1 Ere ku bayay, I gag, Alma, ri bachan e ke chiyliy Got ngog ni thingar gu fek Amulek nge un ngog nggu warow gu machib gow ngakʼ e pi gidiiʼ ney, ara fapi gidiiʼ ni ur moyed u lan fare binaw nu Ammonihah, me yibi buch u napʼan ni kug tabab ko machib ngoraed, ere ra tabab gaed ko togopluw ngog, ni yaed be gaʼar:

2 Gur miniiʼ? Gabe lemnag ma ra mich u wunʼmaed e mich rokʼ taʼbeeʼ, ni yug aram rogon ni nge machib nag ngomaed ni fare fayleng e ra chuw?

3 Chiney e darur nanged fan fapi thin ni kar weliyew; ya dar nanged ni fare fayleng e ra chuw.

4 Ma kur gaʼar gaed: Dabi mich u wunʼmaed ko thin romew ni faʼanra ngam prophesy nigew ni re fayleng ney nib gaaʼ e rayog ni ngan gatheay u lan taʼareb e rran.

5 Chiney e dar nanged ni Got e rayog ni nge rinʼ e tinem e maʼangʼang, ya yaed bogi gidiiʼ nib ʼelʼel gumʼirchaʼraed mab ʼelʼel laniyaenʼraed.

6 Ere ra gaʼar gaed: Miniiʼ Got, ni nge lʼoeg taʼbeeʼ ni bay matʼawon nga fithikʼ e pi gidiiʼ ney, ni nge weliy ngoraed e tin riyulʼ ni morngaʼagen e tiney e maʼangʼang?

7 Mar kan gaed nga mʼon ni ngar koeled gag; machane musap gaed, dar rinʼed. Ere gu sakʼiy u fithikʼ e pagaenʼ ni nggu non ngoraed, arragon, rib paganʼug ni kug micheg ngoraed, nug gaʼar:

8 Musap gaed, O gimed e re mfen ni tadenen mab kireb, uw rogon ma kam paged tilin fare yalen ko pi chitamangmed; arragon, uw rogon ni erfini papay ni kam paged tilin fapi motochiyel rokʼ Got.

9 Dakir yib ngaenʼmed ni chitamangdaed, i Lehi, e chuw u Jerusalem ni Got e chuweg? Dakir yib ngaenʼmed ni yaed gubin niʼir e powiʼiyraed u wuruʼ e binaw iyaen?

10 Ma erfini papay ni kam pagedtilin urngin yay ni chuweg e pi chitamangdaed u paʼ e pi toʼogor roraed, me ayuwegraed ni nga dab ni liiʼraed, ni boed rogon ni chuweg raed u paʼ pi walagraed?

11 Arragon, ma faʼan manga boech ni gathi bachan gelingin ni dariy e puluw riy, nge murnguy rokʼ, nge gumʼaenʼ rokʼ ngodaed, ma rib mudugil ni kan thang oewchdaed u fayleng ni kub kakrom u mʼon ko ngiyalʼ ney, ma sana ke milfadaed nga ba dodow ko gafgow nge kirbaenʼ ni dariy nʼumngin i napʼan.

12 Musap gaed, chiney e gube yoeg ngomed ni be chiyliy ngomed ni ngam kalgaed ngaenʼmed; ma faʼanra dab mu kalgaed ngaenʼmed, ma dariy liyiben ni ngam tafnayed gilʼilungun Got. Machane musap gaed, dawori mus aray—ke chiyliy ngomed ni ngam kalgaed ngaenʼmed, fa dangay ma ra thang oewchmed u fayleng; arragon, ra gechig nagmed nga fithikʼ e damomuw rokʼ, ma rangi dodow ko damomuw ni ke taw ngay e dabki fek oewchen romed.

13 Musap gaed, dakir yib ngaenʼmed fapi thin ni yoeg ngakʼ Lehi, ni yoeg ni gaʼar: Nʼumngin i napʼan ni gimed rafol ko pi motochiyel rog, ma ra felʼ rogmed u dakean e nam? Nge ku bayay ki gaʼar: Nʼumngin i napʼan ni dab mu fol gaed ko pi motochiyel rog ma bay ni chuwegmed rokʼ Somoel.

