1 Me yibi buch ni ratayed e matanag ni nge matangiy fapi kalbus ko Lamanites, min tawasariy raed nga ranoed ngar kʼeyaged e pi ldoew roraed, arragon, nge kupi ldoew ko fapi Nephites ni kar mʼaed; me tay Moroni e gidiiʼ ni nge matangiyraed u napʼan ni yaed be rinʼ e pi muruwel roraed.

2 Ere Moroni e yaen ko fare binaw ku Mulek ni yow Lehi, me fek matʼawon fare binaw nge piiʼ ngakʼ Lehi. Chiney e musap gaed, chaʼaney i Lehi e beeʼ nib moʼon ni immoy rokʼ Moroni u badake gubin yay e mael ni tay; ma beeʼ nib moʼon ni boed Moroni, ere ra falfalaenʼ gow ngorow ni ka yow bafos; arragon, ri yow be tʼufegew yow, ma kube tʼufegrow gubin fapi gidiiʼ ku Nephi.

3 Me yibi buch u tomuren ni ke muʼ fapi Lamanites i kʼeyag e pi ldoew roraed nge pi ldoew ko fapi Nephites, min gafaliy raed ngar suloed nga lan fare binaw ni Galwog; ma Teancum, ni ke piiʼ Moroni matʼawon, e guy rogon ni ngar tabab niged e muruwel ni ngar kired ba won nge liyeg fare binaw, ara fare binaw, ni Galwog.

4 Me guy rogon ni ngar falʼeged e yoror ni gakiy; ere aray rogon nra tanmeged ni nge muruwel fapi Lamanites nge madaʼ ko ngiyalʼ ni ke liyeg fare binaw ni Galwog ni ngar langbiyed nga ba yoror nib gel ni kan falʼeg ko gakʼiy nge butʼ, ni rib tolang.

5 Ere re binaw ney e yibi mang bbinaw ni gilʼ e maling nib nʼuw napʼan iyaen; mu lan e re binaw ney e ra matangiyed fapi kalbus ko Lamanites riy; arragon, ni aram rogon u lan ba yoror ni yaed e roeged ngoraed ni ngar falʼeged nga paʼraed. Ere Moroni e ni tawasariy ni nge guy rogon fapi Lamanites ni ngar muruwel gaed, ni bachan e ba moem ni ngan matangiyraed u napʼan ni yaed be muruwel; ma baʼadag ni nge falʼeg rogon gubin e salthaw rokʼ ngar pired ni demutrug e ngiyalʼ ma ra yog ni ngar liiʼed fapi Lamanites.

6 Me yibi buch ni aray rogon ni gel Moroni nga reb e tin thʼabi gel e ulung ko salthaw ko fapi Lamanites, me suwey fare binaw ku Mulek, niʼir e immoy niʼir bang e yungin thʼabi noemow ko fapi yungi tagilʼ e miith ko Lamanites u lan e nam ku Nephi; ere aray rogon ni ufung bang i gilʼ e maling ni nge tay e kalbus rokʼ riy.

7 Me yibi buch ni arame daki nomeg e mael ngakʼ fapi Lamanites u lan e re duw nem, machane i piiʼ e muruwel ko gidiiʼ rokʼ ni ngar falʼeged rograed ko mael, arragon, mar falʼeged e yoror ni ngar yororiyedraed rokʼ fapi Lamanites, arragon, mang kur chuweged e pi ppin roraed nge bitir roraed ko uyngol nge gafgow, mar yog niged e ggan ko pi salthaw roraed.

8 Ere chiney e yibi buch ni fapi salthaw ko fapi Lamanites, ni yaed bay nga yimuch u dappʼelʼay u baʼan ngael e day, u napʼan ni demoy Moroni ni bachan boech e magawon ni bay u fithikʼ fapi Nephites, niʼir e yib nag e togopluw ni maʼangech nga fithikʼraed, e ra feked boech e binaw ko fapi Nephites, arragon, ni arame ra koeled e binaw roraed nib yoʼor u lan e ginem nam.

9 Ere aray rogon ni bachan e ngongol ni kireb ni yib nga fithikʼraed, arragon, bachan e togopluw ni maʼangech nge liyeb u fithikʼraed mar awgaed nga fithikʼ e gagyeg ni yoyowol ni madaʼad.

10 Ere chiney e musap gaed, bay banʼen ni nggog ni morngaʼagen fapi gidiiʼ ku Ammon, ni yaed, aram ko sommʼon, ma yaed bogi Lamanites; machane bachan Ammon nge pi walagen, ara nga noeg nu dakean fare gelingin nge thin ku Got, me michaenʼraed ngakʼ Somoel; ma kan fekraed iyib nga lan fare binaw nu Zarahemla, ma kaʼaram iyib nibe ayuwegraed fapi Nephites.

