1 Ere chiney e yibi buch u napʼan ni tabab e bin riliwʼ nge mereb e duw ko fapi tapuf-oloboch, me piiʼ Ammoron e milwol nge yaen ngakʼ Moroni ni baʼadag ni ngar thilyegew e kalbus.

2 Me yibi buch ni Moroni e ri thamiy e falfalaenʼ nib gel ko re bugithin ney, ya baʼadag ni pi ggan ni yibe piiʼ ni nge kay fapi kalbus ko Lamanites e nge paer ni nge kay e gidiiʼ rokʼ; ma ku baʼadag ni nge sul e gidiiʼ rokʼ ni nge piiʼ gelingin e salthaw rokʼ.

3 Chiney e fapi Lamanites e kar feked e ppin nge bitir ni yoʼor, ma dariy beeʼ nib ppin ara beeʼ nib bitir u fithikʼ gubin fapi kalbus ku Moroni, ara fapi kalbus ni ke fekraed Moroni; ere Moroni e tanmeg u waenʼ ni nge fek e gidiiʼ rokʼ nib kalbus ni bay upaʼ e Lamanites ni urngin nra yog.

4 Ere yoloey bangi babyor, me piiʼ nge yaen ngakʼ e tapigpig ku Ammoron, ni ku ireram e chaʼ ni yib nag e babyor ngakʼ Moroni. Ere chiney e baʼaray e pi thin ni yoloey nge yaen ku Ammoron, nibe gaʼar:

5 Musap, o Ammoron, kug yol ngom ni morngaʼagen e re mael ney ni kam fek iyib ko gidiiʼ rog, ara walagem e ke fek iyib ngoraed, ma kag be lemnag ni ngam ʼulʼul ngay u tomuren ni ke yimʼ.

6 Musap, gu baʼadag ni nggog banʼen ngom ni morngaʼagen fare Justice ku Got, nge fare sayden ko damomuw rokʼ nib gel, ni kan tining nga dakeanam ma kemus ni faʼan gara kalngaenʼ mag chuweg e salthaw rom ngam maroed nga lan e binaw romed, ara fare binaw nib milsuwon ngomed, niʼir fare binaw ku Nephi.

7 Arragon, gu baʼadag ni nggog ngom e pinnʼey ni faʼanra yog ni ngam motoyil ngay; arragon, gu baʼadag ni nggog ngom morngaʼagen fare infierno nib kireb nibe soen nag e piʼin ni ma mathang pogofan ni boed rogom nge walagem ni kuʼum rinʼew, ma kemus ni faʼan gimed ra kalngaenʼ mi gimed pag e pi golumor romed, ngam sul nge salthaw rom ko pi binaw romed.

8 Machane woed ni kam fek yathin e pinnʼey bayay, ma kam cham ngakʼ e gidiiʼ ku Somoel, ere ka aram rogon ni gube lemnag ni gararinʼ bayay.

9 Ere chiney e musap, kug falfalʼeged rogmaed kug pired ni ngam baed; arragon ma faʼanra dab mu tileg e tin ni gimed be nomeg, meʼere musap gaed, gimed ra miliy e damomuw ko fare Got ni kam feked yathin nga dakeanmed, nge madaʼ ko ngiyalʼ ni kan gatheaymed.

10 Machane, boed nib fos fare Somoel, e aram rogon ni ra yib e salthaw romaed ngomed ma faʼanra dab mu chuw gaed, ma dabki nʼuw napʼan ma ngam mʼaed, ya bay gu sulweged e pi binaw romaed nge nam romaed; arragon, ma gamaed ra paer ko taliw romaed ngo rarogon e Got romaed.

11 Machane musap, gube guy ni be mʼayfan e pinnʼey ni gube weliy morngaʼagen ngomed; ara gube guy ni gur e gab bitir nu infierno; ere nggu museg e babyor rog u roey ni gube yoeg ngom ni dab gu thilyeg e kalbus, ma kemus ni baʼaray rogon, faʼan gara pag beeʼ nib moʼon nge leʼengin nge bitir rokʼ, ni pulwon rebo kalbus rom; ere faʼanra aray rogon ni gara rinʼ, ma gura ʼun i thilyeg e kalbus.

