1 Chiney e napʼan ni Ammon nge pi walagen e radar gaed u mathil ko fare binaw ko fapi Lamanites, ma musap gaed Aaron e milekag iyaen ko fare binaw ni mayoeg fapi Lamanites, ni Jerusalem, kar tunguyed fithingan ni boed fare binaw ni yib e pi chitamangraed riy kakrom; ni bay boech nga orel ko mathil ko fare binaw ku Mormon.

2 Ere chiney e fapi Lamanites nge fapi Amalekites nge fapi gidiiʼ ku Amulon e kar falʼeged binaw nib gaaʼ, ni kanoeg e Jerusalem ngay.

3 Chiney e fapi Lamanites e yaed roraed e ba ʼelʼel gumʼirchaʼraed, machane fapi Amalekites nge fapi Amulonites e ri kub gel e ʼelʼel u gumʼirchaʼraed ngoraed; ere kur guyed rogon ni nge gel boech e ʼelʼel u gumʼirchaʼen fapi Lamanites, ni nge almarin boech e denen nge ngongol roraed nib kireb.

4 Me yibi buch ni Aaron e yib ko fare binaw nu Jerusalem, me tabab ko sommʼon ko machib ngakʼ fapi Amalekites. Me tabab ko machib ngoraed u lan tagilʼ e moʼolung roraed, ya kar falʼeged tafen e moʼolung ni boed ni rinʼ fapi Nehors; ya boʼor i yaed fapi Amalekites nge Amulonites e boed rograed fapi Nehors.

5 Ere, napʼan ni yaen Aaron nga lan tagilʼ rebo moʼolung roraed ni nge machib ngakʼ fapi gidiiʼ, ma napʼan ni be non ngoraed, ma musap gaed bay ba Amalekite ni sakʼiy me tabab ko togopluw ngakʼ, ni be gaʼar: Mang e binir ni gabe micheg? Kaʼam guy ba angel? Mang fan ni dar mʼug e angel ngomaed? Amusap gathi pi gidiiʼ ney e taʼareb faraed felʼ ko gidiiʼ rom?

6 Me gur e kumoeg, ni faʼanra dab gu kalgaed ngaenʼmaed ma gamaed ra yimʼ. Buʼuw rogon ma gabe nang e tafnaey nge athap ko pi gumʼirchaʼ romaed? Buʼuw rogon ma kamnang ni bay tapgin ni nggu kalgaed ngaenʼmaed? Buʼuw rogon ma kamnang ni gathi gamaed bogi gidiiʼ nib matʼaw? Musap, kug toeyed e galasia, ma gamaed ma mukun nga taʼabang ni nggu liyoer gaed ku Got. Ba mich u wunʼmaed ni Got e ra thapeg gubin e gidiiʼ.

7 Ere gaʼar Aaron ngakʼ: Mich u wunʼum ni Fachaʼ ni Fak Got e ra yib ni nge bayuliy e gidiiʼ u fithikʼ e pi denen roraed?

8 Ma fare moʼon e gaʼar ngakʼ: Dar mich u wunʼmaed ni bay banʼen ni arragon ni gamnang. Dar mich u wunʼmaed e tiney e yalen nib meechiyang. Dar mich u wunʼmaed ni gur e gamnang e tin ni bay yib banʼen, ara be mich u wunʼmaed ni pi chitamam nge pi chitamangmaed e ur nanged morngaʼagen bogi banʼen ni ur weliyed, morngaʼagen ni bay yib.

9 Ere chiney e Aaron e tabab i tamilngeg fapi chep nib thothup ngoraed ni morngaʼagen e wub ku Kristus, nge ku morngaʼagen fare foskoyamʼ ko pi yamʼ, ma dakuriy rogon ngab yang me thap e gidiiʼ ma kemus nu dakean e yamʼ nge pi gafgow nra tay Kristus, nge fare bayul u rachaʼen.

10 Me yibi buch u napʼan ni ke tabab i weliy fan e pinnʼey ngoraed mar damomuw gaed ngakʼ, mar tabab gaed ko moning ngakʼ; ma dar motoyil gaed ko thin ni weliy.

