1 Ere chiney e yibi buch ni Alma e sul ko fare binaw nu Gideon, u tomuren ni ke muʼ i fil ngakʼ fapi gidiiʼ nu Gideon boʼor banʼen ni dabiyog i yoloey, ma ke muguʼuliy fare yaram ko galasia, ni boed ni rinʼ u lan fare binaw nu Zarahemla, arragon, i sul ko naʼun rokʼ ni bay u Zarahemla ni nge toffan ko pi muruwel ni ke tay.

2 Ere aray rogon ni mʼay e bin mereb e duw ko lung ko fapi tapuf-oloboch nga dakean e gidiiʼ ku Nephi.

3 Me yibi buch u napʼan ni tabab e bin ragag e duw ko lung ko fapi tapuf-oloboch nga dakean e gidiiʼ ku Nephi, me chuw Alma u roem me milekag iyaen nga lan fare binaw nu Melek, nga baʼan ngael fare lulʼ nu Sidon, nga baʼan ngael u charen e mathil nu wuruʼ e binaw.

4 Me tabab i fil ngakʼ fapi gidiiʼ u lan fare binaw nu Melek u rogon fare yaram nib thothup rokʼ Got, ni ireram e gin ni kan pining ngay; me tabab i fil ngakʼ fapi gidiiʼ u lan gaʼangin yang fare binaw nu Melek.

5 Me yibi buch ni fapi gidiiʼ e rabaed ngakʼ ko gubin yang e pi mathil ko fare binaw ni bay nga baʼan wuruʼ e binaw. Mar thapeged e tawfe ni yaed gubin u gaʼangin yang fare binaw;

6 Meʼere napʼan ni muʼ ko muruwel rokʼ u Melek me chuw u rom, me milekag ni dalip e rran u baʼan leluʼoch ko fare binaw nu Melek; me yibi taw ngab binaw ni kanoeg ni Ammonihah.

7 Chiney e immoy nib yalen ko fapi gidiiʼ ku Nephi ni ngar tunguyed fithingan e pi yungi butʼ roraed, nge pi lanbinaw roraed, nge binaw nu arow roraed, arragon, ni mus ko pi binaw nu arow roraed nib achichig, nga tomuren i fithingan e chaʼ ni sommʼon ni paer riy; ere aray rogon ni kan rinʼ ko fare binaw nu Ammonihah.

8 Me yibi buch u napʼan ni Alma e yib ko fare binaw nu Ammonihah me tabab i machib nag fare thin rokʼ Got ngoraed.

9 Chiney e moʼoniyanʼ e kari chechʼey paʼ u gumʼirchaʼen fapi gidiiʼ ko fare binaw nu Ammonihah; ere dabra motoyil gaed ko fapi thin rokʼ Alma.

10 Machane Alma e muruwel u dakean e yaʼel, i cham nag ku Got u dakean e meybil ni almarin, ni nge piiʼ e Kan ni Thothup rokʼ nga dakean fapi gidiiʼ ni yaed bay u lan fare binaw; ni ngki piiʼ ngakʼ matʼawon ni gomanga yog ni tawfe nagraed nga dakean e kalngaenʼ.

11 Machane, ra ʼelʼel niged gumʼirchaʼraed, mar gaʼar gaed ngakʼ: Musap, gamaed manang ni gur Alma; ma gamaed manang ni gur e priest nib tolang ko fare galasia ni gur e kam yarmiy nib yoʼor yang u dakean e nam, u rogon e yalen rom; ma gamaed e gathi gidiiʼen e galasia rom, ma dar mich u wunʼmaed ko tinir e yalen nib meechiyang.

12 Ere chiney e gamaed manang ni aray rogon ni bachan e gathi gamaed gidiiʼen e galasia rom gamaed manang ni gur e dariy gelingim nga dakeanmaed; ma kam piiʼ fare tagil e tapuf-oloboch ngakʼ Nephihah; ere gathi gur e pilung ko tapuf-oloboch u dakeanmaed.

13 Ere chiney e napʼan ni yoeg fapi gidiiʼ e biney e thin, mar togopluw gaed ko gubin e thin rokʼ, mar oged tharan, mar thuw gaed nga dakean, mar guyed rogon ni nge chuw u lan e binaw roraed, me chuw u roem nge milekag iyaen ko fare binaw ni kanoeg e Aaron ngay.

14 Me yibi buch u napʼan ni be milekag iyaen e ngaram, ni ke muchuch nga butʼ ko kirbaenʼ, ni be yaen u fithikʼ e gafgow nga laniyaenʼ nge amith ko tafnaey, ni bachan e denen ko fapi gidiiʼ ni ur moyed u lan fare binaw nu Ammonihah, ere yibi buch u napʼan ni Alma e ke muchuch nga butʼ ko kirbaenʼ, ma bay ba angel rokʼ Somoel ni yibi mʼug ngakʼ, ni be gaʼar:

15 Gur e bafelʼ waʼatham, o Alma; ere, mu pug oewchem ngalang ngam falfalaenʼ, ya gur e baʼfan ni ngam falfalaenʼ; ya gur e kam yulʼyulʼ i koel falan fapi motochiyel ku Got ni aram ko ngiyalʼ ni thap e bin sommʼon e milwol ni yib rokʼ ngom. Musap, gag e gu piiʼ ngom.

