1 Me yibi buch ni fapi Nephites ni dan liiʼraed ko pi tatalin e mael, ma tomuren ni kar muʼ gaed i kʼeyag e piʼin ni kar mʼaed—chiney e urngin e piʼin ni kar mʼaed e dan thiʼeg raed, ni bachan e kay gur yoʼor gaed—ere tomuren ni kar muʼ gaed i kʼeyag e pi ldow roraed mar suloed ko pi binaw roraed, nge pi naʼun roraed, nge pi leʼengiraed, nge pi bitir roraed.

2 Chiney e rib yoʼor e piʼin nib ppin nge bitir ni kan liiʼraed ngar mʼaed ko sayden, nge kub yoʼor e gamanman roraed nge garbaw roraed; nge kub yoʼor yang ko pi rad roraed nib sug tafiʼiraed ni grain riy ni kan gatheay, ya yu ulung e gidiiʼ ni ka ranoed u dakean kar diliʼiyed nga butʼ.

3 Ere chiney e urngin fapi Lamanites nge Amlicites ni kan liiʼraed kar mʼaed u dakean e binaw u mirichlen fare lulʼ ni Sidon e ninʼraed nga manalʼul u Sidon; ere musap gaed pi yilraed e bay u ʼaer u maday, ni rib yoʼor.

4 Ere fapi Amlicites e kar kiiʼeged yaed ko fapi Nephites, ya kar acheyed e pow nib row nga periʼraed ni boed rogon fapi Lamanites; machane dawor ra puyed e piy u loelugraed ni boed fapi Lamanites.

5 Chiney e loelugen fapi Lamanites e kan puy e piy riy; ma dariy e mad roraed, ma kemus ni keruʼ e gamanman e kar longbiyed nga lukungraed, nge ku pi madan e mael roraed, e ire kar yinʼed nga dakeanraed, nge pi gatʼing roraed, nge pi gane gatʼing roraed, nge malang ni gane gawul, nge gawul roraed, nge ku boech.

6 Ma yalach u doew fapi Lamanites e ba lumor raʼen, ni boed rogon fare pow nni tay nga dakean e pi chitamangraed, nib gechig ngoraed ni bachan e denen roraed nge togopluw roraed ngakʼ pi walagraed, ni arame Nephi, Jacob, nge Yosef, nge Sam, ni bogniiʼ nib matʼaw mab thothup.

7 Ma pi walagraed e ur gayed rogon ni ngar liiʼed raed ngar mʼaed, ere ni gechig nagraed; ma fare Somoel ni Got e tay ba pow nga dakeanraed, arragon, nga dakean Laman nge Lemuel, nge ku fapi pagael ni fak Ishmael, nge pi ppin ni bay ko nug rokʼ Ishmael.

8 Ma biney e nrinʼ ni nge yog ni kiiʼ pifakraed rokʼ e piʼin pifak pi walagraed, ni nge yog riy ni fare Somoel ni Got e nge ayuweg e gidiiʼ rokʼ, ni nga dabra maʼathuk gaed me michaenʼraed ko pi yalen ni dematʼaw niʼir e ra gafgow nagraed.

9 Me yibi buch ni enra athkuy e bitir rokʼ nga fak fapi Lamanites e ireram e chaʼ ni ku aram rogon e gechig nra aw nga dakean pifak.

10 Ere, enra pag ir nge gagyeg nag fapi Lamanites e ireram e chaʼ ni kanoeg niʼir e bagyaed, ma arame ra aw fare pow nga dakean.

11 Me yibi buch ni piʼin dabi mich u wunʼraed ko fare yalen ko fapi Lamanites, machane i mich u wunʼraed fapi chep niʼir e ni fek nga wuruʼ fare nam nu Jerusalem, nge ku fapi yalen rok e pi chitamangraed, niʼir e ba matʼaw, ni yaed e piʼin ni michaenʼraed ko fapi motochiyel rokʼ Got ma ur fol gaed riy, min piningraed ni fapi Nephites, ara fapi gidiiʼ ku Nephi, ko ngiyalʼ nem iyaen nga mʼon—

12 Ma yaed e piʼin ni kuʼur chaʼariyed fapi chep ni riyulʼ ni morngaʼagen e gidiiʼ roraed, nge ku morngaʼagen fapi gidiiʼ rokʼ fapi Lamanites.

13 Chiney e ngad suloed bayay ko fapi Amlicites, ya yaed e kubay ba pow nni tay nga dakeanraed; arragon, yaed e ra yiglʼiyed e re pow nem nga dakeanraed, arragon, ni ba pow nib row ni kar acheyed nga dakean i periʼraed.

