1 Me yibi buch ni fapi Amalekites nge fapi Amulonites nge fapi Lamanites ni ur moyed u lan fare binaw nu Amulon, nge ku lan fare binaw nu Helam, ma kuʼur moyed u lan fare binaw nu Jerusalem, ara ngan ngoch nag i weliy, ni arame gubin yang e binaw iyaen, ni dawori michaenʼraed ma dawor rafeked nga dakeanraed fare fithingan ni Anti-Nephi-Lehi, e kʼaring raed fapi Amalekites nge fapi Amulonites ngar damomuw gaed ngakʼ pi walagraed ni ke michaenʼraed.

2 Ma arame rigel e fananikan roraed ngoraed, ni rigel iyaen mar tabab gaed ko togopluw ngakʼ e pilung roraed, ni rigel iyaen ni arame dakur adaged ni nge mang pilung roraed; ere, rafeked talin e cham ni ngar cham gaed ngakʼ fapi gidiiʼ ko Anti-Nephi-Lehi.

3 Chiney e fare pilung e ke piiʼ fare lung ngakʼ beeʼ nib pagael ni fak, me pining fithingan ni Anti-Nephi-Lehi.

4 Ma fare pilung e yimʼ u lan e re duw ni baʼaram ni fapi Lamanites e kar tabab gaed i tʼaer midlen e mael ni nge yaen ngakʼ fapi gidiiʼ ku Got.

5 Ere chiney e napʼan ni guy Ammon nge pi walagen nge gubin fapiʼin nra uned ngakʼ ni fapi Lamanites ni yaed be falʼeg rograed ni ngar liiʼed pi walagraed, marbaed iyib nga lan e binaw nu Midian, ma ireram e gin ni madaʼ nag Ammon gubin i walagen riy; mar chuw gaed u roem ngar baed ko fare binaw nu Ishmael ni nge yog nra puruyʼ gaed Lamoni nge walagen ni Anti-Nephi-Lehi, ko mang e thingar rrinʼed me yog ni ngar ayuweged yaed rokʼ fapi Lamanites.

6 Chiney e dariy beeʼ u fithikʼ gubin fapi gidiiʼ ni ke michaenʼraed ngakʼ Somoel ni yaedra fek talin e cham roraed ni ngar cham gaed pi walagraed; dariy, ma ku dabra falʼeged rograed ko mael; arragon, ma mus ko fare pilung roraed me yoeg ni dabra pigicham gaed.

7 Chiney, e baʼaray e pi thin ni yoeg ngakʼ fapi gidiiʼ ni morngaʼagen e binem e gagyeg: Gube pining e magaer ngakʼ e Got rog, gimed e pi gidiiʼ rog nib tʼuf rog, ni fare Got rodaed e ke piiʼ u fithikʼ e murnguy e pichaʼaney ni walagdaed, ni fapi Nephites, ngodaed ni ngar machib niged gadaed, ni nge chub u wunʼdaed fapi yalen ko pi chitamangdaed nib kireb.

8 Ere musap gaed, gube oge magaer ngakʼ e Got rog ni ke piiʼ bayang ko Kan ni Thothup rokʼ ni nge munguy nag gumʼirchaʼdaed, ni kad binged ba thaʼ ngakʼ e pi chaʼaney ni walagdaed, ni fapi Nephites.

9 Ere musap gaed, kug be oge magaer ngakʼ e Got rog, ni ke mab e biney e thaʼ ma ke puluw u wunʼdaed e pi denen rodaed, nge gubin e pi mathang pogofan ni kad rinʼed.

10 Ma kug be oge magaer ngakʼ e Got rog, arragon, Got rog ni thʼabi tolang, ni ke bing woʼen ngodaed ni nge yog ni ngad kalgaed ngaenʼdaed ko pinnʼey, ma ki nʼaegfan e pi denen nge pi mathang pogofan nib yoʼor ni kad rinʼed, ma ke chuw kirbin u gumʼirchaʼdaed, u dakean e murnguy rokʼ fak.

