1 Ere chiney e yibi buch u tabolngin e bin riliwʼ nge lal e duw ko fare lung ko fapi tapuf-oloboch nga dakean fapi gidiiʼ ku Nephi, u tomuren ni kar ayliyed e gapas u thilin fapi gidiiʼ ku Lehi nge fapi gidiiʼ ku Morianton ni morngaʼagen e pi binaw roraed, ngu tomuren ni kar muguʼuliyed e bin riliwʼ nge lal e duw u fithikʼ e gapas;

2 Machane, denʼuw napʼan ni ratayed ni bay e gapas u dakean e nam, ya yibi tabab e maleʼeg thin nga fithikʼ fapi gidiiʼ ni morngaʼagen fare pilung ko tapuf-oloboch i Pahoran; ya musap gaed, bay boech fapi gidiiʼ ni yaed be athapeg ni bay nochiyang ko fare motochiyel ni ngan thilyeg.

3 Machane musap gaed, i Pahoran e dabi thilyeg ara pag fare motochiyel ni ngan thilyeg; ere, de motoyil ngakʼ e piʼin ni kar weliyed e tin ni yaed be athapeg nge tin ni yaed be lemnag u morngaʼagen e tin ni ngan thilyeg ko fare motochiyel.

4 Ere, piʼin ni yaed baʼadag ni ngan thilyeg fare motochiyel e ra damomuw gaed ngakʼ, ma yaed baʼadag ni nge dabki mang pilung ko tapuf-oloboch ko nam; ere yibi sum ba togopluw u fithikʼ e damomuw ni morngaʼagen e binem, machane yug de mapʼ e rachaʼ.

5 Me yibi buch ni piʼin ni yaed baʼadag ni Pahoran e ngan chuweg u gilʼ e tapufthin ni kanoeg e King-men ngoraed, ya yaed baʼadag ni fare motochiyel e ngan thilyeg ni nge buthug fare am nib puf rogon ya ngan sunmiy e pilung ko nam.

6 Ma piʼin ni yaed baʼadag ni Pahoran e nge paer niʼir e pilung ko tapuf-oloboch ko nam e ra feked nga dakeanraed e fithingan ni Freemen; ere aray rogon ni ra kiiʼ gaed u butʼ, ya fapi freemen e kar thʼaebed i micheg ara kar og niged yaed nga lan ba mʼag ni ngar chaʼariyed matʼawngiraed nge pi yalen e mich roraed u dakean ba am nib puf rogon.

7 Me yibi buch ni biney e gagyeg ko togopluw roraed e yaeni madleʼ nga butʼ u lungun e yoʼor. Ere yibi buch ni lungun e gidiiʼ ni yoʼor e yaed baʼadag e Freemen, nge Pahoran e ngki paer u gilʼ e tapufthin, niʼir e yib nag e falfalaenʼ nga fithikʼ pi walagen Pahoran nge ku gidiiʼ ni yoʼor ko fare puf-matʼawon, ni ku yaed e ra thanged e thin ko fapi King-men, ni arame dakur lemniged ni ngar togopluw gaed machane ngar ayliyed fare gagyeg u rogon e puf rogoy ko paer.

8 Chiney e piʼin ni yaed baʼadag e pilung e ireram e piʼin rabaed ko tabinaew nib pilung, ma yaed be gay rogon ni ngar manged pilung; ma be taʼfaraed e piʼin ni yaed be gay e gelingin nge matʼawon nga dakean e gidiiʼ.

9 Machane musap gaed, ngiyalʼ innʼey e rib gel e wogwog riy ko togopluw ni nge yib nga fithikʼ fapi gidiiʼ ku Nephi; ya musap gaed, Amalickiah e kʼaring bayay e damomuw nga lan gumʼirchaʼen fapi gidiiʼ ko fapi Lamanites ngar togopluw gaed ko fapi gidiiʼ ko fapi Nephites, ma be kunuy nga taʼabang e salthaw u gubin yang e binaw rokʼ, me tay talin e cham nga paʼraed, mar falʼeged rograed ko mael ni rib felʼ rogon; ya ke dugliy i yoeg ni nge unum e rachaʼ ku Moroni.

10 Machane musap gaed, bay dugyed ni michmich ni tay e dariy e gonop riy; machane, i falʼeg rogon nge salthaw rokʼ ni ngar baed ni mael ngakʼ fapi Nephites.

11 Ma pi salthaw rokʼ e dar yoʼor gaed ni boed rogon ni kuʼur moyed, ni bachan e bukun e biyuʼ e piʼin ni kar mʼaed nga paʼ fapi Nephites; machane yug aram rogon nib yoʼor i yaed e ke yimʼ, ma Amalickiah e ke kunuy nga taʼabang ba ulung i salthaw nib felʼ rogon mab yoʼor, ni arame daki rus ni nge yib nga lan fare binaw nu Zarahemla.

