Jèn yo
Kouraj pou reziste anba tanpèt la
Nan dezyèm nuit nan kan pou Jènfi yo nan pye m nan, nou te gen yon gwo loraj ak tanpèt. Pawas mwen an te gen apeprè 24 jènfi ki te nan kan an avèk de dirijant, e nou tout te oblije antre nan youn nan ti kabin yo pou pwoteksyon. Lapli a t ap tonbe anpil, epi van an te kòmanse vin pi fò. San rete, m te oblije ap raple tèt mwen priyè pou sekirite a prezidan pye nou an te fè anvan an. Pawas nou an te fè pwòp priyè angwoup pa nou nan kabin nou an, e m te fè priyè pèsonèl mwen.
Anpil nan jènfi yo te pè, e li te fasil pou wè poukisa. Kabin nou an pa t twò solid, epi nou te bò kote yon larivyè. Nan apeprè 20 minit, tanpèt la te vin si fò ke tout pye a te kouri soti nan kabin pawas yo a pou ale nan kabin konseye yo, ki te sou yon teren pi solid. Prezidan pye m nan te fè yon lòt priyè, epi nou te chante kantik, chan Primè, ak chan kan yo nan yon efò pou rekonfòte nou. Wi, nou te pè, men nou te santi ke tout bagay t ap oke. Yon demi èdtan apre, sa te oke pou n te retounen nan kabin pawas nou yo.
Nan apre nou te vin konnen sa k te rive nan tanpèt la nuit sa a. Li te divize an de loraj. Youn nan yo te antoure nou adwat epi lòt la agoch. Sa nou te sibi a se pa t menm pati k te pi fò a!
Mwen konnen ke Bondye te tande priyè nou yo jou swa sa a epi li te pwoteje nou nan mitan moman pi terib yo nan tanpèt la. Poukisa yon tanpèt ta separe ande si se pa Bondye ki te bezwen sa fèt konsa? Mwen konnen ke nan tanpèt lavi yo, nou kapab toujou priye Papa nou ki nan Syèl la epi l ap tande ak reponn nou, pou ba nou kouraj ak pwoteksyon nou bezwen pou travèse l an sekirite.