14 Ere chiney e gubaʼadag ni ngam tayed u wunʼmed, ni nʼumngin i napʼan ni fapi Lamanites e dar fol gaed ko fapi motochiyel ku Got, ma kan chuwegraed rokʼ fare Somoel. Ere chiney e kad guyed ni fare thin rokʼ Somoel e ke yibi magagyel u dakean e biney e paʼ, ma fapi Lamanites e kan chuwegraed rokʼ, ni aram ko sommʼon nra tabolngin niged e pi ngongol roraed ni kireb u lan fare nam.

15 Yug aram rogon machane gube yoeg ngomed, nib waer e pufthin ni yira tay ngoraed ko bin ni yira tay ngomed, ni faʼanra ngam pired u fithikʼ e pi denen romed, arragon, ka yugub moem boech ngoraed u lan e biney e yafos ngomed, ma kemus ni faʼan gimed ra kalngaenʼ.

16 Ya rib yoʼor bogi michmich nni ognag ko fapi Lamanites; ya bachan fapi yalen ko pi chitamangraed ni tay raed ko dodow ni kireb; ere fare Somoel e ra wurengaenʼ ngoraed me nʼuw nag napʼan e paer roraed u dakean e nam.

17 Ma bay napʼan nra taw ngay ma bayi mich u wunʼraed ko thin rokʼ, mar nanged kirbin fapi yalen ko pi chitamangraed; ma boʼor i yaed e ra thap, ya fare Somoel e ra wurngaenʼ ngakʼ gubin e piʼin ni ra ur pininged fithingan.

18 Machane musap gaed, gube yoeg ngomed ni faʼan gimed ra ʼulʼul i rinʼ e pi ngongol romed ni kireb ma dabi nʼuw napʼan e pi rran romed u dakean e nam, ya fapi Lamanites e yira piiʼraed ngar baed ngomed; ma faʼanra dab mu kalgaed ngaenʼmed ma yaedra yib u bangi yalʼ i nʼen ni dab mu nanged, ma bay ni gatheaymed; nra yaen u rogon fare damomuw rokʼ Somoel.

19 Ya dabi pag ni ngam pired u fithikʼ e pi denen romed, ni ngam gatheayed e gidiiʼ rokʼ. Gube yoeg ngomed, Dangay; kub mʼag u waenʼ ni nge pag ni fapi Lamanites e ngar gatheayed gubin e gidiiʼ rokʼ ni kanoeg ni fapi gidiiʼ ku Nephi, ni faʼanra yog ni ngar mul gaed nga fithikʼ e pi denen nge pi ngongol ni kireb, u tomuren ni ke yog ngoraed e tamilang nge llowaenʼ ni yib ngoraed rokʼ fare Somoel ni Got roraed.

20 Arragon, ni bachan e yaed bogi gidiiʼ ni ri yaed ba tʼuf rokʼ Somoel; arragon, ni bachan e ri yaed ba tʼuf rokʼ ko gubin e pi nam, mfen, thin, nge gidiiʼ; u tomuren ni kar nanged gubin banʼen, u rogon e lʼagaenʼ roraed, nge mich roraed, nge pi meybil, ko pinʼen ni ke yaen, nge tin bay, nge tin ni bay yib;

21 U tomuren ni mʼug fare Kan ni Thothup rokʼ Got ngoraed; u tomuren ni ke non e angel ngoraed, ngo tomuren ni ke non Somoel ngoraed; ngo tomuren ni ke yog ngoraed fare nangaenʼ ko prophecy nge nangaenʼ ko yiʼiy, nge ku boech e tawaʼath nib yoʼor, ni fare tawaʼath ko welthin u dakean bolowthey, nge fare tawaʼath ko machib, nge fare tawaʼath ko Kan ni Thothup, nge fare tawaʼath ko piliyeg thin;

22 Arragon, ma bachan ni ke thapegraed Got nga wuruʼ fare nam nu Jerusalem, u paʼ fare Somoel; nge bachan ni kan ayuwegraed ko uyngol, nge mʼar, nge gubin e liliy ko urngin mit; ngo bachan ni kar yoʼor gaed ma kar dumʼmidil gaed ko mael, ni nge dabiyog ni ngan liiʼraed; nge bachan ni kan chuwegraed u kalbus u bayay ngo bayay, nge bachan ni kan chaʼariy ma kan ayuwegraed iyib ke madaʼ ko ngiyalʼ ney; ere ke felʼ rograed ke madaʼ ko ngiyalʼ ni kar falaʼab gaed ko gubin mit banʼen—

23 Ere chiney e musap gaed gube yoeg ngomed, ni faʼanra pi gidiiʼ ney, ni yaed e ke yog ngoraed e tawaʼath nib yoʼor u paʼ fare Somoel, mar denen gaed nib togopluw ko fare tamilang nge llowaenʼ ni bay roraed, ma gube yoeg ngomed ni faʼanra aray rogon, ni faʼanra ngar mul gaed nga fithikʼ e denen, ma rib gel e palog riy nib waer e pufthin ni yira tay ko fapi Lamanites ko bin ni yira tay ngoraed.

