1 Ere chiney e yibi buch ni taw ngog bangi babyor ni yib rokʼ Ammoron, ni fare pilung, nibe yoeg ni faʼan gura pag fapi kalbus ko mael ni kug feked ma ra piiʼ fare binaw nu Antiparah ngomaed.

2 Ere gu piiʼ bangi babyor nge yaen ngakʼ fare pilung, nib dugilaenʼmaed ngay nib gaman e salthaw romaed ni nggu feked fare binaw nu Antiparah u gelingmaed; ma faʼanra nggu paged e kalbus ni fan ko re binaw nem ma nggu lemniged ni arame dag gonop gaed, ma kemus ni nggu paged e kalbus romaed ni ngan thilyeg ko binaw.

3 Ma Ammoron e siyeg e babyor rog, ya dabun ni ngan thilyeg e kalbus; ere gu tabab gaed i falfalʼeged rogmaed ni nggu waroed ko fare binaw nu Antiparah.

4 Machane fapi gidiiʼ nu Antiparah e ra chuw gaed ko fare binaw, mar miil gaed nga boech e binaw roraed, ni kar suweyed, ni ngar noemow niged; ere aray rogon ni fare binaw nu Antiparah e mul nga lani paʼ maed.

5 Ere aray rogon ni mus e bin riliwʼ nge meruk e duw ko fare lung ko fapi tapuf-oloboch.

6 Me yibi buch u napʼan ni tabab e bin riliwʼ nge mereb e duw, me taw e chugum ngomaed ni ggan nge talin e cham, ma ki yoʼor boech e salthaw romaed, ni yib ko fare binaw nu Zarahemla, nge pi binaw nib liyeg, me yaeni gaman e nelʼ e biyuʼ e gidiiʼ, nib kiiʼ u nelʼ i ragag ko fapi pagael ni fak fapi Ammonites ni faʼan rabaed ngar cheag gaed ngakʼ pi walagraed, fachi ulung rog ni lʼagruw e biyuʼ gathon. Ere chiney e musap, rug noemow gaed, arragon, ma kub yoʼor e ggan nni fek iyib ngomaed.

7 Me yibi buch ni aram rogon nug athapeged ni nggu ululiyed e mael ngakʼ e pi salthaw nni tayraed ni ngar matangiyed fare binaw nu Cumeni.

8 Ere chiney e musap, nggu dag ngom ni denʼuw napʼan mug muguʼuliyed e athap romaed; arragon, nug longbiyed, ni ke nepʼ fare binaw ni Cumeni, ko salthaw romaed nib gel, ara boech e salthaw romaed nib gel, nga buchʼuw riy nga mʼon ni nge thap ngoraed e chugum ni ggan nge talin e cham.

9 Me yibi buch nug toffan gaed ni kug liyeged wuruʼ fare binaw nib yoʼor e nepʼ; machane ʼug moloed nga dakean e sayden romaed, ma gamaed tay e matanag, ni nga dabi yib fapi Lamanites ngomaed ni ke nepʼ ngan liiʼ maed, niʼir e kar nomeged ni ke yoʼor yay; machane gubin yay ni ur nomeged ma i mapʼ e rachaʼ roraed riy.

10 Munmun me taw e ggan nge talin e cham roraed, ma arame ke yaen ni nga ranoed nga lan fare binaw ni ke nepʼ. Mar gin gaed ngay ni gamaed e Nephites, ya yaed be lemnag ni gamaed e Lamanites; ere, gu koeled nggu fekedraed nge pi chugum roraed.

11 Ma yug aram rogon ni fapi Lamanites e kan tel roraed e chugum roraed ni aray rogon, ma kuyaed be nomeg ni ngar pired ko fare binaw; ere yibi aw ni nggu feked e pi ggan nge talin e cham nem nggu piiʼed nge yaen nga Judea, ma kalbus romaed e nga ranoed ko fare binaw nu Zarahemla.

12 Me yibi buch ni de yoʼor e rran ni ke yaen ma fapi Lamanites e tabab iyaen ni nge mʼay e athap roraed ko ayuw ngoraed; ere mar paged fare binaw nga lan paʼmaed; ere aray rogon nug muguʼuliyed e tin nug nomeged u rogon ni nggu sulweged fare binaw ni Cumeni.