11 Ma bachan e michmich roraed ere kar tayed riy ni dabra feked talin e mael ngar cham gaed pi walagraed; ya kar michmich gaed ni dab kur puʼoeged e rachaʼ bayay; ma rogon e michmich roraed e kab felʼ ni yaedra yimʼ; arragon, faʼan manga boech ma kar paged yaed ngar mul gaed nga lan paʼ pi walagraed, ni faʼan gathi bachan e murnguy nge tʼufeg rokʼ Ammon nge pi walagen ngoraed.

12 Ere ireray fan nni fekraed nga lan fare binaw nu Zarahemla; ma kaʼaram ni gubin e ngiyalʼ nibe matangiyraed fapi Nephites.

13 Machane yibi buch u napʼan ni kar guyed e riyaʼ, nge pi kirbaenʼ nib gel nge pi gafgow ni yimʼ fapi Nephites u malngin ni bachraed, mar sug gaed ko murnguy mar adaged ni ngar feked talin e mael roraed ngar ayuweged e nam roraed.

14 Machane musap gaed, napʼan ni ka ranoed ni ngar feked e pi talin e mael roraed, me mʼing faraed u dakean e meʼeriyeg ni tay Helaman nge pi walagen, ya ke chugur ni ngar thʼaebed e michmich roraed.

15 Ere Helaman e rus nag ni yaedra thʼaeb mar mʼaed; ere gubin e piʼin ni kar og niged yaed nga lan ba mʼag e ni tawasar ngoraed ni ngar guyed pi walagraed ni nga ranoed u fithikʼ e pi gafgow roraed, u fithikʼ e gagyeg roraed nib yoyowol ko ngiyalʼ ney.

16 Machane musap gaed, yibi buch nib yoʼor e pagael ni fakraed, ni dawor ra uned nga lan ba mʼag ni nga dabra feked talin e mael ni ngar ayuweged yaed rokʼ e pi toʼogor roraed; ere ra kunuyed yaed nga taʼabang ko ngiyalʼ ney, ni gubin e piʼin ni rayog ni nge fek talin e mael, ma roeged ni yaed e Nephites.

17 Ere kar uned nga lan ba mʼag ni ngar cham gaed ni fan ko fare puf-matʼawon ko fapi Nephites, arragon, ni ngar ayuweged fare nam ni kar paged fan e pogofan roraed; arragon, ni kar og niged yaed nga lan ba mʼag ni dabra paged e puf-matʼawon roraed, machane yaedra cham ni demutrug rogon ni nge yog ni ngar ayuweged yaed nge fapi Nephites ni nge siy ranoed nga kalbus.

18 Ere musap gaed, immoy lʼagruw e biyuʼ i pagael nib felʼ yangren, nra og niged yaed ko re mʼag ney mar feked e pi talin e mael roraed ni ngar ayuweged e nam roraed.

19 Ere chiney e musap gaed, dariy bingyalʼ nib kireb thilraed ngakʼ fapi Nephites, ma chiney ko ngiyalʼ ney e kar manged ba ayuw nib gaaʼ; ya kar feked e pi talin e mael roraed, ma yaed baʼadag ni Helaman e nge mang gaaʼ roraed.

20 Ma yaed gubin ni pagael nib felʼ yangren, ma rib mʼuthaenʼraed u fithikʼ e athamgil, ngo gelingraed ngo faraed pasig; machane musap gaed, dawori mus aray—yaed bogi pagael ni yaed ba yulʼyulʼ u gubin e ngiyalʼ u fithikʼ gubin banʼen ni kan pag gafalngin ngoraed.

21 Arragon, yaed bogi pagael nib yulʼyulʼ ma rogon e rogon, ya kan fil ngoraed ni ngar koeled falan e pi motochiyel ku Got ma nga ranoed ni yaed ba yulʼyulʼ u pʼoewchen.

22 Ere chiney e yibi buch ni Helaman e yaen niʼir e gireng ko fare lʼagruw i biyuʼ e salthaw rokʼ nib felʼ yangren, iyaen ngakʼ fapi gidiiʼ ni bay u mathil ko farengi binaw ko yimuch u charen e day ko ngael.

23 Ma aray rogon ni mus e bin riliwʼ nge meruk e duw ko fare lung ko fapi tapuf-oloboch nga dakean fapi gidiiʼ ku Nephi.