24 Ya musap gaed, fapi michmich rokʼ fare Somoel e ʼulʼul nga dakean fapi Lamanites, machane dariy nga dakeanmed ni faʼan gimed ra denen; ya gathi fare Somoel e ke michmich nib tamilang make yoeg nib dugil, ni faʼan gimed ra togopluw ngakʼ ma yira thang oewchmed u dakean e fayleng?

25 Ere chiney e ireray fan, ni rayog ni dab ni gatheaymed, fare Somoel e ke lʼoeg e angel rokʼ ni nge yibi mʼug ngakʼ boech e gidiiʼ rokʼ nib yoʼor, ni be yoeg ngoraed ni thingar ranoed iyaen ngar weliyed nib almarin ko pi gidiiʼ ney, ni nge lungraed: Mu piiʼed keruʼ med ko denen ni gimed be rinʼ, ya fare gilʼelung nu tharmiy e ke chugur;

26 Ma daki yoʼor e rran e dabaʼ ma fachaʼ ni Fak Got e bay yib u fithikʼ e rir rokʼ; ma rir rokʼ e ire rir ko fachaʼ ni Maʼagirag Rokʼ e en Chitamangiy, nib sug ko murnguy, nge matʼaw, nge riyulʼ, mab sug ko gumʼaenʼ, wurengaenʼ, nge athamgil, mab papay ni nge motoyil ko gidiiʼ rokʼ me piiʼ e fulweg ko meybil roraed.

27 Ere musap gaed, ra yib ni nge bayuliy e piʼin ni yira tawfe nagraed nga dakean e kalngaenʼ, u dakean e mich nga fithingan.

28 Ere, mu falʼeged rogon kanawoʼen Somoel, ya fare ngiyalʼ innʼem e ke chugur ngay ni nge gubin e gidiiʼ ma ngar feked puluwon e pi muruwel roraed, ni be yaen u rogon e pi muruwel ni kuʼur rinʼed—ni faʼanra ur pired nib matʼaw, ma rayog ni ngar thap gaed ni poloʼ, u dakean fare gelingin nge ayuw rokʼ Yesus Kristus; ma faʼanra ba kireb ma rayog ngoraed wengan ni gafgow ni tinoewey, u dakean fare gelingin nge kalbus ku moʼoniyanʼ.

29 Ere chiney e musap gaed, ireray e thin rokʼ fare angel, ngakʼ fapi gidiiʼ.

30 Ere chiney, o pi walageg ni rib tʼuf rog, ya gimed pi walageg, ma thingar mu tʼuf gaed, ma thingar mu rinʼed e pi muruwel nib lʼeag fan ko kalngaenʼ, ni bachan e kam ʼelʼel niged gumʼirchaʼmed ko fare thin ku Got, nge bachan e gimed bogi gidiiʼ ni kam malog gaed ma kam mul gaed ko tin riyulʼ.

31 Chiney e yibi buch u napʼan ni gag, Alma, e kug weliy e pi thin ney, ma arame, fapi gidiiʼ e ra damomuw gaed ngog ni bachan e kugog ngoraed ni yaed bogi gidiiʼ nib ʼelʼel gumʼirchaʼraed mab ʼelʼel laniyaenʼraed.

32 Ma ku bachan e kugog ngoraed ni yaed bogi gidiiʼ ni kar malog gaed ma kar mul gaed ko tin riyulʼ ere ra damomuw gaed ngog, mar gayed rogon ni ngar koeled gag, ni gomanga yog ni ngar yinʼed gag nga kalbus.

33 Machane yibi buch ni fare Somoel e de pag ni ngar feked gag e ngiyalʼ nem ngar yinʼed gag nga kalbus.

34 Me yibi buch ni Amulek e yib nge sakʼiy nga mʼon, ma ki tabab ko machib ngoraed. Ma chiney e gathi gubin fapi thin ku Amulek ma ni yoloey, machane bang ko pi thin rokʼ e kan yoloey nga langgin e kaney e babyor.