11 Ere chiney e musap gaed, gimed pi walageg, faʼanra kemus rogon ni rayog ni ngad rinʼed (ni gadaed e ud moyed ni thʼabi malog u fithikʼ gubin e gidiiʼ) ni ngad kalgaed ngaenʼdaed ko gubin e pi denen rodaed nge pi mathang pogofan nib yoʼor ni kad rinʼed, ni nge chuweg Got u lan gumʼirchaʼdaed, ya karimus chirogon ni rayog ni ngad rinʼed, me yog ni ngad kalgaed ngaenʼdaed nib felʼ rogon u mit Got ni nge yog ni chuweg e alit rodaed—

12 Chiney, o pi walageg ni thʼabi tʼuf rog, faʼanra ke chuweg Got e alit rodaed, ma ke beʼech e sayden rodaed, ma ngad tayed riy ni dab kud acheyed e sayden rodaed nga rachaʼen pi walagdaed.

13 Musap gaed, gube gaʼar ngomed, Dangay, ngad tayed e sayden rodaed ni dabki alit nga rachaʼen pi walagdaed; ya sana, faʼanra ngad alit niged e sayden rodaed bayay ma dabki yog ni ngan luknag nge beʼech u dakean rachaʼen Fachaʼ ni Fak e Got rodaed, nra mapʼ ni fan ko bayul ko pi denen rodaed.

14 Ma fare Got ni thʼabi tolang e ke runguy daed, me dag e pinnʼey ngodaed ni nga dabda mʼaed; arragon, ke dag e pinnʼey ngodaed u mʼon, ni bachan e be runguy daed ni kuboed rogon ni be runguy pifak daed; ere, u fithikʼ e murnguy rokʼ ma be yibi mʼug ngodaed u dakean e pi angel rokʼ, ni fare woʼen e thap e nge yog ni dag ngodaed ni ku aram rogon ko tin ni kubay nga mʼon e mfen.

15 O, rib murnguy e Got roraed! Ere chiney e musap gaed, faʼanra kemus chirogon ni rayog ni ngad rinʼed ni ngan chuweg e alit rodaed rodaed, nge sayden rodaed ni kan beʼech nag, meʼere ngad mitheged nge yog ni paer nib beʼech, ni mich riy ngakʼ Got rodaed ko bin tomur e rran, ara ko re rran ni yira fek daed ngad sakʼiy gaed nga pʼoewchen ni ngan pufthin nagdaed, ni nge yaeni aw ni dawor da alit niged e sayden rodaed nga fithikʼ i rachaʼen walagdaed ko ngiyalʼ i nʼen ni piiʼ e thin rokʼ ngodaed ma ireram e gin ni kad beʼech gaed riy.

16 Ere chiney, o pi walageg, faʼanra pi walagdaed e ngar guyed rogon ni ngar liiʼed gadaed, meʼ ere musap gaed, ngad mithaeged e pi sayden rodaed, arragon, ngad kʼeyaged nib toʼaer nga fithikʼ e butʼ, ni nge yog ni paer nib beʼech, me paer ni mich riy ni dawor da muruwel gaed ngay, ko bin tomur e rran; ma faʼanra nge liiʼdaed pi walagdaed, musap gaed, faan gadaed ra yaen ngakʼ e Got rodaed ma gadaed ra thap.

17 Ere yibi buch u napʼan ni ke muʼ fare pilung i yoeg e pinnʼey, ma gubin fapi gidiiʼ ni kar moʼolung gaed nga taʼabang, e rafeked e sayden roraed, nge gubin e talin e cham ni un puʼoeg rachaʼen e gidiiʼ ngay, ngar kʼeyaged nib toʼaer nga fithikʼ e butʼ.

18 Ma biney e rrinʼed, ni bachan e yaed be sap ngay ni mich riy ngakʼ Got, nge gidiiʼ, ni dakur feked e talin e cham bayay ngar puʼoeged rachaʼen e gidiiʼ; ma biney e rrinʼed, ni yaed be dugliy ma yaed be micheg u lan e mʼag u thilraed Got, ni kab felʼ ni yaedra piiʼ e pogofan roraed ko bin ni ngar puʼoeged rachaʼen pi walagraed; ma kab felʼ ni ngan piiʼ ngakʼ beeʼ ni walagey ko bin ni ngan fek rokʼ; ma kab felʼ ni ngar muruwel gaed ni rib almarin nga paʼraed ko bin ni ngar pired u lan e pi rran roraed u fithikʼ e gameed.

19 Ere kad guyed ni, tiney e Lamanites e napʼan ni michaenʼraed ma kar nanged e tin riyulʼ, mar pired ni yaed ba yulʼyulʼ, ma yaedra paer ngar gafgow gaed nge madaʼ ko ngiyalʼ ni kar mʼaed ko bin ni ngar denen gaed; ere kad guyed nra kʼeyaged talin e mael roraed ko gapas, ara ra kʼey ged fapi talin e mael, ni fan ko gapas.