12 Ere musap gaed, faʼanra dab mu rinʼed ni aray rogon, ma bay gubaed e salthaw rog ngomed; arragon, ni mus ko ppin nge bitir ni gidiiʼ rog ma gura tay talin e cham nga paʼraed, ma arame bay gub ngomed, ma bay gu leakmed iyaen nga lan e binaw romed, niʼir e bin mʼon e binaw nug tafnayed; arragon, ra yaeni aw ni puluwon e rachaʼ e rachaʼ, arragon, nge pogofan e pogofan; ma bay gub nag e mael ngomed nge yaeni madaʼ ko ngiyalʼ ni ke math oewchmed u fayleng.

13 Musap gaed, kar gu damomuw, ma ku aram rogon ko gidiiʼ rog; kam gayed rogon ni ngam thanged e pogofan romaed, ma kemus ni kug gayed rogon ni nggu ayuweged gamaed romed. Ere musap gaed, faʼan gimed ra gay rogon ni nga kum liiʼed gamaed ma bay ggayed rogon ni nggu liiʼed gimed; arragon, ma bay ggayed rogon ni nggu sulweged e binaw romaed, fare binaw ni bin mʼon i tafen maed.

14 Chiney e kug museg e babyor rog u roey. I gag Moroni; I gag e chaʼ nib gaaʼ ko fapi gidiiʼ ko Nephites.

15 Chiney e yibi buch ni Ammoron, e napʼan ni thap e rangi babyor ney ngakʼ, me damomuw; me yoloey bang e babyor nge yaen ngakʼ Moroni, ere baʼaray e pi thin ni yoloey, nibe gaʼar:

16 I gag Ammoron, fare pilung ko Lamanites; I gag walagen Amalickiah niʼir e kam thanged e pogofan rokʼ. Musap gaed, bay gu sulweg puluwon e rachaʼ rokʼ ngomed, arragon, ma bay gub nge salthaw rog ngomed ya dagur rus ngom nge thin rom.

17 Ya musap, pi chitamangmed e ra gafgow niged pi walagraed, ni arame ra iringed matʼawngiraed ko fare am niʼir e rib matʼaw nib milsuwon ngoraed.

18 Ere chiney e musap, faʼan gimed ra tay talin e cham romed nga butʼ mi gimed pagmed nge gagyeg nagmed e piʼin ni bay matʼawraed ko fare am, ma arame bay gguy rogon ni gidiiʼ rog e ngar tayed talin cham roraed nga butʼ ma dab kur mael gaed bayay.

19 Musap, gur e boʼor e makʼar murus ni kam tay ngog nge gidiiʼ rog; machane musap, dagur rus gaed ko pi makʼar murus rom.

20 Yug aray rogon machane, bay gupag ngan thilyeg e pi kalbus ni rogon ni gabe duwriy, ni gub falaenʼ ngay, ni nggu chaʼariy e ggan rog ni fan ko gidiiʼ rog ko mael; ma bay gubaed nag e mael ni gubinfen, ni nge mʼing fapi Nephites nga tanpaʼ maed ara nge math oewchraed ni gubinfen.

21 Ma morngaʼagen fare Got ni kamoeg ni kug feked yathin, e musap, dariy beeʼ ni arragon ni gamaed manang; ma kuʼar rogon gur; machane faʼanra bay beeʼ ni arragon, ma dag nanged machane gamaed be lemnag ni ke sunmiy maed ni boed gimed.

22 Ma faʼanra bay ba moʼoniyanʼ nge infierno, meʼere musap, dabi piiʼem ngam man e ngaram ni ngam pired fa piʼin walageg ni kam thang e fan roraed, ni yaed e kamoeg ni ka ranoed ngaram? Machane musap tiney e banʼen e dariy fan.

23 I gag Ammoron, ni gag beeʼ ko ganong ku Zoram, ni arame pi chitamam ni ra tawasariyed mar feked nga wuruʼ yu Jerusalem.

24 Ere musap e chiney, gag ba Lamanite ni dagur rus; ere musap, re mael ney e kan fek iyib ni nge yaen nga puluwon e gafgow ni kar tayed, ni ngar tayed me yog ngoraed matʼawngiraed ko fare am; ma kug museg e babyor rog u roey ngakʼ Moroni.