16 Ere musap, ke lʼugeg ni nggu chiyliy ngom ni ngam sul ko fare binaw nu Ammonihah, mag machib bayay ko fapi gidiiʼ ko re binaw nem; arragon, ngam machib ngoraed. Arragon, nga moeg ngoraed, faʼanra dabra kalgaed ngaenʼraed ma fare Somoel ni Got e ra gatheayraed.

17 Ya musap, yaed be fil banʼen e ngiyalʼ ney ni gomanga yog nra gatheayed fare puf-matʼawon ko gidiiʼ rom, (ya aray rogon ni yoeg Somoel) niʼir e ba togopluw ko fare yalen, nge pi fek morngaʼag, nge fapi motochiyel niʼir e ke piiʼ ko fapi gidiiʼ rokʼ.

18 Chiney e yibi buch u tomuren ni Alma e ke thap e milwol ngakʼ rokʼ fare angel rokʼ Somoel me sul nib gur ko fare binaw nu Ammonihah. Me yaen nga lan fare binaw u yugub paʼ e kanawoʼ, arragon, ko kanawoʼ ni bay nga baʼan ni yimuch fare binaw nu Ammonihah.

19 Ma napʼan ni yaen nga lan fare binaw ma ke yib e bilig ngakʼ, me gaʼar ngakʼ beeʼ nib moʼon: Rayog ni ngam piiʼ ngakʼ ba tapigpig rokʼ Got nib sobutʼaenʼ banʼen ni nge kay?

20 Me gaʼar fare moʼon ngakʼ: I gag ba Nephite, ma gumnang ni gur ba profet nib thothup rokʼ Got, ya gur fare moʼon ni yoeg ba angel ngog u lan ba changar u malikʼay: Ni nggu fekem. Ere, muʼun ngog nga langgin e naʼun rog, mug piiʼ boech e ggan rog ngom ngam abich; ma gumnang ni gur e bay mmang tawaʼath ngog nge tabinaew rog.

21 Me yibi buch ni fare moʼon e arame fek faʼanem nga lan e naʼun rokʼ; ma fare moʼon e kanoeg Amulek ngakʼ; me fek e flowa nge thumʼag nge yibi tay nga pʼeowchen Alma.

22 Me yibi buch ni Alma e kay e flowa me fos; me yibliy Amulek nge tabinaew rokʼ, me oge magaer ngakʼ Got.

23 Ma tomuren ni ke muʼ ko abich ma ke fos me gaʼar ngakʼ Amulek: I gag Alma, me gag e tolang ko priest ko fare galasia rokʼ Got u gaʼangin yang e nam.

24 Ere musap, kan chiyliy ngog ni nggu machib nag fare thin rokʼ Got u fithikʼ gubin e pi gidiiʼ ney, u rogon e nangaenʼ ko yiʼiy nge prophecy; ma ugmoy u lan e re binaw ney ma dabra motoyil gaed ngog, ere ra chuweged gag u lan e binaw mu guwaen ni nggu piiʼ kerʼug ko re binaw ney ni gubinfen.

25 Machane musap, kan chiyliy ngog ni thingar gusul bayay ngug prophesy ngakʼ e pi gidiiʼ ney, arragon, ma nggu micheg i weliy ngoraed morngaʼagen e pi denen roraed.

26 Ere chiney, o Amulek, gur e bafelʼ waʼatham ni bachan e kam duruwiʼiyeg ma kam fekeg nga lan e tabinaew rom; u napʼan ni ke yib e bilig ngog, ni bachan e kug baley nag e abich rog ni ke yoʼor e rran.

27 Ere Alma e paer rokʼ Amulek nib yoʼor e rran u mʼon ni nge tabab ko machib ngakʼ fapi gidiiʼ.

28 Me yibi buch ni fapi gidiiʼ e ra almarin gaed boech ko pi denen roraed.

29 Me yib e milwol ngakʼ Alma ni gaʼar: Mman; ma kag yoeg ngakʼ e tapigpig rog i Amulek, ni ngam marow ngam prophesy gow ngakʼ e pi gidiiʼ ney, ni ngam gaʼar gow—Mu kalgaed ngaenʼmed, ya aray rogon ni yoeg fare Somoel, faʼanra dab mu kalgaed ngaenʼmed ma bay gu piiʼ e gechig nga dakean e pi gidiiʼ ney; arragon, dab gu chefeg e damomuw rog roraed.

30 Ere Alma e yaen, ma ku aram rogon ngakʼ Amulek, nga fithikʼ fapi gidiiʼ, ni ngar weliyew fapi thin rokʼ Got ngoraed; me suguyrow fare Kan ni Thothup.

31 Ma bay e gelingin ni kan piiʼ ngorow, ni aramfan ni deyog ni ninʼ row nga kalbus u tane butʼ; ara yog rokʼ beeʼ ni nge liiʼrow; machane dar muruwel gow nga gelingrow nge madaʼ ko ngiyalʼ ni kan mʼagrow ko gaf ma ninʼ row nga kalbus. Chiney, e kan rinʼ e biney ni nge yog ni dag Somoel gelingin ni bay rorow.

32 Me yibi buch ni arame ranow ngar tabab gow ko machib nge prophesy ngakʼ fapi gidiiʼ, u rogon fare nangaenʼ nge gelingin ni ke piiʼ Somoel ngorow.