ni fapi yaʼel ko gubin e gidiiʼ, e chingiyalʼ inʼen ni yaedra chuw ko biney e dagur, arragon, fapi yaʼel ko gubin e gidiiʼ, ni demutrug ko yaed ba felʼ fa yaed ba kireb, ma kan fekraed nga tafen e re Got niʼir e piiʼ e yafos ngoraed.

12 Ma arame bay yibi buch, ni fapi yaʼel rokʼ e piʼin nib matʼaw e yaedra thap nga lan ba dodow ni tagilʼ e falfalaenʼ, ni kanoeg e paradis ngay, ba dodow ni tagilʼ e toffan, ba dodow ni tagilʼ e gapas, ni ireram e gin ni yaedra toffan riy ko gubin e pi magawon roraed nge gubin e magafaenʼ, nge kirbaenʼ roraed.

13 Ma arame bay yibi buch, ni fapi yaʼel ko piʼin ni tagan, arragon, ni yaed e piʼin ni kireb—ya musap, dariy roraed bayang fa ba guruy ko fare Kan ni Thothup rokʼ Somoel; ya musap, ra melʼeged ni ngar rinʼed e ngongol nib kireb ma gathi ngongol nib felʼ; ere fare yaʼel ku moʼoniyanʼ e ke ying nga fithikʼraed, me suwey doewraed—ma ireray e pichaʼ ni yira yinʼraed nga wuruʼ e gin suwon Got nga fithikʼ e lumor; ma bay ur yoer gaed, ma yaed be gelʼgelʼ, ma yaed be waʼachriy nguwelraed ko amith, ni aray rogon ni bachan e pi denen roraed, ma bachan e kar paged yaed ke gagyeg nagraed fare moʼoniyanʼ.

14 Ere chiney e ireray fare dodow ko fapi yaʼel rokʼ e piʼin nib kireb, arragon, nu fithikʼ e lumor, nge ba dodow ko tamdag nge murus roraed u napʼan ni yaed be chachngar nag fare puwaenʼ niʼir fare damomuw rokʼ Got ni ke yibi aw nga dakeanraed; ere aray rogon ni yaedra paer ko biney e dodow, ma ku aram rogon ngakʼ e piʼin nib matʼaw ni bay ra pired u fithikʼ e falfalaenʼ u paradis, nge yaeni madaʼ nga napʼan e foskoyamʼ.

15 Ere chiney, bay boech e gidiiʼ ni kar nanged fan e biney e dodow ko falfalaenʼ nge biney e dodow ko kirbaenʼ ko yaʼel, u mʼon ko fare foskoyamʼ, e immoy ni bin sommʼon e foskoyamʼ. Arragon, gube micheg ni yira yoeg ni ba foskoyamʼ, nge fare kiiʼ ni ra tay e yaʼel nge dagur nge gin nib milfaraed ngay ko falfalaenʼ fa kirbaenʼ, ni be yaen u rogon fapi thin ni kan weliy.

16 Ere musap, kun weliy bayay, ni bay ba foskoyamʼ ni sommʼon, nib foskoyamʼ nra tay e piʼin ni ur moyed, ara piʼin ni yaed bay e chiney, fa piʼin ni bay yib, nge yaeni madaʼ ko fare foskoyamʼ nra tay Kristus.

17 Ere chiney, e dabda lemniged ni biney e foskoyamʼ ni sommʼon, ni kan weliy morngaʼagen ni aray rogon, e ra mang foskoyamʼ ko gidiiʼ nge gin ni ke milfaraed ngay ni falfalaenʼ fa kirbaenʼ. Dabiyog ni ngam lemnag ni ireray e nʼen nibe yipʼ fan.

18 Musap, gube gaʼar ngom, Dabiyog; machane be yipʼ fan fare sul ko yaʼel nge dagur nga taʼabang bayay, rokʼ e piʼin ni aram ko pi rran rokʼ Adam iyib nga butʼ nge madaʼ ko fare foskoyamʼ ku Kristus.

19 Ere chiney, e fapi yaʼel nge pi dagur rokʼ e piʼin ni kan weliy morngaʼagen e gubin ma ra sul nga taʼabang u taʼ ab ngiyalʼ i banʼen, ni taʼab rogon nib piʼin kireb nge piʼin nib matʼaw, e gathi ire gube yoeg; mu pag nge felʼ u wunʼum ni gube yoeg ni yaed gubin ni yaedra fos; ara ngan pingeg i yoeg, ni foskoyamʼ ni yaedra tay e rabuch u mʼon ko fare foskoyamʼ nra tay e piʼin nra mʼaed u tomuren fare foskoyamʼ ni tay Kristus.

20 Ere chiney, tam o fakag, dagur yoeg ni foskoyamʼ ni yaedra tay e rabuch u napʼan fare foskoyamʼ ku Kristus; machane musap, gube yoeg ni rogon ni gube lemnag, ni fapi yaʼel nge fapi dagur rokʼ e piʼin nib matʼaw, e yaedra sul nga taʼabang bayay, u napʼan fare foskoyamʼ ku Kristus, nge fare yaen rokʼ nga tharmiy.

21 Machane dagur yoeg; ko napʼan e foskoyamʼ ni ra tay fa nga tomuren, machane baʼaray rogon ni gube yoeg, ni bay bingyalʼ i banʼen u thilin e yamʼ nge fare foskoyamʼ ko dagur, nge ba dodow ko yaʼel ni falfalaenʼ fa kirbaenʼ nge madaʼ ko ngiyalʼ ni ke dugliy Got ni fapi yamʼ e yaedra fos, mar suloed nga taʼabang bayay, ni lʼagruw ni yaʼel nge dagur, min fekraed ngar sakʼiy gaed nga pʼoewchen Got ni ngan pufthin nagraed u rogon e pi muruwel roraed.

22 Arragon, biney e ra yib nag fare sulyarmen ko fapinʼen niʼir e ke weliy fapi profet morngaʼagen.

23 Fare yaʼel e yira sulweg ko fare dagur, nge fare dagur e yira sulweg ko fare yaʼel; arragon, nge gubin i paʼay nge ayiy nge ʼulʼul u doewey ma yira sulweg ko kenggin; arragon, ni mus nga bagaf i piyen loelugey ma dabi yaen nga bayang; machane gubin banʼen ma yira sulweg nga rogon ni immoy nib felʼ rogon.

24 Ere chiney, tam o fakag, ireray fare sulyarmen niʼir faram e ke weliy fapi profet morngaʼagen—

25 Ma arame piʼin nib matʼaw e bayi gael ramʼenraed u lan gilʼilungun Got.

26 Machane musap, ba yalen e yamʼ nib buchbuch e bay yibi aw nga dakean e piʼin kireb; ya kar mʼaed ni dariy roraed e pinʼen nib lʼeag rogon ko pinʼen nib matʼaw; ya yaed ba alit, ma dariy banʼen nib alit ni rayog ni nge tafnay gilʼilungun Got; ya kaninʼraed nga wuruʼ e gin suwon Got, ma ke dugliy raed ni ngar kayed waʼamngin e pi muruwel roraed ara pi ngongol roraed, nib kireb; ma kar unumed uwan e kireb ko fare kap ni moʼoy.