14 Ere aray rogon ni muguʼul fare thin rokʼ Got, ya baʼaray e pi thin ni yoeg ngakʼ Nephi: Musap, fapi Lamanites e kug kireb nag waʼathraed, ma bay gu tay ba pow nga dakeanraed ni nge yog ni yaed nge pifakraed e ngar kiiʼ gaed rom nge pifakam, ko chiney iyaen e ngaram nge gubinfen, ma kemus ni faʼan yaedra kalngaenʼ ko pi denen roraed mar chel gaed ngar sap gaed ngog ni nge yog ni gomanga gu runguy raed.

15 Ma ku bayay: Bay gu tay ba pow nga dakean e chaʼ ni ra athkuy pifak ngakʼ e pi walagem, ni nge yog niki buch waʼathraed.

16 Ma ku bayay: Bay gu tay ba pow nga dakean e chaʼ ni ra yib nag e cham ngom nge pifakam.

17 Ma ku bayay, ma chaʼ ni ra chuw rom e dab kun pining ni fakam; ma bay gu tawaʼath nigem, nge chaʼ ni gomanga bay ni pining ni fakam, e chiney iyaen e ngaram nge gubinfen; ma ireray e michmich rokʼ Somoel ngakʼ Nephi nge pifak.

18 Chiney e fapi Amlicites e dar nanged ni yaed be muguʼ u liy fapi thin rokʼ Got u napʼan ni kar tabab gaed i tay e pow nga periʼraed; machane rabaed nga tamilang ni togopluw ngakʼ Got; ere rib tʼuf ni ngan bucheg waʼathraed.

19 Chiney e gu baʼadag ni ngam guyed ni yaed e kar miliyed e gechig nga dakeanraed; ma aram rogon ni gubin e gidiiʼ nra beeʼ ni ke buch waʼathan ma ire ke miliy e gafgow nga dakean.

20 Chiney e yibi buch ni deyoʼor e rran nga tomuren e mael u lan fare binaw u Zarahemla, ni fapi Lamanites nge fapi Amlicites, ma ku bay buʼulung e salthaw ko fapi Lamanites ni rabaed ni mael ngakʼ fapi gidiiʼ ku Nephi, aram ko farengi nʼen ni fa ulung ni mʼon e salthaw e ra madaʼ gaed fapi Amlicites riy.

21 Me yibi buch ni immoy ba ulung i salthaw nni lʼoegraed ngar tulufed yaed nga wuruʼ e binaw roraed.

22 Chiney e Alma e ke madʼad ere daki un e yaneʼ ko mael ngakʼ fapi Lamanites;

23 Machane me lʼoeg ba ulung i salthaw nib yoʼor nga ranoed ngoraed ko cham; ma ranoed ra liiʼed e Lamanites nib yoʼor, mar tulufed e tin ni ke magaey roraed nga wuruʼ e mathil ko fare binaw roraed.

24 Ma arame ra suloed bayay ngar tabab gaed i yarmiy e gapas nga lan fare binaw, ni daki magawon nagraed fapi toʼogor roraed u bangi yalʼi nʼen.

25 Chiney e pinnʼey e nrinʼ, arragon, gubin e pi mael ney nge togopluw e tabab me yaeni mʼay u lan e bin lal e duw ko lung ko fapi tapuf-oloboch.

26 Ma lan taʼareb e duw ma yu biyuʼ nge ragag e biyuʼ e gidiiʼ ni kan piiʼraed ko fare fayleng ni manechubog, ni gomanga ra pirʼeged e pi tawaʼath roraed u rogon e pi muruwel roraed, ko ba mangil fa ba kireb, ni ngar pirʼeged e falfalaenʼ ni manechubog fa kirbaenʼ ni manechubog, ni be yaen u rogon e ra yaʼel ni nra dugiliyed ni ngar fol gaed rokʼ, ko bin felʼ e yaʼel fa bin kireb.

27 Ya gubin e gidiiʼ ni ra beeʼ ma rayog puluwon ngakʼ rokʼ e chaʼ ni ke dugliy ni nge fol rokʼ, ma biney e be yaen u rogon fapi thin ko fare nangaenʼ ko prophecy; ere ngan pag nge yaeni aw nrogon e tin riyulʼ. Ere aray rogon ni yaeni mus e bin lal e duw ko lung ko fapi tapuf-oloboch.