1 Me yibi buch ni Alma nge Amulek e ni chiyliy ngorow ni ngar chuw gow u lan e re binaw nem; mar chuw gow, mar bow nga lan fare binaw nu Sidom; ere musap gaed, rabow ra pirʼegew gubin fapi gidiiʼ nra chuw gaed u lan fare binaw nu Ammonihah, ni yaed faram e ni chuwegraed min malang nagraed, ni bachan e michaenʼraed ko fapi thin ku Alma.

2 Ere ra weliyew ngoraed gubin e pinʼen ni buch rokʼ e pi leʼengiraed nge bitir roraed, nge tin salaprow, nge morngaʼagen i gelingrow ni chuwegrow u kalbus.

3 Nge ku Zeezrom ni ke aw nga butʼ ko mʼar u Sidom, ni ke yibe gawael nga dakean, ni sum ko gafgow ni ke tay laniyaenʼ ni bachan e ngongol rokʼ nib kireb, ya be lemnag ni Alma nge Amulek e dakur moyew ni kar mʼow; ma be lemnag ni kan liiʼrow kar mʼow ni bachan e denen rokʼ. Ere biney e denen ni ubchiyaʼ, nge ku boech e denen rokʼ nib yoʼor, e yib nag e magafaenʼ ko tafnaey rokʼ nge madaʼ ko ngiyalʼ ni ke ngalʼuweg nga dakean e amith, ni dakir chuw; ere me tabab ko gafgow ni gawael ni ke yib nga dakean nib gel.

4 Ere chiney e, napʼan ni rungʼag ni Alma nge Amulek e yow bay u lan e binaw nu Sidom, me yib e athamgil nge athap nga laniyaenʼ; me piiʼ e milwol ni ka chingiyalʼ nem nge yaen ngorow, ni be yoeg ni baʼadag ni nga rabow ngakʼ.

5 Me yibi buch ni ranow ni ku chingiyalʼ nem, ya kar fanayew fare milwol ni ke piiʼ ke yib ngorow; ma ranow rataw gow nga tafen Zeezrom ma ranow ngakʼ nga naʼun; ma ranow ra pirʼegew u dakean e bet rokʼ, nib mʼar, ni kari moʼowaer mab gel e gawael u dakean; nge tafnaey rokʼ e ki gafgow ko amith ni bachan e pi denen rokʼ; ma napʼan ni guyrow me kʼiyeg paʼ ngorow, me ning e wurengaenʼ rorow ni ngar gol nigew ko mʼar rokʼ.

6 Me yibi buch ni Alma e gaʼar ngakʼ, ni ke koel paʼ: Be mich u wunʼum fare gelingin Kristus nra thapegem?

7 Me fulweg ni gaʼar: Arragon, ke mich u wunʼug gubin fapi thin ni kam fil ngog.

8 Me gaʼar Alma: Faʼanra be mich u wunʼum ko fare bayul ku Kristus ma ra yog ni ngam gol.

9 Me gaʼar: Arragon, be mich u wunʼug e pi thin ni kamoeg.

10 Me meybil Alma ngakʼ Somoel, ni be gaʼar: O Somoel ni Got romaed, wureng anʼum ko re moʼon ney, mag gol nag ko mʼar rokʼ u rogon e michaenʼ rokʼ ngakʼ Kristus.

11 Ma napʼan ni yoeg Alma e pi thin ney, me burtal nge sakʼiy ngalang, me tabab ko yaen; ma biney ni rinʼ e gin oewchen gubin fapi gidiiʼ ngay; me garar morngaʼagen e rennʼey u dakean gaʼangin yang fare binaw nu Sidom.

12 Ere Alma e tawfe nag Zeezrom ngakʼ Somoel; me tabab ko ngiyalʼ nem iyaen nga mʼon ko machib ngakʼ fapi gidiiʼ.

13 Ere Alma e yarmiy ba galasia nga lan fare binaw nu Sidom, me yibliy e priest nge sensey u lan fare binaw, ni ngar tawfe niged ngakʼ fare Somoel e piʼin ni yaed baʼadag ni ngan tawfe nagraed.

14 Me yibi buch ni yaed bayoʼor nni tawfe nagraed; ya yaed be yib ni yu ulung u gubin yang e binaw nib liyeg yu Sidom, min tawfe nagraed.

15 Machane fatinem e gidiiʼ ni ur moyed u lan fare binaw nu Ammonihah, e kar pired nib ʼelʼel gumʼirchaʼraed nge laniyaenʼraed; ma dar kalgaed ngaenʼraed ko pi denen roraed, ni yaed be gonopiy ni gubin e gelingin ku Alma nge Amulek e yib rokʼ fare moʼoniyanʼ; ya yaed bay ko mich nge salap ku Nehor, ma demich u wunʼraed ni ngar kalgaed ngaenʼraed ko pi denen roraed.

16 Me yibi buch ni Alma nge Amulek, ni aram rogon ni Amulek e ke pag gubin e gol rokʼ, nge silber, nge pinʼen nib gaʼfan ni bay rokʼ, ni bay u lan fare binaw nu Ammonihah, ni fan ko fare thin ku Got, ma bachan e pi tafagear rokʼ nge chitamangin nge gidiiʼ rokʼ e kar piiʼed keruʼ raed ngakʼ;

17 Ere, tomuren ni ke yarmiy Alma fare galasia u Sidom, me guy nib tomgin ni ke dugil, arragon, me guy ni fapi gidiiʼ e ba tomgin ni kar dugiliyed e ʼelʼel u gumʼirchaʼraed, mar tabab niged e muding u pʼoewchen Got, mar tabab gaed i kunuyed yaed nga taʼabang ko tochuch roraed ni ngar liyoer gaed ngakʼ Got u mite altar, ma yaed be uthum oewchraed ma yaed be meybil ni darur tal gaed, ni gomanga yog nni chuwegraed rokʼ Moʼoniyanʼ, nge yamʼ, nge gafgow—

18 Ere woed ni kugog, bachan Alma e ke guy gubin e pinnʼey, ere fek Amulek ngar bow ko fare binaw nu Zarahemla, me fek nga tabinaew rokʼ, me piiʼ ngakʼ e tin nib tʼuf rokʼ nge gafgow ni be tay laniyaenʼ, me ayuweg nge gel e mich rokʼ ngakʼ Somoel.

19 Ma aray rogon ni mus e bin ragag e duw ko lung ko fapi tapuf-oloboch nga dakean e gidiiʼ ku Nephi.