Poraus seni FEFIN Chon Amwa, January 2012
Tumunun me Aninis Fetan me ren Fefin Chon Amwa
Kopwe anneani ekkei mettoch, me nupwen mi och, kopwe aporausa ren ekkewe fefin ka churi. Kopwe aea ekkewe kapas eis epwe anisuk ne apochokuna ekkewe fefin ka churi me pwan aochu manauom ren aean Fin Anisi.
Nuku, Famini, Aninis
Preseten Henry B. Eyring, Aewin Chon Aninis non ewe Aewin Presetensi a aitikich pwe “Tong ennet [a wewen] mettoch nap seni kirokiroch chok, Tong ennet a uputiw seni nuku non ewe Samon Jises Kraist me a feito me ren An we Achasefan.”1 Fan iten ekkewe fefin seni Fin Anisi, fefin chon amwa ir mi tongeni afetanei ei tong ennet, pwe mi auchea non ach nuku non ewe Samon.
Me ren fefin chon amwa, sia tongeni tumunu ekkewe fefin emon me emon ren ach afanafan fetan, me ren ach mochen pwe sipwe anisir me ar kewe famini. Julie B. Beck, Presetenin Fin Anisi, a awewe ngeni kich, “Angangen fefin chon amwa mi chok usun angangen ewe Samon nupwen sia mochen anisi ekkewe aramas pwan sise ekiek usun pwisin ach mochen. Esap wor nesoponon an fefin chon amwa. Fefin chon amwa rese chok angang fan iten wiser chok pun ra soposopono ar aninis iteiten ran. Nupwen an fefin chon amwa ir mi nukuchar non wiser ra wesewesen tapweno mwirin Jises.”2
Nupwen sia soposopono non ach tumunun aramas me ach iotek, sia kaeo ifa usun sia tongeni efeiochu ekkewe fefin sia churi me ar kewe famini. A wor sokkopaten mettoch sia tongeni fori non ach aninis fetan—ekkoch mi watte me ekkoch mi kukkun. Preseten Thomas S. Monson a aitikich pwe “Fan chommong föfforun aninis mi tongeni efeiochu manauan aramas: ka tongeni poraus fengen usun ar famini, apochokunar ren om kewe kapas, apasa mettoch mi kirokiroch, makkei eu taropwen kinisou ngenir, ika kokorir won ewe fon.” “Ika sia katon aramas unukuch, me ika ach memef epwe fiti ach föffor, sia tongeni fori chommong mettoch mi murino. … Fan chommong a wor föfforun aninis me ren meinisin ekkewe an fefin chon amwa seni ewe mwichen Fin Anisi.”3
Seni ekkewe Pukfel
John 13:15, 34–35; 21:15; Mosaia 2:17; Doctrine and Covenants 81:5; Moses 1:39
Seni Ach Uruo
Non ewe ier 1843, chon ewe Mwichefen non Nauvoo, Illinois, ra kinikin fesen pwe epwe wor ruanu wart. Non ena ier non ewe maram July, sou emwen seni Fin Anisi ra fori ruanu mwichen fefin pwe repwe tongeni churi meinisin ekkewe wart. A wor wisen ekkewe mwichen fefin pwe repwe nengeni ika ra tongeni anisi ekkoch me ra pwan ioni fengeni asor. Ewe Mwichen Fin Anisi ra aea ekkewe asor pwe repwe anisi ekkewe ir mi osupwang.4
An fefin chon amwa rese chiwin ioni fengeni asor, nge ir mi chiwin nengeni ika ir mi tongeni anisi pwan emon—non pekin ngun me non pekin inis—me angang weires pwe repwe tongeni anisir. Eliza R. Snow (1804–87), oruemonun Presetenin Fin Anisi, a awewe: “Emon fefin chon amwa … epwe tongeni mefi ewe Ngunun ewe Samon, me epwe tongeni tonong non eu imw me epwe sinei met sokkun ngun a nom non ewe imw. … Kopwe tingor ngeni Kot me ewe Ngun mi Fel pwe kopwe angei [ewe Ngun mi Fel] pwe kopwe tongeni sinei met sokkun ngun a nemeni eu imw… me ka tongeni apasa kapasen kinamwe me aurour, me ika ka kuna emon fefin a ekkis patapatano, kopwe angei i non netipom pwe kopwe tongeni apochokuna [i].”5
© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Engenes: 6/11. Kapungunon chiakun: 6/11. Chiakun Visiting Teaching Message, January 2012. Chuukese. 10361 901
Met Ua Tongeni Fori?
-
Met sokkun mettoch ua fori pwe upwe anisi ekkewe fefin pwe repwe mefi pwe ngang wesewesen chiener we me ua tongeir?
-
Ifa usun upwe angoch non ai tumunun aramas?