1 Chiney e yibi buch u tomuren ni ke muʼ Amulek i yoeg e pi thin ney, mar chuw gaed ko fare ulung i gidiiʼ marbaed nga lan fare binaw nu Jershon.

2 Arragon, ma piʼin ni ke magaey roraed, u tomuren ni kar muʼ gaed i machib nag fare thin ngakʼ fapi Zoramites, e kur baed nga lan fare binaw nu Jershon.

3 Me yibi buch u tomuren ni piʼin nib gilbugwan ko fapi Zoramites e ra weliyed nga taʼabang morngaʼagen fapi thin ni kan machib nag ngoraed, mar damomuw gaed ni bachan fare thin, ya ke gatheay e wup roraed; ere dar motoyil gaed ko fapi thin.

4 Mar malʼog gaed ngar kunuyed gubin e gidiiʼ nga taʼabang u gaʼangin yang fare binaw, mar weliyed rogon ngoraed morngaʼagen fapi thin ni kan weliy.

5 Ere chiney e pi tiyugangʼ roraed nge priests roraed nge sensey roraed ma dar weliyed ni ngan nang chirogon rogon e tafnaey roraed; ere ur simithmithaeged i fith laniyaenʼ gubin fapi gidiiʼ.

6 Me yibi buch u tomuren ni kar nanged e tafnaey rokʼ gubin fapi gidiiʼ, ma piʼin nib mʼagaenʼraed ko fapi thin ni ke weliy Alma nge pi walagen e ni chuwegraed u lan fare binaw; ni yaed bayoʼor; ma kur baed nga lan fare binaw nu Jershon.

7 Me yibi buch ni arame Alma nge pi walagen e ra pigpig gaed ngoraed.

8 Chiney e fapi gidiiʼ ko fapi Zoramites e ra puwaenʼ gaed ngakʼ fapi gidiiʼ ku Ammon ni yaed bay u lan yu Jershon, ma chaʼ ni pilung ko fapi Zoramites, e beeʼ nib moʼon ni rib kireb, ere malʼog nge yaen ngakʼ fapi gidiiʼ ku Ammon ni baʼadag ni ngar chuweged u lan e binaw roraed gubin e piʼin ni kar chuw gaed roraed ngar baed nga lan e binaw roraed.

9 Me yoeg yu bugithin nib yoʼor ni be makʼar murus ngoraed. Machane chiney e fapi gidiiʼ ku Ammon e dar rus gaed ko pi thin roraed; ere dar chuweged yaed u lan e binaw, machane ra feked gubin e piʼin gafgow ko fapi Zoramites ni karbaed ngoraed; mar duruwʼiyedraed, mar piiʼed e mad ngoraed, mar piiʼed ngoraed e binaw ni ngar tafnayed; mar ayuwegedraed u rogon e tin ni yaed baʼadag banʼen.

10 Chiney e biney e nʼen e kʼaring e damomuw ko fapi Zoramites ngar damomuw gaed ngakʼ fapi gidiiʼ ku Ammon, ma aram mar tabab gaed ko maʼathuk nga fithikʼ fapi Lamanites mar kʼarnged raed nga kur damomuw gaed ngoraed.

11 Ere aray rogon ni fapi Zoramites nge fapi Lamanites e ra tabab gaed i tʼaer midlen e mael ni nge yaen ngakʼ fapi gidiiʼ ku Ammon, nge ku aram rogon ngakʼ fapi Nephites.

12 Ere aray rogon ni mus ko bin ragag nge medilip e duw ko fare lung ko fapi tapuf-oloboch nga dakean fapi gidiiʼ ku Nephi.

13 Ma fapi gidiiʼ ku Ammon e ra chuw gaed u lan fare binaw nu Jershon, marbaed nga lan fare binaw nu Melek, mar piiʼed tagilʼ e salthaw ko fapi Nephites u lan fare binaw nu Jershon, ni nge yog nra togopluw gaed ko salthaw ko fapi Lamanites nge salthaw ko fapi Zoramites; ere aray rogon ni tabab e mael nga thilin fapi Lamanites nge fapi Nephites, u lan e bin ragag nge meruk e duw ko fare lung ko fapi tapuf-oloboch; ere bay rebe babyor ni bay finni piiʼ boech nga mʼon ni morngaʼagen e pi mael roraed.

14 Ere Alma, nge Ammon, nge pi walagrow, nge fagal pagael ni fak Alma e ra suloed ko fare binaw nu Zarahemla, u tomuren ni kar manged talin e muruwel u lan paʼ Got ni kar feked boech fapi Zoramites nib yoʼor iyib ko kalngaenʼ; ma gubin e piʼin nra kalgaed ngaenʼraed e ni suruyraed nga wuruʼ e binaw roraed; machane bay e binaw ni taferaed u lan fare binaw nu Jershon, ma kar feked e talin e cham ni nge ayuwegraed, nge pi leʼengiraed, nge bitir, nge binaw roraed.

15 Ere Alma, e kari kirbaenʼ ni fan e denen ko gidiiʼ rokʼ, arragon nge fan e pi mael, nge puʼoeg rachaʼ, nge pi maleʼeg thin ni bay u fithikʼraed; nge bachan e ke weliy fare thin, ara ke malʼog ni ngan weliy fare thin, u fithikʼ gubin fapi gidiiʼ u lan gubin e binaw; ma bachan e ke guy ni ke tabab e ʼelʼel nga gumʼirchaʼen fapi gidiiʼ, mar puwaenʼ gaed ni bachan fini almarin fare thin, ere gumʼirchaʼen e ri kirbaenʼ ni rib gel.

16 Ere, guy rogon ni nge mukun fapi pagael ni fak nga taʼabang, ni nge yog ni midil ngoraed ni yaed gubin, ni ra bagyaed ma bay e tin ni nge chiyliy ngakʼ, ni morngaʼagen e pinʼen nib lʼeag rogon ko tin nib matʼaw. Ma bay romaed ba babyoren e pi motochiyel rokʼ, niʼir e ke piiʼ ngoraed u rogon e chep rokʼ.