Serafo
Pwara non Fansoun Monumon
Non oruan pwinin ai we annut nein petewen ren Ekkewe Fopun seni ewe steik a fakkun pung ran me a wor eu watte monumon. Seni ai wart a wor 24 fopun me ruemon sou emwen, me am meinisin aua chok nomofengen non eu kukkun imw pwe ausap feiengau. A fakkun pung ran me ewe asepwan mi pochokununo. Ua chok pwisin achema ngeniei me ekieki usun ewe iotek a fen fis seni ewe presetenin steik. Ewe wart a pwan iotek fengen non ewe kukkun imw, me ua pwan pwisin iotek.
Chommong ekkewe nengin ra niokus, me a mecheres ne weweiti popun ar niokus. Ewe kukkun imw ese pochokun, me mi chok arap ngeni eu chonupupu. Mwirin 20 minich ewe monumon mi fakkun watteno me meinisin chon ewe steik ra tou seni ar kewe kukkun imw me ra saa ngeni pwan ekkoch kukkun imw ra nom asan. Ai we presetenin steik a pwan iotek sefan, me am aua konu ekkewe kon mi fel, me konen kinter, me sokkopaten kon pwe epwe aururu netipem. Ewer, aua niokus, nge aua mefi pwe mettoch meinisin resap chiwen osukosuk. Fan esap awa am mi pwan tongeni niwin sefan ngeni ekkewe kukkun imw ra nom fan.
Mwirin a wes am annut nein petewen aua kaeo usun met a fis non ewe watte monumon. A kinikin fesen pwe a wor ru monumon. Ekkewe ru monumon ra rikino seni kem epek me epek. Ekkewe monumon ra chok napano mwirin ra suu seni kem!
Ua sinei pwe Kot a rongorong am iotek non na pwin me A tumunu kem seni ewe monumon. Ifa usun eu watte monumon epwe kinikin fesen ika esap seni an Kot mochen? Ua sinei pwe non ekkewe monumon non pekin ngun, sia tongeni iotek ngeni Semach won Nang me I epwe rongorong me pwonueni ach iotek. Epwe tumunu kich me epwe mut ngeni kich pwara pwe sipwe tongeni pworacho ngeni.