11 Ere, napʼan ni guy ni dabra motoyil gaed ko thin rokʼ, me chuw u lan tagilʼ e moʼolung roraed, me yib ngab binaw ni kanoeg ni Ani-Anti, ma ireram e gin ni pirʼeg Muloki riy ni be machib nag fare thin ngoraed; nge ku Ammah nge pi walagen. Mar togopluw gaed ngakʼ boʼor e gidiiʼ ni morngaʼagen fare thin.

12 Me yibi buch ni kar guyed ni yaedra ʼelʼel nag gumʼirchaʼraed, ere ra chuw gaed ngar baed nga lan fare binaw nu Middoni. Mar machib niged fare thin ngakʼ boʼor e gidiiʼ, ma buchʼuw i yaed e michaenʼ ko fapi thin ni kar filed ngoraed.

13 Machane, Aaron nge boech i walagen e ni koelraed nga ninʼ raed nga kalbus, ma tin ni magaey e ra miil gaed nga wuruʼ fare binaw nu Middoni nga yuyang e binaw nib liyeg e ginnʼem.

14 Ma piʼin ninʼraed nga kalbus e boʼor bogi banʼen nra gafgow gaed riy, me pagraed Lamoni nge Ammon, min piiʼ garaed nge mad ni ngar chuw gaed ngay.

15 Ma kuranoed bayay iyaen ni ngar weliyed fare bugithin, ma aram rogon nni chuwegraed u kalbus ko yan sommʼon; ere aram rogon ni ur gafgow gaed.

16 Ere u ranoed iyaen ko yungi nʼen ni i wawliyraed fare Kan ni Thothup ku Somoel ngay, ni yaed be machib nag fare thin ku Got u lan gubin e pi tagilʼ e moʼolung ko fapi Amalekites, ara u langgin gubin e pi moʼolung ko fapi Lamanites nib puf rograed ngay.

17 Me yibi buch ni fare Somoel e tabab i tawaʼath nagraed, ni aram rogon nge madaʼ ko ngiyalʼ ni ke yoʼor e piʼin ni kar nanged e tin riyulʼ; arragon, boʼor e piʼin nra micheged u wunʼraed e pi denen roraed, nge pi yalen e pi chitamangraed, ni dematʼaw.

18 Me yibi buch ni Ammon nge Lamoni e ra suloew ko fare binaw nu Middoni iyaen ko fare binaw ku Ishmael, niʼir fare binaw ni taferaed.

19 Ma pilung i Lamoni e dabi pag ni Ammon e nge pigpig ngakʼ, ara mang tapigpig rokʼ.

20 Machane me guy rogon ni ngan toey ba tagilʼ e moʼolung u lan fare binaw ku Ishmael; me guy rogon ni gidiiʼ rokʼ, ara fapi gidiiʼ ni ur moyed u tanpaʼ, ni ngar moʼolung gaed nga taʼabang.

21 Ma ri falfalaenʼ ngoraed, me fil boʼor banʼen ngoraed. Ma ki weliy ngoraed ni yaed bogi gidiiʼ ni ur moyed u tanpaʼ, ma kar manged bogi gidiiʼ ni ke puf rograed, ni dakur moyed u tanpaʼ fare pilung, ni chitamangin; ya ke piiʼ e chitamangin ngakʼ niʼir e nge mang gaaʼ ko fapi gidiiʼ ni yaed bay u lan fare binaw ku Ishmael, ngo lan gubin e pi binaw nib liyeg.

22 Ma ki weliy ngoraed ni gomanga yog ni puf matʼawngiraed ni ngar liyoer gaed ngakʼ Somoel ni Got roraed u rogon ni yaed baʼadag, ni demutrug ko ngan e yaed bay riy, ni faʼanra bay u lan e binaw ni bay u tan suwon fare pilung i Lamoni.

23 Ma Ammon e machib ngakʼ fapi gidiiʼ ku pilung i Lamoni; me yibi buch ni fil ngoraed gubin banʼen ni morngaʼagen e pinʼen ni bay rogon ko tin nib matʼaw banʼen. Me ning chiylen ngoraed ni gubin e rran, u fithikʼ e lʼagaenʼ; mar motoyil gaed ko thin rokʼ, mar fol gaed ni rogon nra yog ko pi motochiyel ku Got.