1 Ere chiney e yibi buch u lan e bin ragag nge taʼareb e pul ko bin ragag nge mereb e duw, ko bin ragag e rran ko pul, ni fapi salthaw ko fapi Lamanites e ni guy raed ni yaed be yib iyib ko fare binaw nu Ammonihah.

2 Ere musap gaed, fare binaw e kan falʼeg bayay, ma Moroni e ke tay buʼulung i salthaw u charen e pi mathil ko fare binaw, ma kar fuʼoged e butʼ ngalang nge liyeg ni ngar miith gaed nga foen ko pi gane gatʼing nge pi malang ko fapi Lamanites; ya musap gaed, ra cham gaed ko malang nge gatʼing.

3 Musap gaed, gube yoeg ni fare binaw nu Ammonihah e kun falʼeg bayay. Gube yoeg ngomed, arragon, immoy bang riy nni falʼeg; ma bachan fapi Lamanites ni kar gatheayed u bingyalʼ i banʼen ni bachan e denen ko fapi gidiiʼ, ere ra lemniged ni ireram e gin ni kura moem riy ngoraed bayay ni ngar koeledraed.

4 Machane musap gaed, rib gel e mʼingaenʼ nra tayed riy; ya musap gaed, fapi Nephites e kar fuʼoged e butʼ kar ufunged ngalang nge liyegraed, ni rib tolang ma deyog ko fapi Lamanites ni ngar paged e malang nge gatʼing roraed ngar kaen gaed riy, ara gomanga bay bang ni rayog ni ngar baed riy ngoraed, ma kemus nu langan e garog roraed.

5 Chiney e ngiyalʼ ney e fapi pilung ko kapten ko fapi Lamanites e ri balyangaenʼraed ni rib gel, ni bachan e gonop ko fapi Nephites ni kar falʼeged tagilʼ e gin ni ngar miith gaed ngay.

6 Chiney e fapi tiyugangʼ ko Lamanites e ra lemniged, ni bachan e yaed boʼor, arragon, ra lemniged ni yug rayog ni nga ranoed ngoraed ni boed rogon ni rrinʼed ko sommʼon; arragon, kur falʼeged rograed ni kar feked e shields, nge breastplate; ma kur falʼeged rograed ni kar chuw gaed nga mad ni nge upnguy doewraed, arragon, bogi mad nib dubʼag ni nge upnguy doewraed.

7 Ere kar falʼeged rograed ni aram rogon mar lemniged ni ke moem ni rayog ni ngar gelgaed ngakʼ pi walagraed mar koeledraed ngar fekedraed nga kalbus, ara ni liiʼraed min thʼethʼaebraed ni boed rogon ni yaed baʼadag.

8 Machane musap gaed, ri balyangaenʼraed ngay, ya kar falʼeged rograed ngar soen niged raed, u ba yalen ni dawor ni nang bingyalʼ u fithikʼ e pi bitir ku Lehi. Ere chiney e kar falʼeged rograed ni yaed be soen nag fapi Lamanites, ni ngar mael gaed ni boed rogon ni ke midil nag Moroni.

9 Me yibi buch ni fapi Lamanites, ara fapi Amalickiahites, e ri mat banʼen u oewchraed nga rogon ni kar falʼeged rograed ko mael.

10 Ere, faʼanra fare pilung i Amalickiah e ke yib nga butʼ nge chuw u lan fare binaw ku Nephi, ni be gafaliy e salthaw rokʼ, ma sana rayog ni guy rogon fapi Lamanites ngar og gaed ngakʼ fapi Nephites ko fare binaw nu Ammonihah; ya musap gaed, dariy fan u waenʼ rachaʼen e gidiiʼ rokʼ.