20 Me yibi buch ni pi walagraed, ni fapi Lamanites, e ra falʼeged rograed ko mael, marbaed ko fare binaw ku Nephi ni fan e ngar liiʼed fare pilung, mar tayed beeʼ nga luwan, ma nga kur liiʼed fapi gidiiʼ nu Anti-Nephi-Lehi ngar mʼaed ngar chuw gaed ko binaw.

21 Chiney e napʼan ni guy fapi gidiiʼ ni karbaed iyib ngoraed ni cham ma ranoed nga wean ni ngar madaʼ gaed, mar parawgaed nga butʼ u pʼoewchraed, mar tabab gaed ko meybil ngakʼ Somoel; ere aray rogon e nʼen ni yaed be rinʼ u napʼan ni yib fapi Lamanites ngoraed, mar tabab gaed i liiʼraed ko sayden.

22 Ere aray rogon ni dariy e sasagaʼal ngay, mar liiʼed rebe biyuʼ nge lal i yaed; ere kad nanged ni yaed e ba felʼ waʼathraed, ya ka ranoed rapired ngakʼ e Got roraed.

23 Chiney e napʼan ni guy fapi Lamanites walagraed ni dabra miil gaed ko sayden, ara ra chel gaed ko baʼan matʼaw fa baʼan gilaeyʼ, ma kemus ni ngar thig gaed u butʼ ngar mʼaed, ma yaed be oge soerokʼ ku Got ni aram rogon ni yaed be yimʼ nga tane sayden—

24 Ere chiney e napʼan ni guy fapi Lamanites e biney mar talgaed i liiʼraed; mab yoʼor i yaed e ke oeb gumʼirchaʼen ko murnguy ngakʼ e pi walagraed ni kar mʼaed ko sayden, ya kar kalgaed ngaenʼraed ko pinʼen ni kar rinʼed.

25 Me yibi buch ni ri yinʼed talin e mael roraed nga butʼ, ma dab kur feked bayay, ya ke amithaenʼ raed ko pi mathang pogofan ni kar rinʼed; mar ragbug gaed nga butʼ ni woed pi walagraed, mar pagedaenʼraed ko murnguy rokʼ e piʼin ni yaed be pug paʼraed ngalang ni ngar liiʼed raed.

26 Me yibi buch ni fapi gidiiʼ ku Got e rapeth gaed e binem e rran ni yaed bayoʼor ko piʼin ni kan liiʼraed; ma piʼin ni kan liiʼraed e yaed bogi gidiiʼ nib matʼaw, ere dariy rogon ni nge maerwaer u wunʼdaed ya yaed e kar thap gaed.

27 Ma dariy beeʼ nib kireb nliiʼ u fithikʼraed; machane bayoʼor ko rebe biyuʼ e piʼin ni tamilang laniyaenʼraed ko tin nib riyulʼ; ere kad guyed ni fare Somoel e ma muruwel nib yoʼor kanawoʼen ni nge thapeg e gidiiʼ rokʼ.

28 Chiney e tin yoʼor ko fapi Lamanites ni ra liiʼed e boʼor i walagraed e yaed fapi Amalekites nge Amulonites, oren i yaed e ba un ko fare yalen nge mich ko fapi Nehors.

29 Chiney, u fithikʼ fa piʼin ni kar peth gaed ko fapi gidiiʼ ku Somoel, e dariy beeʼ riy ni ba Amalekites fa Amulonites, ara beeʼ ko fare yalen nge mich ku Nehor, ya yaed gidiiʼen Laman nge Lemuel.

30 Ere aray rogon ni rayog ni ngad nanged, ni gidiiʼ e bay bingyalʼ i banʼen u tomuren ni ke tamilang nagraed fare Kan ni Thothup ku Got, ma ke tamilang laniyaenʼraed ko tin nib matʼaw banʼen, ma bay ra mul gaed nga fithikʼ e denen nge ngongol ni kireb, ma arame rigel boech e ʼelʼel u gumʼirchaʼraed, ere aray rogon e dodow ni yaedra taw ngay ni ke gel boech e kireb roraed ko baʼaram ni faʼan gomanga dar nanged e pinnʼey.