13 Machane yibi buch ni kalbus romaed e kayigi yoʼor, ni aray rogon ni kudag yoʼor gaed, ere yibi mʼug ni thingar gu tayed gubin e salthaw romaed ngar matangiyed raed, ara ngan liiʼraed ngar mʼaed.

14 Ya musap, yaedra poʼ nga wean ni yaed boʼor, ma yaedra cham ko malang, nge gul, ara demutrug banʼen ni rayog ni nge thap nga lani paʼraed, ni aram rogon nug liiʼed nib yoʼor nga lʼagruw e biyuʼ i yaed u tomuren ni kar paged yaed ngar manged kalbus ko mael.

15 Ere yibi aw nib tʼuf romaed, ni nggu thanged e yafos roraed, ara nggu matangiyed raed ni bay e sayden u paʼmaed, iyaen ko fare binaw nu Zarahemla; nge ku arragon ko ggan romaed ni dabki gaman e gidiiʼ romaed riy, ni yug aram rogon ni kug chagiyed ko ggan rok fapi Lamanites.

16 Ere chiney, u napʼan ni kari wogwog e pi gagyeg nem, me yibi aw nib gagyeg ni kari gaʼfan ni ngan lemnag rogon e pi kalbus ney ko mael; machane, deyog nug dugiliyed ni ngan piiʼraed nga ranoed nga lan fare binaw nu Zarahemla; ere gu melʼeged boech e gidiiʼ romaed, min pag gafalngin ngoraed ni ngar feked e kalbus romaed iyaen nga lan fare binaw nu Zarahemla.

17 Ere yibi buch ni rebo rran riy mar suloed. Ere chiney e musap, deyog nug fithedraed u morngaʼagen fapi kalbus; ya musap, fapi Lamanites e kar oggaed ngomaed, mar suloed u napʼan ni ke tʼuf ni ngar ayuweged gamaed nge siy gumul gaed nga lan paʼraed. Ya musap, Ammoron e ke malʼog ke yib e ayuw ni ggan roraed nge ku boech e salthaw nib yoʼor.

18 Ere yibi buch ni fapi gidiiʼ ni kug piiʼed ngar uned ko fapi kalbus, e ra baed ngar taw gaed u napʼan ni ke tʼuf ni ngar tilegedraed, ni ke chugur ni ngar gel gaed ngomaed.

19 Ma musap, fachi ulung rog nib achig ni lʼagruw e biyuʼ nge nelʼ i ragag e racham gaed nib tinoewey; arragon, riyaed ba miyuluy u pʼoewchen fapi Lamanites, mar liiʼed gubin e piʼin ni rabaed ngoraed.

20 Ma napʼan ni ke chugur ni nge wenig fatin ni ke magaey ko salthaw romaed ngakʼ fapi Lamanites, ma musap, fa gal lʼagruw i biyuʼ nge nelʼ i ragag e salthaw e kar pired ni yaed ba miyuluy ma darur digow gaed.

21 Arragon, ra fol gaed mar athamgiliyed ni ngar rinʼed gubin e motochiyel ni chirogon; arragon, ma boed rogon e mich roraed e aram rogon nrinʼ ngoraed; ma ku bay u wunʼug e pi thin ni roeged ngog ni pi chitiningraed e ke fil ngoraed.

22 Ere chiney e musap, pi pagael rog ney, nge fapi gidiiʼ ni kan melʼegraed ni ngar feked fapi kalbus, e ireray e pichaʼ ni nga doeged e soerokʼ ngoraed; ya yaed e kar liiʼed fapi Lamanites; ere kan suruyraed kar suloed ko fare binaw nu Manti.

23 Ma ke sul ngomaed fare binaw ni Cumeni, ma dawor gu mʼaed ni gamaed gubin ko sayden, machane boʼor i gamaed e ke yimʼ.

24 Ere yibi buch u tomuren ni ke miil fapi Lamanites, mug gur nggog ni gidiiʼ rog ni kar madʼad gaed e ngan chuwegraed u fithikʼ e piʼin ni kar mʼaed, mug guy rogon ni ngan falay nagraed min mʼag e madʼad roraed.