12 Arragon, ni mus ngakʼ Amalickiah me yib nga lan e binaw, niʼir e bay nga mʼon ko fapi Lamanites. Ma ngiyalʼ innʼem e lan e bin riliwʼ nge lal e duw ko fare lung ko fapi tapuf-oloboch; ma ku ngiyalʼ innʼem e ra tabab gaed ni ngar aw niged e choeʼ ko gagyeg ko pi togopluw roraed u morngaʼagen fare pilung ko tapuf-oloboch, i Pahoran.

13 Me yibi buch u napʼan ni rungʼag fapi gidiiʼ ni kanoeg e King-men ngoraed ni fapi Lamanites e yaed be yib ni mael ngoraed, mar falfalaenʼ gaed u lan gumʼirchaʼraed; ma dar feked e talin e cham roraed, ya kar puwaenʼ gaed ngakʼ fare pilung ko tapuf-oloboch, nge fapi gidiiʼ ko puf-matʼawon, ere dar feked talin e cham ni ngar ayuweged e nam roraed.

14 Me yibi buch u napʼan ni guy Moroni e biney, maki guy ni fapi Lamanites e yaed be yib iyib nga lan e mathil ko fare binaw, mari gele puwaenʼ rokʼ ni bachan e gelaenʼ ko pi gidiiʼ ni baʼaram ni ke muruwel ni almarin ni nge ayuwegraed; arragon, ri gel e puwaenʼ rokʼ; ma ir ni poloʼ e risug ko damomuw nib togopluw ngoraed.

15 Me yibi buch ni piiʼ bbugi thin, ni lungun e yoʼor, nge yaen ko am ko fare nam, ni baʼadag ni nge biʼeg, me piiʼ gelingin (Moroni) ni nge tawasariy fapiʼin nra chuw gaed ni ngar ayuweged e nam roraed fa nge liiʼraed ngar mʼaed.

16 Ya ireram e bin nib mʼon u waenʼ ni nge tileg e pi maleʼeg thin nge togopluw ni maʼangech u fithikʼ fapi gidiiʼ; ya musap gaed, ireray tabolngin gubin e pi gafgow roraed ni ka aram iyib. Ere yibi buch nni piiʼ ni boed ni baʼadag e gidiiʼ ni yoʼor.

17 Me yibi buch ni Moroni e chiyliy ni salthaw rokʼ e nga ranoed ni togopluw ngakʼ fapi King-men, ni ngar chuweged e yowlop roraed nge ufan pilung roraed min taʼareb nag toelingraed ko butʼ, ara dangay ma ngar feked talin e cham roraed ngar ayuweged rarogon e puf-matʼawon.

18 Ere yibi buch ni fapi salthaw e ranoed ngoraed; mar chuweged e yowlop roraed nge ufan pilung roraed, ni arame napʼan ni ra feked talin e cham roraed ni ngar mael gaed fapi salthaw ku Moroni min thʼethʼaebraed nga butʼ nge taʼareb tolngiraed ko butʼ.

19 Me yibi buch ni aningeg e biyuʼ ko fa piʼin nra chuw gaed ni kan thʼethʼaebraed nga butʼ ko sayden; ma pi gaaʼ roraed ni dan liiʼraed u napʼan e mael e ni fekraed nga ninʼraed nga kalbus, ya dariy napʼan e puf-oloboch roraed ko ngiyalʼ ney.

20 Ma tin ni magaey rokʼ fa piʼin ni kar chuw gaed, ni dubraed ni ngan thʼaebraed nga butʼ ko sayden, e ra paged yaed ngar uned ko fare dodowen e puf-matʼawon, min tawasar ngoraed ngar tininged farengi pow ko puf-matʼawon ngalang ko tagilʼ e damit roraed, ngu lan e pi binaw roraed, ma ngar feked talin e cham roraed ngar ayuweged e nam roraed.

21 Ere aray rogon ni Moroni e tileg fapi King-men, ni arame dakuriy beeʼ ni yimnang nibe fek fare fithingan ni King-men; ere aray rogon ni tileg e gelaenʼ nge yowlop ko fapi gidiiʼ ni yaed be yoeg ni yaed fare rachaʼ ni pilung; machane ni miliyraed nga butʼ nge sobutʼaenʼraed ni boed pi walagraed, ma ngar cham gaed u fithikʼ e mʼuthaenʼ ni nge yog nra chuw gaed u kalbus.

22 Musap gaed, yibi buch u napʼan ni Moroni e gapaseg e mael nge maleʼeg thin u fithikʼ e pi gidiiʼ rokʼ, me be yalʼuwegraed iyaen ko gapas nge yalen e paer, ma be tʼaer midlen ni ngan falʼeg rogoy ko mael ngakʼ fapi Lamanites, ere musap gaed, fapi Lamanites e karbaed nga lan fare binaw ku Moroni, ni bay ko mathil u dappʼelʼay.