11 Machane musap gaed, Amalickiah e ire de yib nga butʼ ko mael. Ere musap gaed, fapi pilung ko kapten rokʼ e de mʼagaenʼraed ngay ni ngar cham gaed fapi Nephites ko fare binaw nu Ammonihah, ya Moroni e ke thilthilyeg rogon e gagyeg u fithikʼ fapi Nephites, ere fapi Lamanites e ra dubuyed ni bay tagilʼ e gin ni ngar miith gaed ngay ma dabiyog ni ngar baed ngoraed.

12 Ere ra miil gaed nga lan wuruʼ e binaw, mar feked e tamagif roraed ngar thelep gaed iyaen ko fare binaw ku Noah, ni yaed be lemnag ni ireram e gin migid nib felʼ ni ngar og gaed riy ngakʼ fapi Nephites.

13 Ya dar nanged ni Moroni e kari noemow nag ir, ara ke ufung e yoror nib noemow, ni fan ko gubin e binaw nib liyeg gaʼangin e nam; ere, ra thelep gaed iyaen ko fare binaw ku Noah nib dugilaenʼraed; arragon, nge pi pilung ko kapten roraed e rabaed nga mʼon ngar michmich gaed ni ngar liiʼed e gidiiʼ ko re binaw nem.

14 Machane musap gaed, ri kigin oewchraed ngay, ni fare binaw ku Noah, ni immoy ko sommʼon nib moʼowaer, ma chiney, e ke gel ni bachan Moroni, arragon, ma kari gel ko fare binaw nu Ammonihah.

15 Ere chiney, musap gaed, biney e ba gonop ni bay ku Moroni; ya lemnag ni yaedra rus aram ko fare binaw ni Ammonihah; ma bachan fare binaw ku Noah e ki immoy niʼir e thʼabi moʼowaer ko fare nam, ere yaedra lemnag ni ngar thelep gaed iyaen e ngaram ko mael; ma aray rogon ni i athapeg ni nge buch.

16 Ere musap gaed, Moroni e ke dugliy Lehi ni nge mang pilung ko kapten ko gidiiʼ ko binem e binaw; ma ku ireram fachaʼ i Lehi ni ur cham gaed fapi Lamanites u lan fare loway u baʼan ngek ko fare lulʼ ni Sidon.

17 Ere chiney e musap gaed i yibi buch, nu napʼan ni fapi Lamanites e kar pirʼeged ni Lehi e be gagyeg nag fare binaw me mʼingaenʼraed bayay, ya yaed be rus ku Lehi ni rib gel; machane pilung ko kapten roraed e kar michmich gaed ni ngar og niged e mael ko fare binaw; ere, ra feked e salthaw roraed iyib.

18 Chiney e musap gaed, fapi Lamanites e dabiyog ni ngar thumʼgaed u yug bayang nga lan e yoror roraed nib noemow ma kemus ni yigoʼ langan e garog, ni bachan e rib tolang e yoror ni kan ufung ngalang, ngo won ni kan fuʼog ke liyeg, ma kemus ni yigoʼ langan e garog.

19 Ere aray rogon ni fapi Nephites e ra falʼeged rograed ni ngar liiʼed gubin e piʼin ni yaedra nomeg ni ngar gararaw gaed u bugul e yoror nga barbaʼ, yaedra pag e malang nge gatʼing ngoraed.

20 Ere aray rogon ni kar falʼeged rograed, arragon, ra tayed ba ulung e tin baʼaray e gidiiʼ ni thʼabi gel roraed, ni bay e sayden roraed nge gawul roraed, ni ngar liiʼed gubin e piʼin ni yaedra nomeg ni ngar baed nga lan e yoror roraed u garog; ere aray rogon ni ra falʼeged rograed ni ngar cham gaed fapi Lamanites.

21 Me yibi buch ni fapi kapten ko fapi Lamanites e ra feked e salthaw roraed iyib ko gin bay e garog riy, mar tabab gaed ko cham ngakʼ fapi Nephites, ni yaed be nomeg lan e yoror roraed; machane musap gaed, un susuruyraed nga tomur u bingyalʼ ngo bingyalʼ, ni arame ni liiʼraed ngar mʼaed nib almarin.

