1 Ere yibi buch u napʼan ni tabab e bin guyey nge nelʼ e duw ko fare lung ko fapi tapuf-oloboch nga dakean fapi gidiiʼ ku Nephi, me Shilon e fek nge chaʼariy fa pinʼen nib thothup ni faʼan ni piiʼ Alma ngakʼ Helaman.

2 Ma ir beeʼ nib moʼon nib matʼaw, ni iyaen nib yalʼuw u pʼoewchen Got; ma i gay rogon ni nge rinʼ e tin nib mangil ni gubin e ngiyalʼ, ma nge fol ko pi motochiyel ko fare Somoel ni Got rokʼ; ni boed ni rinʼ walagen.

3 Me yibi buch ni Moroni e ki yimʼ. Ere aray rogon ni mus e bin guyey nge nelʼ e duw ko fare lung ko fapi tapuf-oloboch.

4 Me yibi buch nu lan e bin guyey nge medilip e duw ko fare lung ko fapi tapuf-oloboch, ma immoy ba ulung i gidiiʼ nib yoʼor, ni lal e biyuʼ nge aningeg miriʼay e pumoʼon, nge pi leʼengiraed nge bitir roraed, nra chuw gaed ko fare binaw nu Zarahemla nga ranoed nga lan fare binaw ni bay ko leluʼoch.

5 Me yibi buch ni Hagoth, ni bachan e ir beeʼ ni baʼadag ni nge nang boech banʼen, ere yaen nge yaen i toey ba barkow ngakʼ ni rib gaaʼ, u mathil ko fare binaw ni Galwog, u charen fare binaw ni Kanpag, me yinʼ nga maday u baʼan ngael e day, u charen boechi yang i binaw nib achichig radan ni sor ko nam ni bay nga leluʼoch.

6 Ere musap gaed, boʼor fapi Nephites ni yaen nga langgin e barkow mar tareg gaed nga ranoed ni kar feked e ggan nib yoʼor, ma kub yoʼor e ppin nge bitir nra feked; ma ranoed ni yaed ba yalʼuw iyaen nga lan e leluʼoch. Ere aray rogon ni mus e bin guyey nge medilip e duw.

7 Ma napʼan u lan e bin guyey nge meruk e duw, mare moʼon ney e ki toey boech e barkow. Ma bin sommʼon e barkow e kichel nge sul, maki yoʼor boech e gidiiʼ ni yaen nga langgin; ma kur feked e paaw nib yoʼor, ma kur tareg gaed bayay nib sor ko fare binaw nib kan nga leluʼoch.

8 Me yibi buch ni dakun rungʼag morngaʼagraed bayay. Ere gu lemniged ni kar lumoch gaed u lan e rigur. Me yibi buch niki tareg reb e barkow nge yaen; ma gin ni sor ngay e dag nanged.

9 Me yibi buch nu lan e biney e duw mab yoʼor e gidiiʼ ni yaen nga lan fare nam ni bay nga leluʼoch. Ere aray rogon ni mus e bin guyey nge meruk e duw.

10 Me yibi buch nu lan e bin guyey nge mereb e duw ko fare lung ko fapi tapuf-oloboch, ma ki yibi yimʼ Shiblon, ma Corianton e ke yaen ko fare binaw nib kan nga leluʼoch u barkow, ni nge fek e ggan iyaen ngakʼ e piʼin ni ka ranoed ko re binaw nem.

11 Ere yibi aw nib tʼuf rokʼ Shiblon ni nge piiʼ e pinnʼem nib thothup, u mʼon ni nge yimʼ, ngakʼ fare pagael ni fak Helaman, ni fithngan e Helaman, ni kan tunguy fithingan e chitamangin ngakʼ.

12 Ere chiney e musap gaed, gubin e pi yunginnnʼem ni kan yoloey nibe chaʼariy Helaman e ni yoloey min piiʼ nge yaen nga fithikʼ e gidiiʼ u gaʼangin yang e nam, ma kemus ni yigoʼ yungin baʼaram ni ke tay Alma chilen ni dab ni piiʼ e dan piiʼ.

13 Machane, pinnʼey e ngan chaʼariy nge paer nib thothup, min piiʼ u rebo mfen ngo reb; ere, u lan e re duw ney, e ni tay chilen e pinnʼey ngakʼ Helaman, u mʼon ni nge yimʼ Shiblon.

14 Me yibi buch ni ku lan e re duw ney ma bay boech e gidiiʼ nra togopluw gaed mar chuw gaed nga ranoed ngakʼ fapi Lamanites; ma kun kʼaring e damomuw ngoraed ngar togopluw gaed ko fapi Nephites.

15 Ma ku lan e re duw ney marbaed ni yaed bayoʼor ni mael ngakʼ fapi gidiiʼ ku Moronihah, ara ngakʼ fapi salthaw ku Moronihah, ma arame ni liiʼraed min tulufraed ngar suloed bayay ko pi binaw roraed, ma boʼor i yaed e ke yimʼ.

16 Ere aray rogon ni mus e bin guyey nge mereb e duw ko fare lung ko fapi tapuf-oloboch nga dakean fapi gidiiʼ ku Nephi.

17 Ere aray rogon ni mus e babyor ku Alma, nge Helaman ni fare pagael ni fak, nge Shiblon, nib pagael ni fak.