25 Me yibi buch ni bay lʼagruw miriʼay, ko fare lʼagruw i biyuʼ nge nelʼ i ragag, ni ke mʼay gelingraed ni bachan e rachaʼ roraed ni ke mapʼ nib yoʼor; machane, u rogon falʼngin Got, me gin oewchmaed ngay, ma kug falfalaenʼ gaed ko salthaw romaed ni gubin, ya dariy bagyaed ni ke yimʼ; arragon, ma ku dariy bagyaed u fithikʼraed nib lich e madʼad u doew.

26 Ere chiney, ayuw nni tay ngoraed e ri gin oewchen e salthaw romaed ni poloʼ ngay, arragon, ni dar mʼaed ma bay rebe biyuʼ i walagmaed ni kan liiʼraed kar mʼaed. Ma kug dugiliyed nga dakean e maʼangʼang u gelingin Got, ni bachan e mich roraed nga fithikʼ e pinʼen ni kan fil ngoraed ni nge michaenʼraed ngay—ni bay ba Got nib matʼaw, ma piʼin dabi maerwaer u wunʼraed, e yira ayuwegraed u dakean gelingin nib maʼangʼang.

27 Ere ireray rogon e mich rokʼ fa piʼin ni kug weliy morngaʼagen; ku yaed bbitir, mab miyuluy laniyaenʼraed, ma yaed be tay e pagaenʼ roraed ngakʼ Got ni gubin e ngiyalʼ.

28 Ere chiney e yibi buch u tomuren ni aray rogon ni kug tililiy niged e gidiiʼ romaed ni ke madʼad, ma kug kʼeyaged e ldoew romaed nge pi ldoew ko fapi Lamanites, ni rib yoʼor, ere musap, gu duwriyed Gid u morngaʼagen fapi kalbus nra uned ngoraed iyaen ko fare binaw nu Zarahemla.

29 Chiney e Gid e ire pilung ko kapten ko binem e ulung ni dugliyraed ni ngar matangiyed raed iyaen ko fare binaw.

30 Ere chiney, e baʼaray e pi thin ni yoeg Gid ngog: Musap, gu waroed iyaen ko fare binaw nu Zarahemla ni gamaed fapi kalbus rodaed. Me yibi buch ni gubaed gu madaʼ niged bogi spy ko salthaw romaed, ni kan lʼoegraed ni ngar sap niged e gin nibe toffan fapi Lamanites riy.

31 Mar yoer gaed ngomaed, ni yaed be gaʼar—Musap gaed, fapi salthaw ko Lamanites e yaed be thelep iyaen ko fare binaw nu Cumeni; ere musap gaed, yaedra apniy raed, arragon, ma yaedra liiʼ e gidiiʼ rodaed.

32 Me yibi buch ni fapi kalbus romaed e ra rungʼaged lamraed, niʼir e gelnag laniyaenʼraed; mar tabab gaed ni ngar togopluw gaed ngomaed.

33 Ere yibi buch ni bachan e togopluw roraed mug geringyed e sayden romaed ni nggu liiʼedraed. Me yibi buch nra miil gaed nib ulung u taʼabang iyib nga taban e sayden romaed, ni arame, boʼor i yaed e yimʼ riy; ma tin ni magaey roraed e ra miil gaed romaed.

34 Ere musap gaed, napʼan nra miil gaed ma dakiyog ni ngug koeledraed, ma gamaed thelep nib gur iyib ko fare binaw ni Cumeni; ma musap gaed, gu taw gaed mar napʼan ni nggu piiʼed e ayuw ngakʼ pi walagmaed i ayuweg fare binaw.

35 Ere musap gaed, kun ayuwegdaed bayay ngad chuw gaed u paʼ e pi toʼogor rodaed. Ere kari magaer Got; ya musap gaed, ire ke thapeg daed, arragon, ni ke rinʼ e biney e paʼ nib gaaʼ ni fan ngodaed.

36 Ere chiney e yibi buch u napʼan ni gag, Helaman, e kug rungʼag e pi thin ney ku Gid, ma rug thamiy e falfalaenʼ nib gel ni bachan falʼngin Got ni ayuwegmaed, ni nga dab gumʼaed ni gamaed gubin; arragon, mab paganʼug ngay ni yaʼel rokʼ e piʼin ni kar mʼaed e yaed bay u tafen e toffan ko Got roraed.