22 Chiney e napʼan nra pirʼeged ni dabiyog ni ngar gel gaed ko fapi Nephites u garog, mar tabab gaed i chubuʼuy nga butʼ e yoror roraed ni nge yog ni mab woʼraed ngakʼ e salthaw roraed, ni nge yog ni puf rograed ko cham; machane musap gaed, u napʼan e biney ni yaed be nomeg ma ni liiʼraed ko malang nge gatʼing ni un pag ngoraed; ma deyog i suguy e won roraed ko butʼ ni ngan chubuʼuy nga langgin, me sug ko ldoew roraed nge gidiiʼ roraed ni ke madʼad.

23 Ere aray rogon ni fapi Nephites e ra gelgaed ko pi toʼogor roraed; ma aray rogon ni fapi Lamanites e ur nomeged ni ngar liiʼed fapi Nephites nge madaʼ ko ngiyalʼ ni gubin fapi pilung ko kapten roraed ma kan liiʼraed kar mʼaed; arragon, ma bayoʼor u rebo biyuʼ ko fapi Lamanites ni kan liiʼraed kar mʼaed; ma baʼan baʼaram ni fapi Nephites e dariy beeʼ riy nni liiʼ nge yimʼ.

24 Gonpon wugem e piʼin nra madʼad gaed, ni kar kaen gaed ko gane gatʼing ko fapi Lamanites ni yib u langan e garog, machane ur upong gaed ko shields roraed, nge breastplate roraed, nge head-plates roraed, ni arame kemus ni madʼad roraed e bay u ay raed, nib yoʼor riy e ba ubchiyaʼ.

25 Me yibi buch, u napʼan ni guy fapi Lamanites ni fapi pilung ko kapten roraed ni yaed gubin ma kan liiʼraed kar mʼaed mar miil gaed nga lan wuruʼ e binaw. Me yibi buch ni arame ra suloed ko fare binaw ku Nephi, ni ngar weliyed salapraed ko pilung roraed, i Amalickiah ni kar waer gaed, niʼir beeʼ nni gargeleg nib Nephite.

26 Me yibi buch ni damomuw ngakʼ e gidiiʼ rokʼ ni rib gel, ni bachan e dawori yog ngakʼ e tin nibe athapeg rokʼ fapi Nephites; dawori yog rokʼ ni nge fekraed nga kalbus.

27 Arragon, rigel e damomuw rokʼ, me gernag Got, nge Moroni, ma be yoeg ni be michmicheg ni ra unum e rachaʼ rokʼ; ni bachan e biney e ke fol Moroni ko motochiyel ku Got ni be tanmeg rogon ni nge ayuweg e gidiiʼ rokʼ.

28 Me yibi buch, ni baʼan baʼaram ni fapi gidiiʼ ku Nephi e ra oged e magaer ngakʼ Somoel ni Got roraed, ni bachan gelingin ni dariy e puluw riy e chuwegraed u paʼ e pi toʼogor roraed.

29 Ere aray rogon ni mus e bin ragag nge mereb e duw ko fare lung ko fapi tapuf-oloboch nga dakean fapi gidiiʼ ku Nephi.

30 Arragon, ma arame ʼulʼul e gapas u fithikʼraed, nge monʼog ni yib nga lan fare galasia ni bachan e motoyil nge liyoer ni kar tayed ko fare thin rokʼ Got, niʼir e weliy Helaman ngoraed, nge Shiblon, nge Corianton, nge Ammon, nge pi walagmed, arragon, nge piʼin ni kan yibliyraed ko fare yaram nib thothup rokʼ Got, ni kan tawfe nagraed nga dakean e kalngaenʼ, min piiʼraed ni ngar machib gaed u fithikʼ fapi gidiiʼ iyaen.