23 Me yibi buch ni fapi Nephites e dawor ra muguʼul gaed u lan fare binaw ku Moroni; ere Amalickiah e tulufraed, me liiʼ boʼor i yaed. Ere yibi buch ni Amalickiah e suwey fare binaw, arragon, i suwey gubin fapi yoror roraed.

24 Ma fa piʼin ni kar miil gaed nga wuruʼ fare binaw ku Moroni e rabaed ko fare binaw ku Nephihah; nge ku fapi gidiiʼ ko fare binaw ku Lehi e ra kunuyed yaed nga taʼabang, mar falʼeged rograed ngar pired ni ke felʼ rograed ni ngar mael gaed fapi Lamanites.

25 Machane yibi buch ni Amalickiah e de pag fapi Lamanites ni nga ranoed ko fare binaw ku Nephihah ko mael, ya tay raed u butʼ u dappʼelʼay, ma ke pag e gidiiʼ u lan gubin e binaw ni ngar ayuweged mar matangiyed.

26 Ere ki ʼulʼul ngay ni aram rogon, nibe suwey boʼor e binaw, ni boed fare binaw ku Nephihah, nge fare binaw ku Lehi, nge fare binaw ku Morianton, nge fare binaw ku Omer, nga fare binaw ku Gid, nge fare binaw ku Mulek, nge gubin e tin bay nga mathil u dappʼelʼay u baʼan ngek.

27 Ere aray rogon ni fapi Lamanites e yog e binaw ngoraed nib yoʼor, u dakean e sabaenbaen ku Amalickiah me yoʼor e salthaw rokʼ ngar koeled e pi binaw nem, ni oren e kan yororiy nib noemow u rogon e yoror u tagilʼ e salthaw ku Moroni; ni oren e ke piiʼ yungi tagilʼ e miith ni nge felʼ rogon fapi Lamanites riy.

28 Me yibi buch ni ranoed ko mathil ko fare binaw ni Galwog, ni yaed be tuluf fapi Nephites ma yaed be liiʼ boʼor i yaed.

29 Machane yibi buch ni rabaed ra madaʼ gaed Teancum, niʼir e liiʼ Morianton me gur nga mʼon ko gidiiʼ u napʼan ni yaed be miil.

30 Me yibi buch niki gur nga mʼon ku Amalickiah, u napʼan niʼir nge salthaw rokʼ ni yoʼor e yaed be yaen ni gomanga yog ni ra suwey fare binaw ni Galwog, nge fare binaw nib kan nga leluʼoch.

31 Machane musap gaed yibi mʼingaenʼ ni yib Teancum nge gidiiʼ rokʼ ngar suruyed nga tomur, ya yaed bogi salthaw nib cheag ko mael; ya gubin e salthaw ku Teancum mar cham gaed fapi Lamanites u gelingraed nge faraed salap ko mael, ni arame ra gel gaed ngakʼ fapi Lamanites.

32 Me yibi buch ni ra gafgow nigedraed, ni arame ra liiʼedraed nge yaeni madaʼ ko ngiyalʼ ni ke awe lumor. Me yibi buch ni Teancum nge gidiiʼ rokʼ e ra nʼufed e pi tent roraed ngalang u mathil ko fare binaw ni Galwog; ma Amalickiah e nʼuf e pi tent rokʼ u mathil u dakean e yanʼ u dappʼelʼay, ere aray rogon ni un tulufraed.

33 Me yibi buch u napʼan ni ke nepʼ, me Teancum nge tapigpig rokʼ e ra sapochpoch gow iyaen nga wuruʼ e tamagif ni ke nepʼ, ma ranoew nga lan e tamagif ku Amalickiah; ma musap gaed, kar moloed ni gowa nimʼ ni bachan e ke liiʼraed e magaer, ko muruwel ni kar tayed nge gowael ni rran.

34 Me yibi buch ni Teancum e sapochpoch iyaen nga lan e tent ko fare pilung, me rugoey ba sarey nge aw nga gumʼirchaʼen; me liiʼ fare pilung nge yimʼ nib gur ni de od e pi tapigpig rokʼ.

35 Me sul bayay ni be simithmith iyaen nga lan e tamagif rokʼ, ere musap gaed, gidiiʼ e yaed be mol, ere pugraed me yoeg ngoraed gubin e pinʼen ni ke rinʼ.

36 Me yoeg ko salthaw rokʼ ni ngar falʼeged rograed, ya richey make od fapi Lamanites mar baed ngoraed.

37 Ere aray rogon ni mus e bin riliwʼ nge lal e duw ko fare lung ko fapi tapuf-oloboch nga dakean fapi gidiiʼ ku Nephi; ma aray rogon ni mus e pi rran rokʼ Amalickiah.